ဘၪလီၩ့မၩဆၧမၩလၧထံၪယဲၩ့ခးယဲၩ့ ၦမၩဆၧဖိၪၥံၪအဂးယူၩဘလံၫ

နံၪ့၂၀၂၅နံၪ့ လၩအီၭတိၫဘၧၫ၅ၥၫ့နီၪ ဆၧမၩလၩမၩဖၩ့ၡီၩ့ ၦဘၪလီၩ့ၥုၭမၩဆၧမၩဖိၪ ၥံၪအဂး ယူၩဘလံၫ အီၪဝ့ၫဒၪနီၪလီၫႉ ၦၡၩမၩလၩမၩဖၩ့ဝ့ၫဒၪအလးနီၪ မွဲလၧဒိၩ့ပၥံၫ့ စံၫ့ပံတၧၫ ကၥံၪဒြဲၫ ၥရိၬလးဝၩ့ဖၧၩ့နီၪလီၫႉ ၦအလ့ၩခိၪလ့ၩနါ မံဆၩဆၧလုထၪ့နီၪ မွဲလၧဒိၩ့ပၥံၫ့ ဆၧအီၪ ကီၪ့ ၥၫ့ခိၪဒိၪ Henry မၩ့အဲၪချံၫ့နီၪလီၫႉ

လၧမံဆၩဆၧလုထၪ့ဖၧၩ့ ၥၫ့ခိၪဒိၪ လီၩလၩ့လၬလၩ့ဝ့ၫဒၪ ပခးပယၩ့ဖၧၩ့ ၦၡၩလၧအ ဘၪလ့ၩလီၩ့မၩဆၧမၩလၧထံၫယဲၩ့ခးယဲၩ့လဖၪ အီၪဝ့ၫဒၪအၪမၬနီၪလီၫႉ ဆၧဝံဆၧနၭအီၪဝ့ၫ ဒၪလၧ ၅ခွး ၆ခွးဒ့ၭနီၪလီၫႉ ၦၡၩလဖၪယီၩ မွဲလၧဆၧအထၧးအလၧးလဖၪ အီၪအၪမံၩ့အကၠီၩ့ ဘၪစဲၪ့ထၪ့လၧထံၫခးဂူၫဂၩနီၪလီၫႉ ကနၩ့နၩ့နီၪ မွဲလၧဂံၪ့ဒီၪ့ဖၧၩ့ ဆၧလၧၫ့ဆၧဎွ့ၩ လအီၪဘၪ အကၠီၩ့ ဘၪစဲၪ့ထၪ့ မၩဆၧမၩလၧ ၦၡၩအထံၫခးဖၧၩ့ႇ ကနၩ့နၩ့နီၪ မွဲလၧထံၫဂဲးခးဂဲး လဂ့ၩဘၪဒဲ ၦဒိၪၥံၪအဆၧမၩနၧၩ့မၩစၪလဖၪအကၠီၩ့ ဘၪစဲၪ့ထၪ့လၧထံၪခးဖၧၩ့နီၪလီၫႉ ၦၡၩလဖၪနီၪ အ့ၪပ ကအၪ့စၪ့ယိစွါဘဲၫ နၪ့ထၪ့ဘၪအဂံၪ့အဎၪ့ဒဲ အဂံၪ့ဒီၪ့ဖိၪၥံၪကိၭဂၩဒ့ၭနီၪလီၫႉ

လၧၦလဖၪယီၩ အဖၧၩ့ ပဂံၪ့ဒီၪ့ဖိၪၥံၪမွဲကပၫထဲးႇ ပထၧၫ့ဖုထၧၫ့ဝဲၥံၪမွဲကပၫထဲးဆ့နီၪလီၫႉ အဝ့ၫၥံၪလီၩ့ဎွါန့ ကျိၪစ့ၩလဖၪနီၪ မၩဆၧၩ့ထဲၩ့အဂံၪ့ဒီၪ့ဖိၪၥံၪ လကၭဘၪ မၩဆၧၩ့ထဲၩ့မိဆၧအီၪကီၪ့ၥံၪနီၪလီၫႉ ဆၧနီၪအကၠီၩ့ ပဝ့ၫၥံၪလဖၪယီၩပကဘၪအၪ့ကံၩ့ဘၩဆိၪဖၪအ့ၪအဝ့ၫၥံၪအဂး ဒိၪဒိၪအၪအၪ လ့ၬနီၪလီၫႉ” ၥၫ့ခိၪဒိၪ လီၩလၩ့လၬလၩ့ဝ့ၫဒၪ ဘဲၫနီၪအၥိၭနီၪလီၫႉ

မံဆၩဆၧလုထၪ့ဂီၩ့ဝ့ၫကကၠၪ ဆရၫနီကောလားလ့ၩခိၪလ့ၩနါဂီၩ့ မၩကဲၪထၪ့ ဆၧလီၩ လၩ့လၬလၩ့ဆၧ ဆၧထံၪလၩ့ဒီၪလၩ့နီၪလီၫႉ ဆၧထံၪလၩ့ဒီၪလၩ့နီၪ စၭထၪ့လၧလဂီၩ၉နၩရံၫဒဲ ဂီၩ့ခွံၬလၧ ၁၀ခီၫအခံၫ့နီၪလီၫႉ လၧဆၧထံၪလၩ့ဒီၪလၩ့နီၪအဖၧၩ့ ဆၧကၩ့ကၩဎိၭလၩ့ ဘၪထွ့ၫ လၧ ၦဘၪလီၩ့ၥုၭမၩဆၧမၩလၧ ၦဂူၫဂၩအထံၪအခးအဂဲးလဖၪႇ ၦလၧအဘၪထိးအၪ့ဆၫလၩ့ အၥၭအဂဲးလဖၪႇ ၦလၧအဘၪထိးအၪ့မၧၫ့ဆီၪ့အၥၭလၧ ကၠၩဖျးဆၧဖံၭဆၧမၩဖၧၩ့အဂဲးလဖၪ ပၫဝ့ၫဒၪနီၪလီၫႉ