ၥၫ့ဎွၩဒိၪ လီယို ၁၄ဂၩလဂၩနီၪ အၪ့ကံၩ့အၪ့ယၫထၪ့ ခးပယၩ့ဆၧဒုၭဆၧခၭ ကအီၪပထုၬခွံၬအဂး

ၥၫ့ဎွၩဒိၪ လီယို၁၄ဂၩလဂၩနီၪ အၪ့ကံၩ့အၪ့ယၫထၪ့ ခးပယၩ့ဆၧဒုၭဆၧခၭ ကအီၪဖျါပထုၬအဂးဒဲ ဘဲၫယူၫကရံၩ့ထံၫခးလဖၪအၥိၭ ဆၧအလးလၧအဘၪထိး ဆၧဒုၭဆၧယၩလဖၪအဂး အၪ့ကံၩ့ဘၩဆိၪဖၪအ့ၪဝ့ၫ ဆၧဎူၫဆၧဎၩ့ကအီၪထၪ့အဂးနီၪလီၫႉ လၧအဖီၩ့ခွံၬ အတုၬမုနံၩ ခးၥဲၫထၧၫ့ဘံၪ့ယၫ ၦဆိၬၥၫထနၫအဘိၪ့မုနံၩ မံဆၩဆၧလုထၪ့ အီၪလၧစံၫ့ပံတၧၫလးပျၩ့တုၩ့ဖၧၩ့အထီ ၥၫ့ဎွၩယီၩ အၪ့ကံၩ့ဘၩဆိၪဖၪအ့ၪ ခးၥဲၫထၧၫ့ဘံၪ့ယၫ ဘဲၫဆၧဎူၫဆၧဎၩ့ကအီၪထၪ့အဂးနီၪလီၫႉ “စၭထၪ့လၧ၂၀၂၁နံၪ့အထီ ခးပယၩ့ဖၧၩ့ ဆၧဒုၭဆၧခၭကဲၪထၪ့အကၠီၩ့ ဆၧပရၧၫ့အအီၪဂဲၫလၧထံၪခးအနီၪလဖၪ ပဒၪဘၪပၥၭဘၪထံၭဆၫအၪမၬနီၪလီၫႉ ဆၧနီၪအကၠီၩ့ ယမိအၪ့ယၫဘၪ ခးပယၩ့ဖၧၩ့ ဆၧဒုၭဆၧခၭလဖၪ မွဲကအီၪပထုၬခွံၬၥၭအဂးနီၪလီၫႉ” အဂဲး ၥၫ့ဎွၩဖရၫ့စံ စံၭဝ့ၫဘဲၫနီၪအၥိၭလီၫႉ လကၭဘၪ လၧထံၪခးဖိၪၥံၪအဂံၪ့အဎၫ့အီၪအလးအကျဲၩ့ဖၫ့ခိၪ လီၩ့ခွံၬလၩ့ဆၧဖီးဖၭလၧကဘၩ့ယူၩလဖၪႇ လီၩ့ဎူလၫ့ထံၫခးဖိၪၥံၪအဂံၪ့အဎၫ့ႇ ဆၧလီၩ့မၩဂၭဂီၩ့ဂၭစၪဆၧႇ ဆၧလီၩ့မၩၥံၫမၩဆၫဆၧလဖၪအဂး ၥၫ့ဎွၩယီၩ အၥၭအုၭဝ့ၫဒၪဒိၪဒိၪဒ့ၭဂီၩ့ လၧဆၧဘၩဆိၪဖၪအဖၧၩ့ အီၪလၧခးပယၩ့ၦဘၪၡၪ့ဘၪနၭဖိၪၥံၪကၠၧၫ့ကၠၧၫ့အဂဲး လီၩဖျီၪထၪ့ဝ့ၫနီၪလီၫႉ “လၧယၥၭအတီၩအလီၩ့ဖၧၩ့ ယအၪ့ယၫထၪ့ထဲၩ့ဒီၭ ဆၧဒုၭဆၧခၭလဖၪ ကအီၪဖျါထုၬခွံၬၥၭဖျဲၪဖျဲၪအဂးနီၪလီၫႉ ဆၧစူၭကီၪ့ကၩ့ကၩဎိၭလၩ့ဆၧအဖၧၩ့ စူၪဝဲၩလဖၪနီၪ မွဲအၪ့လဲၩထၪ့ထဲၩ့ဒၪအၥၭလၧ ဆၧဎူၫဆၧဎၩ့အဆၧနဲၪ့နီၪလါဆံၭ”အဂဲး ၥၫ့ဎွၩအၪ့ကံၩ့ဘၩဆိၪဖၪဆၧ ဘဲၫနီၪအၥိၭလီၫႉ ဂီၩ့နီၪ ဖံၭဆံၫ့ဎံၪဒဲ ယူၫကရံၩ့ထံၪခးလဖၪအဂးဆ့ ၥၫ့ဎွၩယီၩ အၪ့ကံၩ့ဘၩဆိၪဖၪဝ့ၫဒၪ ဘဲၫယီၩအၥိၭဒံၭလီၫႉ “ဆၧဘၪလိၬဎွ့ၪဎီၩ့ဒဲ ဆၧဎူၫဆၧဎၩ့ကအီၪထၪ့ လဆိၩယၫအဂး ဖ့ၪလၫ့ဘၪ ခးၥဲၫထၧၫ့ဘံၪ့ယၫဖၧၩ့ ထံၪခးခိၪနါထီးလူၬလဖၪ ဆၧကိၪ့ၥ့ၪအဂ့ၩလဖၪဒဲ ၥၭနၧၩ့ထၧၫ့လဖၪလါဆံၭယွၩဧ့”. အၫမ့ၫႉ