ဖိၪၥၪဆံၫ့ဎံၪလဖၪအၥဖၠး

နံၪ့ ၂၀၂၅နံၪ့ လၩအီတိၫဘၧၫ ၇ၥၫ့ လဂီၩ၇:၃၀အခံၫ့နီၪ ၦၡၩမၩလၩမၩဖၩ့ ဖိၪၥၪဆံၫ့ဎံၫ လဖၪ အဘိၪ့မုနံၩ လၧဝံးမၠီၩ့မၠၭ ယ့ၫၡူၭအၥၭဆံၫ့ဎံၪၥရိၬလးဝၩ့ဖၧၩ့နီၪလီၫႉ ၦလၧအလ့ၩခိၪ လ့ၩနါမံဆၩဆၧလုထၪ့နီၪ မွဲလၧ ဒိၩ့ပၥံၫ့ဆၧအီၪကီၪ့ မွန်ဆီညော် Rev.Msgr.Pius Win Than ဒဲ ၥၫ့ခၫ၄ဂၩနီၪလီၫႉ

လၧမံဆၩဆၧလုထၪ့ဖၧၩ့ မွန်ဆီညော် လီၩလၩ့လၬလၩ့ဝ့ၫဒၪ ”ကဆါယွၩနီၪ အ့ၪမွဲ မိဆိၫ့ကၩပၧၩယူၭစွါဘဲၫ ကိၭပၧၩလီၫႉ လၧအဝ့ၫကိၭဝ့ၫဒၪၦၡၩနီၪ အဝ့ၫယီၩ မၩတီၩလီၩ့ဝ့ၫႇ မၩဆံၫ့ဎံၪဝ့ၫ ဒဲ ဖ့ၪလၫ့အ့ၪဝ့ၫ အခိးအတၩလဖၪနီၪလီၫႉ အ့ၪဂီၩ့နီၪအဝ့ၫယီၩ ဆိၫ့ကၩဝ့ၫဒၪလီၫႉ အ့ၪမွဲကဆါယွၩကိၭပၧၩနီၪ ပမီၪ့ဘံၭခွံၬဘၪအ့ၬႉ ပဝံဖဲၫဆံၫ့ဎံၪနီၪ လၧပဆၧအီၪကီၪ့အဂး လၧပဎြံၬဖိၪၥံၪအဂး မွဲအရ့ၩဒိၪဝ့ၫဒၪ အၪမၬဒ့ၭတၭ ပကဘၪကျ့ၭစၨၭဝံ ဖဲၫဆံၫ့ဎံၪနီၪလီၫႉ ပဝံဖဲၫဆံၫ့ဎံၪအခၫ မွဲပဒိၭန့ဘၪကဆါယွၩအဆၧဆိၪဂ့ၩဆိၪဘွၩလဖၪနီၪလီၫႉ လၧဖဲၫဆံၫ့ဎံၪ ဖၧၩ့နီၪ ဆၧလၩ့လၭအီၪဝ့ၫဒၪ အထံၪ၂၀နီၪလီၫႉ ဆၧလၩ့လၭအထံၪ၂၀လူၬယီၩနီၪ မွဲဒၪပက န့ထၪ့ ဆၧထိးထဲၩ့တၩ့ထဲၩ့အဂးတၭ ပကဘၪဝံကၠၭဖဲၫဆံၫ့ဎံၪနီၪလီၫ”.

မံဆၩဆၧလုထၪ့ ဂီၩ့ဝ့ၫကကၠၪ ဖိၪၥၪၥံၪနီၪ ဆုးထဲၩ့ဝံကၠၭ ဖဲၫဆံၫ့ဎံၪနီၪလီၫႉ ဂီၩ့နီၪ Charity စံၫစတၧၫ့ႇ St.Paul စံၫစတၧၫ ဒဲ S.F.X စံၫစတၧၫၥံၪလဖၪနီၪ လီၩၥ့ၪယၫအ့ၪ ဖိၪဒံၪဖိၪၥၪလဖၪ အဝ့ၫၥံၪအခရၧၫ့ အဂဲးအဖးလဖၪနီၪလီၫႉ ဖိၪဒံၪဖိၪၥၪလဖၪနီၪ အီၪဂဲၫဝ့ၫ ဒၪလၧ မၠီၩ့မၠၭဆၧအီၪကီၪ့ဖၧၩ့ ဒိၩ့မုတဝၫ့လဖၪအဂဲး ပန့ဘၪဆၧပရၧၫ့ ဘဲၫယီၩအၥိၭနီၪလီၫႉ