ဝံးတခိၩ့ဆၧအီၪကီၪ့ဖၧၩ့ ၦၡၩမၩလၩမၩဖၩ့ လံၬဆံၫ့ဎံၪဘိၪ့မုနံၩအဂဲး

နံၪ့၂၀၂၅နံၪ့ လၩအီတိၫဘၧၫ ၁၁ၥၫ့ ၦဆံၫ့ဎံၪ St.Jarome အဘိၪ့မုနံၩဖၧၩ့ ၦၡၩမၩလၩမၩဖၩ့ လံၬဆံၫ့ဎံၪ အဘိၪ့မုနံၩယူၩဘလံၫ အီၪဝ့ၫဒၪလၧ ဝံးတခိၩ့ မှော်ဘီ ယ့ၫၡူၬအၥၭဆံၫ့ဎံၪၥရိၬလးဝၩ့ဖၧၩ့နီၪလီၫႉ ဘၪမၩလၩ မၩဖၩ့ဘိၪ့မုနံၩယီၩနီၪ ဆၧအီၪကီၪ့ဖိၪၥံၪအဆၧၥၭမၧၫ့ဒဲ ဆၧအီၪကီၪ့ဆၧဖံၭဆၧမၩလဖၪအဖၧၩ့ မိဖ့ၪနဲၪထၪ့ လံၬဆံၫ့ဎံၪယီၩ အရ့ၩဒိၪဝ့ၫဒၪ ဘဲၫၥ့ၪလဲၪအဂဲးနီၪလီၫႉ

ဆၧထံၪလၩ့ဒီၪလၩ့နီၪ အဆိၪထုၬၦၡၩမၩဝ့ၫဒၪလၧ မံဆၩဆၧလုထၪ့ဂီၩ့ ၦၡၩထံၭလၫ့ လံၬဆံၫ့ဎံၪလၧ ဆၧလုဂံၪ့အဖၫ့ခိၪနီၪလီၫႉ ၦလၧအလ့ၩခိၪလ့ၩနါ မံဆၩဆၧလုထၪ့နီၪ မွဲဝ့ၫ ၥၫ့ခိၪဒိၪရေမွန်ဝေလင်းထွန်းတၭ လၧမံဆၩဆၧလုထၪ့အဖၧၩ့ ၥၫ့ခိၪဒိၪယီၩ လီၩလၩ့လၬလၩ့ဝ့ၫဒၪ “ၦဎြံၬဖိၪၥံၪကိၭဂၩနီၪ ကဘၪဖီလံၬဆံၫ့ဎံၪ လကၭဘၪတၭ ကဘၪလီၩလၩ့လၬလၩ့ထဲၩ့ ယွၩလူယွၩထၫဂီၩ့ ဘဲၫလံၬဆံၫ့ဎံၪဖၧၩ့ ၥီၪ့ၥၫ့ထၬပၧၩအၥိၭ မွဲပက ဘၪခိၭနၪလီၩ့ဖိၬဝ့ၫဒၪလီၫႉ ပထံၭလၫ့ထၬလံၬဆံၫ့ဎံၪလၧ ကၠဲၭဂံၪ့ဖၧၩ့နီၪ မွဲလဂီၩ့ဒံၭဘၪတၭ ပကဘၪထံၭလၩ့ ထၬလၧ ပၥၭလၬဖၧၩ့ ကလိၫဒံၭဆ့လီၫႉ အ့ၪမွဲပကအီၪမၧၫ့ပၥၭ ဘဲၫယွၩအၪ့မၧၫ့ပၧၩအၥိၭမၬ ပဆၧဆူနဲၩနီၪ မွဲအဝံကစဲၩ့လၩ့အၥၭဂီၩ့ ကၥၪထၪ့နီၪလီၫႉ ၦဎြံၬဖိၪၥံၪ အကၧၩ့ဒိၪထုၬ ကဘၪမၩဝ့ၫ အီၪ၃မံၩ့နီၪလီၫႉ

၁ႉ ပကဘၪၥုၪ့လၩ့ထၬ ယွၩလူယွၩထၫ

၂ႉ ပကဘၪ ယိထဲၩ့ခွါထဲၩ့ ယွၩလူယွၩထၫ ဒဲ

၃ႉ ပကဘၪ အီၪအၪ့လ့ၩထဲၩ့ ဘဲၫယွၩလူယွၩထၫအၥိၭနီၪလီၫႉ ယွၩလူယွၩထၫလဖၪနီၪ ပကဘၪထံၭ လၩ့ထၬလၧ ပၥၭလၬဖၧၩ့ႇ ကဆါယွၩအလူအထၫနီၪ မွဲဒၪကဆါယ့ၫၡူၬအနၫ့ဆါဒၪအဝ့ၫနီၪလီၫႉ ပကထံၭ လၩ့ထၬ ကဆါယွၩလၧပၥၭလၬဖၧၩ့ဂီၩ့ ပကလ့ၩဆိၬန့ထဲၩ့လၧ ၦဂူၫဂၩအအီၪလါဆံၭ” အဂဲး ၥၫ့ခိၪဒိၪယီၩ လီၩလၩ့လၬလၩ့ဝ့ၫဒၪ ဘဲၫယီၩအၥိၭနီၪလီၫႉ