ၥၭဘၪ့ဒဲဆၧဘိၪ့ဆၧဘၩ

အ့ၪထီၩ့မၬလၧ မုအီၪပွံၭနံၩစွါဘိၩ စထံၫချံၫ့ ဘၪလ့ၩထၪ့ဘၩယွၩလၧအမိမိနီၪ မိလ့ၩဝ့ၫနးဆံၭအ့ၬႉ ၥရိၬဖၧၩ့ ဆၧကယုကစုၩလဖၪနီၪ ကဲၪထၪ့အဝ့ၫအဂး ဆၧကၠၧၫ့ဆၧဘျီၩ့နီၪလီၫႉ လၧၥရိၬဖၧၩ့ ဒၪဘၪကၠၧၩ့ ၦၥၭၡါလဖၪလီၫအကၠီၩ့ “ဆၧဘိၪ့ဘၩထၪ့ယွၩနီၪ ဘၪဆဲၫ့ဒၪလၧ ၦၥၭၡါလဖၪလီၫ” အဝ့ၫစီၪဘၪဘနီၪ  လီၫႉ

ကနံၩတၭ ဆၧထုၪ့ပြၧၩ့ဆၧဖံၭဖျိၪ့အဂး ကဘၪလ့ၩထုၪ့ယိ ဆၧဖံၭဖျိၪ့ ဆၧထံၪလၩ့ဒီၪလၩ့ အီၪ အကၠီၩ့ “မိဧ့ မုကနွ့ၫယီၩနီၪ ယကဘၪလ့ၩထုၪ့ယိ ဆၧဖံၭဖျိၪ့အီၪအကၠီၩ့ ယလ့ၩထၪ့ဘၩယွၩ နၧၩ့လၧၩ့အ့ၬ အီႉ အယီၩနီၪ အရ့ၩဒိၪ မိဧ့ႉ” အဝ့ၫယီၩ စံၭအမိမိဘနီၪလီၫႉ အနီၪဘိၭ “ဖိၪခွၫဧ့ ၥရိၬဖၧၩ့ ဖ့ၪလၫ့အ့ၪပၧၩ ဂဲးဘၭလဖၪႇ ဆၧကိၪ့ဘၪကိၪ့ၥ့ၪလဖၪ ဒဲ ဆၧဆိၪဂ့ၩဆိၪဘွၩလဖၪနီၪ လၧဆၧထုၪ့ဆၧဖံၭဖျိၪ့အဂး လကၭ ဘၪ လၧပဆၧၥၭမၧၫ့အဂး မွဲအရ့ၩဎိၩဆ့နဲၪ” အမိမိနီၪ စံၭထဲၩ့အဝ့ၫဘနီၪလါနၫ့ အဝ့ၫယီၩ မွဲလခိၭနၪဘၪ အမိဂီၩ့ မုကနွ့ၫနီၪ လ့ၩထၪ့ဘၩယွၩလၧၩ့အ့ၬႉ

လါနၫ့ လၩ့ဘူၭဆၧထုၪ့ပြၧၩ့ ဆၧဖံၭဖျိၪ့ကဆံၭ စထံၫချံၫ့အၥၭဂဲၫခိထၪ့ကဆံၭနီၪလီၫႉ ဆၧပြၧၩ့က ဘျၩ့ယီၩ မွဲကထံၪလၩ့ဒီၪလၩ့အ့ၪအဝ့ၫ အထီလၧယၫအကၠီၩ့ အဝ့ၫခဲၫ့ကံၭ ကမၩဘၪ ဆၧဘၪမၪနီၪလီၫႉ ဆၧပြၧၩ့ စၭထၪ့ဝ့ၫကနံၩနီၪ အဝ့ၫယီၩဖီၪ့ဆၧဖံၭဖျိၪ့အထီ အစူၪဝၭထိၬဂီၩ့ ကွ့ၩအခၫဆ့ အခၪ့လဖၪနီၪ ဎၧၫ့ နၭမၬလ့ၬအဂဲး ၥ့ၪယၫလၩ့ဘၪအၥၭလီၫႉ လါနၫ့ထုၪ့ဒၪဆၧဖံၭဖျိၪ့ဘနီၪလီၫႉ အဝ့ၫကဘၪထုၪ့ထီ ဆၧဖံၭ ဖျိၪ့ လခဲၫ့ထုၬကဖျိၪ့အခံၫ့ အဝ့ၫယီၩ နၪ့ထၪ့ထဲၩ့ လၧၥရိၬဖၧၩ့ ၦၥၭၡါလဖၪ လီၩဝ့ၫဒၪ “ဆၧၥၭဂုးဒဲ ဆၧဆူနဲၩ” အဂဲးလဖၪနီၪလီၫႉ အနီၪအခၫ အဝ့ၫယီၩ ဘံၪ့လၩ့အမ့ၬၥၪဂီၩ့ အီၪက့ၪဂုးထဲၩ့အၥၭ ကဆိဖိၪ အခၫ အဝ့ၫအၥၭၡူၪလၩ့ဘၩလၩ့ထဲၩ့အဂဲး ၥ့ၪယၫထၪ့ဝ့ၫလၧ ဆၧလၩ့ဆၫ့လၩ့မဲၩဖၧၩ့နီၪလီၫႉ

ဂီၩ့နီၪ အဝ့ၫယီၩ ထုၪ့ဆၧဖံၭဖျိၪ့နီၪကကၠၪ နုၬလီၩ့ကထံၪလီၫႉ အနီၪဘိၭအဝ့ၫၥံၪအခရၧၫ့နီၪ န့ဘၪ ခိၪဖၭနီၪလီၫႉ ဆၧပြၧၩ့ဂီၩ့ဝ့ၫအခၫ အဝ့ၫယီၩ လ့ၩဖီၪ့ဝၭထၬ အမိမိနီၪဂီၩ့ “မိနလီၩနီၪမွဲ ဆၧဘိၪ့ဆၧဘၩ ကမံၩ့နီၪ မွဲကၠၧၩ့ၦၥၭၡါလဖၪအဂးလီၫအ့ၬႉ  ပၥၭဘၪ့လဖၪအဂးဆ့ဖ့ၪ လၫ့ပၧၩ ဆၧၥၭဂုးဒဲ ဆၧၥၭမုၬ ၥၭၡူၪမွဲန့ဆ့မိဧ့ႉ”  စံၭအမိ ဘနီၪလီၫႉ

အနီၪဂီၩ့လၧခဲၫ့နီၪ စထံၫချံၫ့ကဂၩ ဆၧဖံၭဖျိၪ့အဂးမွဲဂ့ၩႇ အဆၧၥၭမၧၫ့အဂးမွဲဂ့ၩႇ ကလ့ၩခိၪလ့ၩနါ ၦၡၩအဂးမွဲဂ့ၩ လ့ၩထၪ့ဘၩယွၩ မုကိနွ့ၫဂီၩ့ လ့ၩအၪ့န့ထဲၩ့ဂဲးဘၭ, လ့ၩအၪ့န့ထဲၩ့ ဆၧၥၭဂုး ဒဲ ဆၧကိၪ့ဘၪ ကိၪ့ၥ့ၪလၧယွၩအီၪ လၧဆၧၥုၪ့ဎွံၪၥၭယီၫအဖၧၩ့နီၪလီၫႉ