လၧဖျိၩ့ဆၨၩအခၫ့ထံၭၥၫ့ထၧၫ့ဖုဝဲဖျိၩ့ဖိၪနံၫဂၩ (၂)
ထၧၫ့ဖုဝဲထံၩၥိၭၦလၧအဲၪဒိၭခိၭနၪ ၦဖျိၩ့ၡါဖိၪၥံၪဧ့ႇ နံၩလၧအမုၬကိၭဂၩဒ့ၭလါဆံၭနဲၪႉ မုကနွ့ၫယီၩ ၦဖျိၩ့ၡါဖိၪအနိၪ့ဖၧၩ့ ယမိဆုး အဲၪဒိၭလီၩဖ့ၪနဲၪဘၪနၥံၪ ၦဖျိၩ့ၡါဖိၪအခိၪတၩ့နီၪမွဲ ‘လၧဖျိၩ့ဆၨၩအခၫ့ထံၭၥၫ့ ထၧၫ့ဖုဝဲဖျိၩ့ဖိၪနံၫဂၩ’ ၡါဖိၪလၧအအီၪထး လဖၪနီၪလီၫႉ
ထၧၫ့ဖုဝဲမုၪခွၫၥံၪဧ့ႇ ဖူၫထိၭမဲၪဖါလဂၩ မွဲလၥၭမဲၪဘၪထိၬ မံၩ့ဖၭဒိၪနီၪဒဲ လီၩယိထၬထိၭမံၩ့အလးၥံၪဂ့ၩဘၪဆဲၪ့ဂီၩ့ ထိၭမံၩ့ဖၭနီၪ လၧအဝ့ၫဂဲၫန့ထၬအဖၩ့နီၪ ဆ့ၬဝ့ၫလူၬဒၪ အဂဲးလီၫႉ ထိၭမံၩ့ဖၭဒိၪလဒုၩ ဆၫဘိၭ ၡၭအလူဖၭဒိၪ လလံၬလမီဘၪအဖၧၩ့ မွဲဂဲၩနၧၩ့လၧၩ့အ့ၬနီၪလီၫႉ ကထံၪဎး ဖူၫထိၭမဲၪဖါလဂၩ စီၪဝ့ၫ ထိၭမံၩ့ဖၭဒိၪနီၪၥံၫယူၭတၭ ထဲၩ့ထဲၩ့လၧအတဝၫ့ လီၩအ့ၪအဖိၪၥံၪ အလးအကျဲၩ့ဂီၩ့ အၪ့မၧၫ့အဖိၪၥံၪ လ့ၩအၪ့န့ထိၬမံၩ့နီၪလီၫႉ လါနၫ့ လ့ၩထီၩ့အခၫ မွဲလဒၪလၧၩ့ဘၪ ထိၭမံၩ့ဖၭဒိၪနီၪဒဲ ဒၪထးဝ့ၫမွဲ အၥွံၪဒဲ အမဲၪကဘီၩ့လီၫဂီၩ့ ဂဲၫထဲၩ့န့အ့ၪအဖါဖါၥၭဘီၩ့ နီၪလီၫႉ ဖူၫထိၭမဲၪဖါလဂၩ ထိၭမံၩ့ဖၭဒိၪအမဲၪနီၪ ဖိၬလိၬထၪ့ထဲၩ့ ၥံၪ့ခွံနီၪလီၫႉ
ၥံၪ့ခွံယီၩ ဖိၬလိၬဝ့ၫဂီၩ့အခၫ ခွံၪဝ့ၫကထံၪဎး ဖူၫထိၭမဲၪဖါလဂၩ လၩ့ဘၪ့ထဲၩ့ဘဲၫၥၭဘၪ့ ဖိၪလဂၩဒဲဂဲးဘၭ အလၧၫ့အဎွ့ၩနီၪလီၫႉ ဖူၫယီၩ ဖိၬလိၬထၬၥံၪ့ခွံနီၪ မွဲအစီၩ့အမၩ့အီၪအကၠီၩ့တၭ အဝ့ၫကိၭထၪ့ထဲၩ့အမံၩ့လၧ ထိၭမဲၪဖါနီၪလီၫႉ ဖူၫထိၭမဲၪဖါလဂၩ အဝ့ၫအ့ၪမွဲၥိၩ့အၥံၪ့ခွံယီၩ ကိၭကၠၪစွါဘဲၫ ထီးမုဆၫကနံၩယီၩ ကအီၪဒံၭလၧ မုၬမုၬလၩလၩဆီၪ့ဆီၪ့ချဲၫ့ချဲၫ့အကၠီၩ့ ထၧၫ့ဖုဝဲဖျိၩ့လနၩ့နၩ့ နဲၩ့ထၬဝ့ၫဒံၭနီၪလီၫႉ
ဖူၫထိၭမဲၪဖါအဖုခွၫနီၪဘၪကိၭဝ့ၫလၧ ဖူၫစချိၪအဂဲးနီၪႇ ကနံၩနီၪတၭ ဖူၫထိၭမဲၪဖါဒဲ အဖုခွၫနံၫဂၩ အၪ့ဎၬလၩ့ဎိၭဆၧလၧ ကၥုၭအီၪထဲၩ့အလး နးစီၪ့ဒီၭအဂးနီၪလီၫႉ ဖူၫထိၭမဲၪဖါ လီၩဝ့ၫ အလးထယီၩ ပဂဲၫထဲၩ့အီၪအခံၫ့ယံၬယူၭတၭ မွဲဆၧဘဲၫနီၪ ပဘုၪၥံၪ ဆၧထံၭဆၧဘီၩ့ၥံၪလဖၪ မိဂ့ၩလၧၩ့အ့ၬႉ ပကဆုးအီၪဒၪအလးထယီၩစွါဘဲၫ ပဖိၪလံၩၥံၪလၧခဲၫ့အဂး ကဘၪဒၪဎီၩ့ ဆၧကၪဆၧဂဲၩလီၫႉ မွဲဆၧဘဲၫနီၪ ပကဘၪလီၩ့ဎွါလးကျဲၩ့အဂ့ၩအကၠီၩ့ အထၧၫ့ဖုဝဲနံၫဂၩယီၩ အၥၭဘၪလၩ့ဎိၭတၭ လ့ၩစဲၪ့ထၪ့လီၩ့ဎွါလးကျဲၩ့အၥၫ့နီၪလီၫႉ
ထၧၫ့ဖုဝဲထံၩၥိၭဖျိၩ့ဖိၪၥံၪဧ့ႇ ၦၡါဖိၪယီၩ ပကအီၪပထုၬထၬ အလးထယီၩဂီၩ့ ၡါဖိၪလၧ လၧအအီၪထးလဖၪနီၪ လၧခဲၫ့မုနွ့ၫမုၬ ယကဆုးလီၩဖ့ၪနဲၪထဲၩ့ဘၪနၥံၪနဲၪႉ
