ဆၧရွံခီၫ့ဆၧအီၪကီၪ့ ယ့ၫၡူၬအၥၭဆံၫ့ဎံၪၥရိၬ ယူၩဘလံၫ

နံၪ့၂၀၂၅နံၪ့ လၩစဲၭတံၫ့ဘၧၫ ၂၁ၥၫ့လဂီၩ ၇နၩရံၫအခံၫ့နီၪ ဆၧမၩလၩမၩဖၩ့ၡီၩ့ ဆၧရွံခီၫ့ ဆၧအီၪကီၪ့ ယ့ၫၡူၬအၥၭဆံၫ့ဎံၪၥရိၬ အၥၭအီၪထၪ့ဘၭ ၁၇၅နံၪ့ ယူၩဘလံၫ မံဆၩဆၧလုထၪ့ နီၪလီၫႉ ၦလၧအလ့ၩခိၪလ့ၩနါ မံဆၩဆၧလုထၪ့နီၪ မွဲလၧဒိၩ့ပၥံၫ့ဆၧအီၪကီၪ့ ၥၫ့ခိၪဒိၪ Bp.Henry မၩ့အဲၪချံၫ့နီၪလီၫႉ

မံဆၩလချူၭစၭထၪ့ဒံၭဘၪအခံၫ့နီၪ မၩ့James ဖီလၩ့ဖ့ၪနဲၪဘၪ ၥရိၬအဖးဖီၩ့အဂဲး လဖၪနီၪလီၫႉ လၧမံဆၩဆၧလုထၪ့ဖၧၩ့ ၥၫ့ခိၪဒိၪ မၩ့အဲၪချံၫ့ လီၩလၩ့လၬလၩ့ဝ့ၫဒၪ “နၥံၪဝ့ၫယီၩ နၥံၪလီၩ့ဖိၬကဆါနံၫဂၩအခဲၫ့န့အ့ၬႉ ဆၧအယီၩ ကဆါယွၩမိစံၭဝ့ၫဒၪ ကဆါနံၫဂၩနီၪႇ အကဂၩ နီၪ မွဲလၧဂၪ့ခိၪဆၧထူၭဆၧလၧၫ့ဒဲ အကဂၩနီၪမွဲလၧ ကဆါယွၩနီၪလီၫႉ ပစံၭဝ့ၫလၧ ဂၪ့ခိၪအဆၧထူၭဆၧလၧၫ့လဖၪနီၪ မွဲလဂုးခၧၫ့ဘၪလါနၫ့ ပကဲၪၦၡၩလဖၪယီၩ မွဲပလီၩ့ဖိၬဒၪ ဂၪ့ခိၪအဆၧလဖၪအခဲၫ့နီၪလီၫႉ ဆၧအယီၩ လမွဲဘၪဖၧၩ့ၥၭအတီၩအလီၩ့နီၪလီၫႉ ဆၧနီၪအ ကၠီၩ့ ပဆၧၥၭမၧၫ့အဖၧၩ့ အတီၩအဘၪထုၬ ဆၧရွံနီၪ မွဲလၧပကဘၪရွံထၪ့ကဆါယွၩ ဒဲ ပအီၪမၧၫ့ၥၭလၧ ဆၧဘိၪ့ဆၧဘၩအဖၧၩ့နီၪလီၫႉ ပကဘၪအီၪမၧၫ့ပၥၭလၧ ဆၧဆူနဲၩအဖၧၩ့ အဂဲး ကနံၩယီၩ ဆၧၥၭထိၬပရၧၫ့ယီၩ ဖ့ၪပၧၩဆၧထုၪ့ၥုၪ့ထုၪ့ၥၭ ဂ့ၩဂ့ၩဘၪဘၪနီၪလီၫႉ ၦအတီၩ လီၩ့လၧဆၧဆံၭခိၬဖိၪလဖၪနီၪ ဆၧဖၭဒိၪလဖၪအဖၫ့ခိၪဆ့ မွဲတီၩလီၩ့ဆ့လီၫႉ ၦလၧလတီၩလီၩ့ ဘၪလၧ ဆၧဆံၭခိၬဖိၪလဖၪအဖၫ့ခိၪနီၪ ဆၧဖၭဒိၪလဖၪအဖၫ့ခိၪဆ့ မွဲတီၩလီၩ့န့အ့ၬႉ မုကနံၩယီၩ ၁၇၅နံၪ့ထၪဘၭ ၥရိၬအယူၩဘလံၫယီၩ လၧပဆၧၥၭမၧၫ့ဖၧၩ့ ပအီၪက့ၪဆိၫဂုနီၪ မန့လဲၪႉ ပကဘၪအီၪက့ၪဆိၫဂုကဆါယွၩဒဲ ပကဘၪဆူနဲၩယွၩနီၪလီၫႉ ပကအီၪမၧၫ့ပၥၭလၧ ဆၧအၪ့ကံၩ့ဘၩဆိၪဖၪမုကိနံၩႇ ပကအီၪမၧၫ့ပၥၭလၧ ဆၧဘိၪ့ဆၧဘၩဖၧၩ့မၬ ကမွဲဖၧၩ့ၥၭ အတီၩနီၪလီၫႉ ၦလၧအဂဲၫထဲၩ့ ဖ့ၪလၫ့ထးအ့ၪပၧၩ ဆၧန့ၥၫလၧအမွဲ ဆၧဆူနဲၩဒဲၥရိၬယီၩ လဖၪမွဲဝ့ၫဒၪ ဖျိၩ့ဖျိၩ့အိၩ ၥၫ့မုၥၫ့ခၫၥံၪလဖၪ ပဖံၫဖူၫၥၭၡါလဖၪအဂး ပကဆုးထဲၩ့ အၪ့ကံၩ့ဘၩ ဆိၪဖၪကၠၭအ့ၪအဝ့ၫၥံၪအဂးလါဆံၭႉ”အဂဲး ၥၫ့ခိၪဒိၪ ဖ့ၪဂဲးဖ့ၪဘၭ အၥိၪဖိၪၥံၪဘဲၫယီၩအၥိၭနီၪ လီၫႉ

နးအဲၪဖီၫဘွၩ