ၦဆံၫ့ဎံၪ Peter Faber, SJ အဂဲး
လၧဎြံၬဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ မံၩ့ဎိၩၥၪဖျီၪမုခွၫလၧအအီၪအနိၪ့ အဆၧရၩလၩ့ဖၧၩ့ မုကနံၩယီၩ ယအဲၪဒိၭ ရၩလၩ့န့အ့ၪဘၪနၥံၪနီၪ မွဲဝ့ၫဒၪ ၦဆံၫ့ဎံၪ Peter Faber, SJ အဂဲး အကၠီၩ့နီၪလီၫႉ ၦဆံၫ့ဎံၪ Peter Faber ယီၩ မွဲဝ့ၫဒၪ ခးပၠ့ၫၥ့ၭ ဖိၪကဂၩနီၪလီၫႉ လကၭဒ့ၭဘၪ မွဲဝ့ၫဒၪ Jesuit ၥၫ့ခၫကပၩနီၪလီၫႉ ၦဆံၫ့ဎံၪ Peter Faber ယီၩ ဆၧဖ့ၪကိၪ့ ဎိၩဒိၪအၪမၬဒ့ၭႇ လကၭဒ့ၭဘၪ အဝ့ၫအဆၧလူၬဆၧချဲၩ့နီၪ ဖူၬလူၭကူၭအီၪအၪမၬဒ့ၭနီၪလီၫႉ ဆၧနီၪအကၠီၩ့ ခး Germani, ခး Potugal, ဒဲ ခး Spain ဎြံၬဖိၪၥံၪႇ ၥၫ့ခၫၥံၪဒဲ ၦဎွၩဖိၪၥံၪလဖၪနီၪ ဘၪဂဲအၪ့န့ ဆၧဖ့ၪကိၪ့လၧ အဝ့ၫအီၪနီၪလီၫႉ
အဝ့ၫဘၪလ့ၩမၩ ၥၫထနၫဆၧမၩအလးနီၪ ယဲၩအၪမၬဒ့ၭ လါနၫ့ဂ့ၩ ဘၪလ့ၩဎၬဖၬလၧအခၫ့နီၪလီၫႉ အဝ့ၫလ့ၩမၩ ၥၫထနၫဆၧမၩအခံၫ့ လီၩဎြံၬဖိၪၥံၪ ဆၧချဲၩ့ကမံၩ့နီၪလီၫႉ နၥံၪကဘၪကဲၪ ကဆါဎြံၬ အဖိၪမုၪဖိၪခွၫနီၪလီၫႉ ၦဆံၫ့ဎံၪ Peter Faber ယီၩကလ့ၩမၩ ၥၫထနၫဆၧမၩအဂး လ့ၩဝ့ၫအခံၫ့နီၪ လၧဖၧၩ့ၥၭထၧၫ့ဘီၩ့ယၫ ကယဲဒၪၦၡၩကိၭဂၩႇ ကယဲၥၫဒၪဝံးၥံၪႇ တဝၫ့ၥံၪလဖၪအဂး အဝ့ၫ ဘၩဆိၪဖၪန့ကိကၠၪနီၪလီၫႉ အဝ့ၫမၩၥၫထနၫဆၧမၩ ဂ့ၩဂ့ၩဘၪဘၪဂီၩ့ အၥၭအီၪ ၄၀ နီၪၥံၫဖီၩ့ခွံၬဝ့ၫဒၪလၧ ဝံး Roma နီၪလီၫႉ နံၪ့ ၂၀၁၃ နံၪ့နီၪ ၥၫ့ဎွၩ ဖရၫ့စ့ၭ ရွံထၪ့ အဝ့ၫၦဆံၫ့ဎံၪနီၪ အကၠီၩ့ ယရၩလၩ့န့အ့ၪဘၪနၥံၪလၧ ဆၧအဲၪဆၧကွံၩ ဎိၩဒိၪဖၧၩ့နီၪလီၫႉ မွဲနၥံၪလၧၫ့ဎွ့ၩဝ့ၫဒၪလၧ ကဆါယွၩ အဆၧအဲၪဆၧကွံၩလါဆံၭႉ
