လၧဖျိၩ့ဆၨၩအခၫ့ထံၭၥၫ့ထၧၫ့ဖုဝဲဖျိၩ့ဖိၪနံၫဂၩ (၁)

ထၧၫ့ဖုဝဲထံၩၥိၭၦလၧအဲၪဒိၭခိၭနၪ ၦဖျိၩ့ၡါဖိၪၥံၪဧ့ႇ နံၩလၧအမုၬကိၭဂၩဒ့ၭလါဆံၭနဲၪႉ  မုကနွ့ၫယီၩ ၦဖျိၩ့ၡါဖိၪအနိၪ့ဖၧၩ့ ယမိအဲၪဒိၭလီၩဖ့ၪနဲၪဘၪနၥံၪ ၦဖျိၩ့ၡါဖိၪအခိၪတၩ့နီၪမွဲ ‘လၧဖျိၩ့ဆၨၩအခၫ့ထံၭၥၫ့ ထၧၫ့ဖုဝဲဖျိၩ့ဖိၪနံၫဂၩ’ ၡါဖိၪနီၪလီၫႉ

လၧဖျိၩ့ဖျိၩ့အိၩ ပထၧၫ့ဖုဝဲဖျိၩ့ဖိၪအီၪဝ့ၫနံၫဂၩတၭ အခံၫ့ဘၪအခၫ အဝ့ၫၥံၪထၪ့အီၪဎုၬကၠၭဝ့ၫလၧ အဝ့ၫၥံၪအဆၧအဲၪမုၪ ၥံၪနီၪလီၫႉ အထၧၫ့ဖုဝဲနံၫဂၩယီၩ ထၪ့အီၪဎုၬဂီၩ့ အခံၫ့ယံၬထၪ့အခၫ အဖိၪၥံၪအီၪအၪထၪ့တၭ ကဲၪ့ထၪ့ ဂံၪ့ဒီၪ့ဖၭဒိၪ နံၫဖျိၪ့လီၫႉ အဝ့ၫအဂံၪ့ဒီၪ့ၥံၪယီၩ မၩအၪ့ဖံၬအၪ့မွဲ ဎုၭအဆၧမၩလီၫႉ အဂံၪ့ဒီၪ့နံၫဒီၪ့ယီၩ ကဒီၪ့နီၪ ဖူၫထိၬမဲၪဖါအဖိၪၥံၪဒဲ ကဒီၪ့နီၪမွဲဝ့ၫဒၪ ဖူၫစချိၪအဖိၪၥံၪနီၪလီၫႉ ဘၪနီၫလဲၪ ဘၪကိၭဝ့ၫ ဘဲၫယီၩၥိၭနီၪ အဝ့ၫၥံၪအဂံၪ့ဒီၪ့နီၪ ၥုၪ့အၪ့ ဎုၭႇ ဘုၪ့ဒဲ ဆၧအထံၭၥံၪလၧပအၪ့န့ အဂူၫဂၩၥံၪဒံၭနီၪလီၫႉ အဝ့ၫၥံၪအဂံၪ့ဒီၪ့နီၪ အီၪလၧ ဆၧယံၩဆၧၡီၩ့ဒဲ ဆၧအဲၪကွံၩလိၬၥၭအဖၧၩ့တၭ ဖူၫထိၬမဲၪဖါဒဲ ဖူၫစချိၪ မံၫၥုၪ့မံၫၥၭ နီၪလီၫႉ

ကနံၩနီၪတၭ လၧဆၧလယိလါဘၪအဖၧၩ့ ဖူၫထိၬမဲၪဖါအဖိၪၥံၪအဎုၭဖၧၩ့နီၪ ထိၬမံၩ့ဖၭဒိၪကဒုၩဂဲၫအၪ့ဘုၪ့ဂီၩ့ မၩဂၭဂီၩ့ ခွံၬဝ့ၫထီးအလူၬလီၫႉ ဖူၫထိၬမဲၪဖါအဖိၪၥံၪလဖၪ ဂဲၫဒၪဝ့ၫဂီၩ့ ထိၬမံၩ့နီၪ မွဲနၪ့စဲၪ့လၫ့ဝ့ၫလန့ဘၪတၭ ထဲၩ့လီၩအ့ၪအဖါဖါ ၥၭဘီၩ့နီၪလီၫႉ ဖူၫထိၬမဲၪဖါလဂၩ နါဂၧၫ့ဆၧပရၧၫ့ယီၩအခၫ ၥၭထၪ့တၭ အၪ့န့ထၪ့ဖၩ့ကဘီၩ့ဂီၩ့ ဂဲၫစဲၪ့လၫ့လီၩ့ဎွါထိၬမံၩ့ဖၭဒိၪနီၪလီၫႉ ဖူၫထိၬမဲၪဖါလဂၩ လီၩဎွါ ထိၬမံၩ့ဖၭဒိၪနီၪ ခိၪလီၩ့ကဖျိၪ့ဂီၩ့ကဖျီၪ့ လၧခဲၫ့ထုၬ လၧခိၪလီၩ့ကဖျိၪ့ကခၪ့ထံၭနီၪ ဒၪဘၪ ထိၬမံၩ့ဖၭဒိၪမၩထၬအလးလၧ ၥံၪ့လၪၥံၪနၪ့ၥံၪနီၪလီၫႉ ထၧၫ့ဖုဝဲမုၪခွၫၥံၪဧ့ ထိၬမံၩ့မၩထၬအလးနီၪ လၩ့ၥၭမဲၪအၪမၬလီၫစွါဘဲၫႉ ထိၬမံၩ့ဖၭဒိၪအလးနီၪ ဘဲၫၦၡၩဂဲၫထၪ့ ဒုၪဒၩအဝ့ၫလန့ဘၪအဂး ဖိၬလိၬထၬဝ့ၫလၧ ၥံၪ့ဖၭဒိၪၥံၪ လိးဖၭဒိၪၥံၪလီၫစွါဘဲၫႉ

ထၧၫ့ဖုဝဲထံၩၥိၭဖျိၩ့ဖိၪၥံၪဧ့ႇ ၦၡါဖိၪယီၩ ပကအီၪပထုၬထၬ အလးထယီၩဂီၩ့ ၡါဖိၪလၧ လၧအအီၪထးလဖၪနီၪ လၧခဲၫ့မုနွ့ၫမုၬ ယကဆုးလီၩဖ့ၪနဲၪထဲၩ့ဘၪနၥံၪနဲၪႉ