ၥၫ့ဎွၩဒိၪ Pope Leo XIV နီၪ ဖ့ၪဂဲးဖ့ၪဘၭ ALS ခရၧၫ့အဂဲး

၂၀၂၅နံၪ့ လၩစဲၭတံၫ့ဘၧၫ၂၀ၥၫ့ ၦၡၩမၩဝ့ၫဒၪ “ALS Walk for Life” ဆၧဂၬဖၭ ဆၧထံၪလၩ့ဒီၪလၩ့အီၪဝ့ၫဒၪလၧ ခးအမ့ၫရံကၫ့ ၡံၫကၫဂိၫဝံးဖၧၩ့နီၪလီၫႉ ဆၧထံၪလၩ့ဒီၪလၩ့နီၪအဂး ၥၫ့ဎွၩဒိၪ ၥိၫ့စိၩဆၧဂၩ့မၧၫ့ဂီၩ့ လၧဆၧဂၩ့မၧၫ့အဖၧၩ့ ၥၫ့ဎွၩဒိၪ Pope Leo XIV နီၪ ဖ့ၪဂဲးဖ့ၪဘၭဘၪALS ခရၧၫ့ဖိၪၥံၪ ဘဲၫယီၩအၥိၭနီၪလီၫႉ

ALS (Amyotrophic Lateral Sclerosis)နီၪ မွဲဝ့ၫဒၪ ခရၧၫ့လၧ အဘၪယိထဲၩ့ခွါထဲၩ့ ခိၪနုၬထီၫ့ဖျီၩ့အဂဲးဆါဝ့ၫဒၪဆၧဆၫဒဲယၪထံၪ့အဂဲးလၩ့ဆါဝ့ၫဒၪ ဆၧဆၫဆါလဖၪနီၪလီၫႉ

ၦလၧအဘၪထိးဆၧဆၫလဖၪယီၩအဂး ၥၫ့ဎွၩဒိၪစံၭဝ့ၫဒၪနီၪ “ၡၩအစၩ့ထံၫနီၪ မွဲလအီၪ က့ၪဘၪအၥၭလၧ ဆၧမၩနၧၩ့ခၫ့ဖျီၪ့အဖၫ့ခိၪဂီၩ့ အီၪက့ၪဒၪအၥၭလၧ ဆၧအဲၪဆၧကွံၩအဖၫ့ခိၪလီၫအဂဲး”

ၦလၧအဘၪယိထဲၩ့ခွါထဲၩ့ဆၧဆၫဆါ ဂံၪ့ဒီၪ့ဖိၪၥံၪလဖၪႇ အထံၩၥိၭလဖၪႇ ဆရၫ ဆရၫမုၪလဖၪနီၪဆ့ ၥၫ့ဎွၩအၪ့အူၭဝ့ၫဒၪဂီၩ့ “နၥံၪအဆၧယိထဲၩ့ခွါထဲၩ့လဖၪ ဒဲဆၧယၫ့ၥၭလဖၪနီၪ လၧၡၩခရၧၫ့အဂး မွဲဆၧဖ့ၪနဲၪအဂ့ၩထုၬလီၫ”အဂဲး ၥၫ့ဎွၩစံၭဝ့ၫဒၪလီၫႉ

ၦအၪ့ဎၬနၪၥ့ၪဆၧလဖၪဒဲ စဲၩ့ယၧၫ့ကိၪ့ၥ့ၪလဖၪနီၪဆ့ ၥၫ့ဎွၩယီၩယူၭယၫ့ဝ့ၫဒဲ စံၭခိးစံၭတၩဝ့ၫအဂဲးႇ ၦအၥံၫဖီၩ့ခွံၬလဖၪအဂး ၦအၥၭအုၭဝ့ၫလဖၪအဂးဆ့ ဆၧၥံၫနီၪ လမွဲဘၪ ဖၧၩ့ၥၭအထုၬဂီၩ့ ဆၧအဲၪဆၧကွံၩနီၪ နၧၩ့ဆၧၫ့ထဲၩ့ဆၧၥံၫန့ဝ့ၫဒၪအဂဲး ၥၫ့ဎွၩဒိၪယီၩ ဖ့ၪဂဲးဖ့ၪဘၭဝ့ၫဒၪ ဘဲၫယီၩၥိၭအဂဲး ပန့ဘၪဆၧပရၧၫ့ ဘဲၫယီၩအၥိၭနီၪလီၫႉ