ၥၭဘၪ့ဒဲ ဂၪ့ခိၪနဲၩ့ဎီၩ့ (၂) 

လၧဖျိၩ့ဖျိၩ့အိၩ ဖံၫဖူၫၥံၪလဖၪ အီၪလၧဆၧမံၫ့ၥုၪ့မံၫ့ၥၭၥ့ၪအကၠီၩ့ ဂၪ့ခိၪနဲၩ့ဎီၩ့နးဆ့ ဂၭဂီၩ့ဂၭစၪထၪ့နၭနၭ လအီၪဘၪလီၫႉ အထီဘဲၫယီၩ ၦခမျၧးၥံၪလဖၪ မွဲဆၧမံၫ့ၥုၪ့မံၫ့ၥၭအီၪလၧၩ့အ့ၬဂီၩ့ ၥၭလိဖၭဂဲၫကဲၪထၪ့ အၪမၬနီၪလီၫႉ အဝ့ၫၥံၪ အဆၧၥၭလိဖၭအကၠီၩ့ ထံၫႇ ဖံၬႇ ၡိၬႇ ခိၪလီၩ့ႇ ဆၧဖိၪဆၧဎါၥံၪဒဲ ဂၪ့ခိၪအခၪ့ထံၭခၪ့ဎၧၩ့လဖၪ ဂဲၫဂၭဂီၩ့ဂၭစၪထၪ့ နၬမၬယူၭနီၪလီၫႉ လၧနီၪကဆၫ့ ကဲၪထၪ့ဆၧလၩ့အၪ့ယိၫလၧ အမွဲဝ့ၫ ခိဆၧၩ့ချံၫ့အၪ့ လဲၩ့ထၪ့အၥၭဂီၩ့ လံၩမုလဖုၬဂဲၫႇ ထံၫဎိၩလၩ့ ကဲၪထၪ့ဆူၫနၫမံၫႇ ဆၧခိဆီၪ့ထၪ့ႇ ထံၫၡၩနီၫ့ၡၩႇ ဖံၬခုလၩ့ႇ မ့ၪခိၪလီၩ့ဖိးဖၭဒဲ လံၩအထၧၫ့ ၥၭလိၪၥၭလံၬထၪ့နီၪလီၫႉ ဆၧအဂဲးအဖးလဖၪယီၩ ပကဒၪဘၪ ဆၧပရၧၫ့ခိၪမၪခိၪမၪ လၧ ထံၫဂူၫဂၩခးဂူၫဂၩဆၧ ပရၧၫ့ဖၧၩ့ နီၪလီၫႉ

လၧခီၩ့ခီၩ့အိၩနီၪ ပခးပယၩ့ဖိၪၥံၪ ပဘၪဒၪ ၦဂူၫဂၩအထံၫခးၥံၪ ဘၪဒၪဎီၩ့ဆၧၫ့ယၫ ဆၧလၩ့အၪ့ယိၫၥံၪနီၪ ပၥၭမုၬအ့ၬ လါနၫ့ အထီဘဲၫယီၩ ခးပယၩ့နးဆ့ နဲၩ့ဎီၩ့ဂၭဂီၩ့ဂၭစၪထၪ့ဂီၩ့ ပဘၪထိး ဂၪ့ခိၪနဲၩ့ဎီၩ့ အဆၧလၩ့အၪ့ယိၫယူၭနီၪလီၫႉ အနၭထုၬနီၪဘိၭ ကဲၪထၪ့လၧ ၂၀၀၈နံၪ့ဒၪအိၩ နၫဂ့ၭလံၩမုလဖုၬနီၪလီၫႉ နၫဂ့ၭလံၩမုလဖုၬအကၠီၩ့ တခိၩ့ခးဒီၪ့ဒဲ ဧယၫဝတံၫခးဒီၪ့ဖၧၩ့ ၦၡၩဘၪၥံၫ ကအီၪဖိၬဘိၭ ကကုၬလံလၬဘျဲၪလီၫႉ အၪဒၪဆၧ ၦၡၩၥံၪ အဂံၪ့အဎၪ့အီၪလၧၩ့အ့ၬ အထီလၧယၫဘၪဂၭဂီၩ့ဂၭစၪထၪ့နီၪလီၫႉ လၧထံၫခးအဂး ကဲၪထၪ့ ဆၧဘၪထံၭဆၫ ဎိၩဒိၪလီၫႉ နၫဂ့ၭ လံၩမုလဖုၬနီၪ ဘဲၫယီၩ ဖီၩ့ခွံၬဝ့ၫအီၪအနံၪ့ ကဆံၫဘျဲၪယူၭလါနၫ့ ၦလၧဘၪထိးထၬ လံၩမုလဖုၬယီၩလဖၪ ထီးထီၩ့ဘဲၫယီၩ မွဲအဆၧဆၫလဘျၪဒံၭဘၪနီၪလီၫႉ အ့ၪမွဲ ဆၧဆၧၩ့ၥံၪ လံၩၥံၪဂဲၫလၩ့စွါဘဲၫ ဘၪၥၭမဲၪဆၧဘဲၫဒံၭနီၪလီၫႉ