လၧဖျိၩ့ဆၨၩအခၫ့ထံၭၥၫ့ထၧၫ့ဖုဝဲဖျိၩ့ဖိၪနံၫဂၩ (၃)

ထၧၫ့ဖုဝဲထံၩၥိၭၦလၧအဲၪဒိၭခိၭနၪ ၦဖျိၩ့ၡါဖိၪၥံၪဧ့ႇ နံၩလၧအမုၬကိၭဂၩဒ့ၭလါဆံၭနဲၪႉ  မုကနွ့ၫယီၩ ၦဖျိၩ့ၡါဖိၪအနိၪ့ဖၧၩ့ ယမိဆုး အဲၪဒိၭလီၩဖ့ၪနဲၪဘၪနၥံၪ ၦဖျိၩ့ၡါဖိၪအခိၪတၩ့နီၪမွဲ ‘လၧဖျိၩ့ဆၨၩအခၫ့ထံၭၥၫ့ ထၧၫ့ဖုဝဲဖျိၩ့ဖိၪနံၫဂၩ’ ၡါဖိၪလၧအအီၪထး လဖၪနီၪလီၫႉ

ဖူၫထိၭမဲၪဖါအထၧၫ့ဖုဝဲနံၫဂၩနီၪ လီၩ့ဎွါဖံၬအဂ့ၩ လးကျဲၩ့အဂ့ၩတၭ လီၩခုၪ့ယိစိၩဖံၬၥံၪ အလးကစီၪ့ဂီၩ့ကစီၪ့နီၪလီၫႉ အထၧၫ့ဖုဝဲနံၫဂၩနီၪ ဒၪန့ဖံၬအဂ့ၩအခၫ ထီးနဲၪ့ထၬဝ့ၫဂီၩ့ ဖ့ၪလၫ့ထၬအ့ၪဝ့ၫအမံၩ့လၧ ထံၫဆ့ၭမ့ၬယွၩနီၪလီၫႉ လၧခဲၫ့ ဖူၫနံၫဂၩယီၩ ထဲၩ့ကိၭထဲၩ့အဖိၪအလံၩၥံၪဂီၩ့ ဂဲၫစဲၪ့လၫ့ ကနံၩဂီၩ့ကနံၩအခၫ ကနံၩနီၪတၭ အီၪပွံၭလၧဘံၩအနဲၩ့ထံၭ ကအၪ့ဖီၪ့လၫ့မ့ၩၥံၪၥၧၫ့ၥံၪအဂး လီၩဎွါ ၥဒၫ့ႇ ယၪ ၥံၪဒဲ ချိၪၥံၪနီၪလီၫႉ ဖူၫထိၭမဲၪဖါအဖိၪအလံၩၥံၪနီၪ အၪ့ဖီၪ့လၫ့ ၥဒၫ့ ယၪဒဲ ဆၧဒိၭဆၧလၪၥံၪတၭ အၪ့ဖီၫ့ဝ့ၫမံၫ့ဖျဲၪတၭ  အၪ့မ့ၪဂီၩ့ဖျဲၪနီၪလီၫႉ

လါနၫ့ ဖူၫစချိၪအဖိၪလံၩၥံၪ မွဲလအၪ့ဘၪဒံၭဘၪမ့ၩလီၫႉ ဘၪန့လဲၪစွါဘဲၫ အဝ့ၫၥံၪ အၪ့ဖီၪ့အၪ့ချိၪအကၠီၩ့ ချိၪနီၪမံၫ့ဒ့ၭအ့ၬတၭ ဖူၫထိၭမဲၪဖါလဂၩ မွဲခိၭအဖုခွၫလနၧၩ့လၧၩ့ဘၪတၭ ကဆုးလ့ၩဝ့ၫအဂး စံၭအဖုခွၫစချိၪနီၪ ယကဆုးလ့ၩဒံၭ နၥံၪအၪ့ဂီၩ့မၬဂဲၫလီၩပၧၩၡီၫၡီၪ လၧယလ့ၩဖၧၩ့ၥၭနီၪ ဘဲၫနၥံၪကဂဲၫဘၪအဂး ယကဖ့ၬထၬ ၥၭကျုၩထံၬၥံၪ ဆုးဂဲၫလၧယဖ့ၬထၬၥၭကျုၩဖၧၩ့ၥၭအကၠီၩ့ မၪလူၬထၬဝ့ၫဘဲၫယီၩၥိၭဂီၩ့ ဆုးလ့ၩဝ့ၫဒၪနီၪလီၫႉ

ဖူၫစချိၪအဖိၪလံၩၥံၪအၪ့ဎွံလၫ့ချိၪအလးနီၪ လၧဆၧလယိလါဘၪအဖၧၩ့ ဖူၫၥၭၡါဒဲ ဖံၫၥၭၡါနံၫဂၩ ဂဲၫထီၩ့ဝ့ၫနီၪလီၫႉ ကထံၪဎး ဖူၫၥၭၡါနီၪ ဒၪ အဝ့ၫၥံၪကအၪ့အဂး အၪ့ဎွံလၫ့ထၬချိၪနီၪအခၫ စံၭဝ့ၫ ဆၧလၧချိၪနီၪ ပအၪ့ဎွံၪဘၪဘယီၩအ့ၬ နအၪ့ဎွံဘယီၩစွါဘဲၫ မွဲနကအၪ့ဘၪနးကၠၪလၧၩ့အ့ၬႉ ချိၪအခဲၫ့စူၩၥံၪယီၩ ဖ့ၬထ့ၬဂီၩ့မၬ ကဘၪအၪ့ဎွံလၪ့နီၪလီၫႉ လၧခဲၫ့ ဖူၫစချိၪအဖိၪလံၩၥံၪလဖၪ မွဲလဆုးအၪ့ဎွံလၧၩ့ဘၪချိၪဒဲ အၪ့မ့ၩဂီၩ့ ဆုးလ့ၩဝ့ၫနီၪလီၫႉ ဖူၫစချိၪအဖိၪလံၩၥံၪလဖၪ ဆုးလ့ၩဖိၬ ဖူၫထိၬမဲၪဖါအဖိၪလံၩၥံၪ အလးခဲၫ့နီၪလီၫႉ

ထၧၫ့ဖုဝဲထံၩၥိၭဖျိၩ့ဖိၪၥံၪဧ့ႇ ၦၡါဖိၪယီၩ ပကအီၪပထုၬထၬ အလးထယီၩဂီၩ့ ၡါဖိၪလၧ လၧအအီၪထးလဖၪနီၪ လၧခဲၫ့မုနွ့ၫမုၬ ယကဆုးလီၩဖ့ၪနဲၪထဲၩ့ဘၪနၥံၪနဲၪႉ