၂၆ဘျၩ့လဘျၩ့ မုအီၪပွံၭနံၩ ဆၧၥၭထိၬပရၧၫ့ (စလုကၭ (၁၆:၁၉-၃၁)

ၦၥထံၫဒဲ စလၭဇရၧၭ

ၦၥထံၫအီၪဝ့ၫလဂၩတၭ ကီၩ့ၥိၭဝ့ၫလၧ ဆၧဝီၩလုၭဖုၭ ဒဲ ဆၧဘွၩဖျ့ၪလံၬကံၭတၭ မုၬလၩဝ့ၫလၧ ဆၧအၪ့လၨၪအီၩလၨၪ ကိၭမုနံၩမုနၩဒ့ၭဒိၪမၬလီၫႉ တၭၦၡၪ့ဖိၪဘၪဆၧဆၫ အီၪဝ့ၫလၧအဖၧၩ့လး ထၧၫ့ဂၩယၫ အမံၩ့မွဲစလၭဇရၧၭလဂၩနီၪ ၦအီၪက့ၪလၩ့အဝ့ၫလၧ အဝ့ၫနီၪအဖၧၩ့ၥၭ အတရၫ့အခၪ့ထံၭလီၫႉ တၭဆၧမိအၪ့ဘၪအၥၭ လၧၦၥထံၫအၪ့ဆၧအလၩ့ဎွံၪ လၧစပွဲထံၭနီၪ ထွံၪလဖၪဂဲၫအၪ့လဲၪ့အဆၧဆၫ အဖၧၩ့လးၥံၪလီၫႉ ဆၧမၩအၥၭလၧၦၡၪ့ဖိၪနီၪ ၥံၫဝ့ၫတၭ ဆၧအၥီၫ့ၥံၪဆိၬထၪ့ထဲၩ့အဝ့ၫ လၧစအၫဘြဟၫ့အၥၭနၫၡါအလီၩ့လီၫႉ ၦၥထံၫလဂၩနီၪ ၥံၫဝ့ၫဆ့တၭ ဘၪဆၧခုၪ့လၩ့ဘၧၩ့ဝ့ၫလီၫႉ လၧဖျုဖၧၩ့နီၪ ဘၪဆၧၡၪ့နၭနၭလ့ၬတၭ စၪ့ထၪ့အမ့ၬၥၪလၧဖျုဖၧၩ့တၭ ဒၪဘၪစအၫဘြဟၫ့ဒဲ စလၭဇရၧၭအီၪလၧအၥၭနၫၡါအလီၩ့လီၫႉ အဝ့ၫဒၪကိၭထၪ့ဆၧတၭ စံၭဝ့ၫ ဖါအၫဘြဟၫ့ဧ့ ယၫ့ၥုၪ့ယၫ့ၥၭလါယၧၩဆံၭႉ အၪ့မၧၫ့စလၭဇရၧၭ ဘၧၩ့လၩ့အစူၪနိၩ့ထိၭနၫ လၧထံၫကျၩတၭ ဂဲၫမၩၡူၪလၩ့ယဖျ့ၩဆံၭႉ အဂဲးဘဲၫယီၩ ယဘၪဆၧနၭဆၧၡၪ့ လၧမ့ၪခဲၩအဖၧၩ့ယီၩလီၫႉ စအၫဘြဟၫ့စံၭဝ့ၫ ဖိၪခွါဧ့ လၧနမၧၫ့ဒံၭအဆၧၫ့အထီ နဒိၭန့နဆၧဂ့ၩလဖၪတၭ စလၭဇရၧၭဘၪလၧဆၧအၧၩ့လဖၪနီၪ နၪ့ထၪ့ထဲၩ့နဝ့ၫဆံၭႉ အ့ၪမွဲဘိၩ့နဲၪ့ယီၩ အဝ့ၫဒၪလဂၩ အီၪမုၬဘၪယူၭဝ့ၫယူၭႉ တၭနဝ့ၫဒၪ နဘၪဆၧနၭဆၧၡၪ့ယူၭလီၫႉ လၧဆၧယီၩထီးအလူၬအမ့ၬယၫ လၧပၧၩဒဲနၥံၪအဘိၩ့ဆၧၩ့နီၪ ဆၧအီၪက့ၪထၬ ထိၩ့ဖၭဒိၪလဘီၩ့လီၫႉ မၩအၥၭဘဲၫနီၪတၭ ၦအီၪထီးယီၩလဖၪ ဆၧအ့ၪမိလ့ၩစိၩဘၪအၥၭ လၧနၥံၪအအီၪနီၪ လ့ၩဖိးအ့ၬႉ ဒဲၦလၧနၥံၪအအီၪလခီၫနီၪ ဆၧအ့ၪမိဂဲၫဘၪအၥၭ လၧပအီၪလခီၫယီၩတၭ ဂဲၫဖိးဆ့အ့ၬႉ အဝ့ၫဒၪစံၭဝ့ၫ ဖါဧ့ အ့ၪမွဲဘဲၫနီၪတၭ ယအၪ့ကံၩ့အၪ့ယၫနၧၩ လၧနမိအၪ့မၧၫ့အလ့ၩ လၧယဖါအဂံၪ့လီၫႉ အဂဲးဘဲၫယီၩ ယထၧၫ့ဖုဝဲခွၫအီၪယဲဂၩ ဘဲၫၥိၭအမိၥီၪ့ထဲၩ့အဝ့ၫၥံၪ ဘဲၫၥိၭအထီၩ့ဂဲၫဘၪလၧ ဆၧၡၪ့ဆၧနၭဖၭဒိၪအလးယီၩလဂ့ၩလီၫႉ စအၫဘြဟၫ့စံၭအဝ့ၫ ၦလဖၪနီၪ အီၪလၧစမိစ့ၭဒဲမီၪၥံၪလီၫႉ မွဲအခိၭနၪဒၪဝ့ၫ လၧအဝ့ၫၥံၪဆံၭႉ အဝ့ၫဒၪစံၭဝ့ၫ မွဲအ့ၬ ဖါအၫဘြဟၫ့ဧ့ ၦလၧအၥံၫလဂၩဂၩနီၪ အ့ၪဂဲထုၪ့ထဲၩ့ လ့ၩလၧအအီၪတၭ မိနီၫ့ယါလၩ့ထဲၩ့အၥၭလီၫႉ အဝ့ၫဒၪအစံၭအဝ့ၫ အဝ့ၫၥံၪအ့ၪလခိၭနၪဘၪဝ့ၫ လၧစမိစ့ၭဒဲမီၪၥံၪနီၪ ၦလၧအၥံၫလဂၩဂၩအ့ၪဂဲထုၪ့လါနၫ့တၭ နဲၩဝ့ၫဒၪဆ့အ့ၬႉ