Mother Marci Colette ဒဲ Mother Margaret Mary နံၪ့၅၀ ယူၩဘလံၫ

နံၪ့၂၀၂၅နံၪ့ လၩစဲၭတံၫ့ဘၧၫ ၂၉ၥၫ့ လဂီၩ ၆နၩရံၫအခံၫ့နီၪ ဆၧမၩလၩမၩဖၩ့ၡီၩ့ ဒိၩ့ပၥံၫ့ ဆၧအီၪကီၪ့ S.F.X မံၭထၭမုၪ ခိၪနါနံၫဂၩ မွဲဝ့ၫ Mother Marci Colette ဒဲ Mother Margaret Mary ၥံၪ ကဲၪထၪ့ မံၭထၭမုၪ ထၪ့ဘၭ အနံၪ့၅၀ယူၩဘလံၫနီၪလီၫႉ

မၩလၩမၩဖၩ့ဝ့ၫဒၪအလးနီၪ မွဲလၧဒိၩ့ပၥံၫ့ စံၫ့မ့ၫရံၫ မံၭထၭမုၪအၥၭၡါလဖၪအီၪပွံၭ အလး(အိမ်ကြီး)နီၪလီၫႉ ၦလၧအလ့ၩခိၪလ့ၩနါ မံဆၩဆၧလုထၪ့နီၪ မွဲဝ့ၫဒၪလၧ ဒိၩ့ပၥံၫ့ ဆၧအီၪကီၪ့ၥၫ့ခိၪဒိၪ ဟင်နရီမန်းအိုင်ခလိန် ဒဲ ၥၫ့ခၫ၇ဂၩနီၪလီၫႉ

လၧမံဆၩဆၧလုထၪ့အဖၧၩ့ ၥၫ့ခိၪဒိၪလီၩလၩ့လၬလၩ့ဝ့ၫဒၪ “မုကနံၩယီၩ ပကဘၪအၪ့ ဎၬထၪ့ထဲၩ့နီၪ ပကဲၪထၪ့ ၥၫ့မုၥၫ့ခၫ ဒဲ မံၭထၭမုၪ မံၭထၭခွၫလဖၪနီၪမွဲယူၭႉ အကၧၩ့ဒိၪထုၬနီၪ ပကဘၪကဲၪထၪ့ ၥၫ့မုၥၫ့ခၫ ဒဲ မံၭထၭမုၪ မံၭထၭခွၫ လၧအအီၪလၧဆၧအၪ့ကံၩ့ဘၩဆိၪဖၪဂီၩ့ ကမုၬလၩလၧ ဆၧအၪ့ကံၩ့ဘၩဆိၪဖၪအဖၧၩ့အဂးနီၪလီၫႉ ဘဲၫနီၪအၥိၭ ဆၧမၩလိၪဖိၪလၧ ကမိ ကဲၪထၪ့ မံၭထၭမုၪႇခွၫလဖၪဒဲ ၥၫ့မုၥၫ့ခၫလဖၪဆ့ စၭထၪ့လၧအခံၫ့ဘဲၫယီၩ ကဘၪအီၪလၧ ဆၧဘၩဆိၪဖၪ ကဘၪမုၬလၩလၧဆၧဘၩဆိၪဖၪနီၪလီၫႉ ကနံၩယီၩ ဆၧၥၭထိၬပရၧၫ့ဖၧၩ့ ကဆါယွၩ ကိၭထၪ့ စနၥၫ့နအ့လၭအခံၫ့ စနၥၫ့နအ့လၭယီၩ ဖးထၪ့ဝ့ၫဒၪအကၠီၩ့ အၪ့စၪ့ ကဆါယွၩ နမၩၥ့ၪယၫယၧၩဘဲၫၥ့ၪလဲၪနီၪလီၫႉ အနီၪအခၫ ကဆါယွၩစံၭထဲၩ့အဝ့ၫ စဖံလံ လချူၭ ကိၭဒံၭဘၪနၧၩအခံၫ့ နအီၪလၧ ချိၫ့ဒိၩ့အခၪ့ထံၭနီၪ ယဒၪနၧၩလီၫႉ အနီၪအခၫ စနၥၫ့နအ့လၭယီၩ စံၭထဲၩ့ ကဆါယွၩ နၧၩနီၪ နမွဲယွၩအဖိၪခွၫလီၫ ဘနီၪအခၫ ကဆါယွၩယီၩ စံၭထဲၩ့အဝ့ၫ မွဲလၧနဆၧဆူနဲၩအကၠီၩ့ နကဒၪထၪ့ဘၪ ဆၧလၩ့လၭအၪနဲၪ့အယီၩဒံၭလီၫႉ ကဆါယွၩမိစံၭပၧၩနီၪ ဆၧဆူနဲၩနီၪ လၧပဂးမွဲအရ့ၩဒိၪဝ့ၫဒၪဂီၩ့ အ့ၪမွဲပဆူနဲၩကဆါယွၩနီၪ ကဆါယွၩကဖ့ၪနဲၪထၪ့ပၧၩ ဆၧလၩ့လၭအၪမံၩ့နီၪ ပကဒၪဘၪနီၪလီၫႉ”