ၦဖျိၩ့ဆၨၩဖိၪၥံၪ ဂဲၫၥုၭအီၪထဲၩ့ လၧခးအ့ၩၡၩအဂဲး (၁)

ဖျိၩ့ဆၨၩၥံၪနီၪ အီၪထီၩ့ကၠၭလၧ ခးအ့ၩၡၩဖၧၩ့ ခီၫလၧ ထီးအထီ (ကြေးခေတ်) အိၩယူၭနီၪလီၫႉ ဘၪနီၫလဲၪစွါဘဲၫ ၦဖျိၩ့ကျိၪနီၪ မွဲဖျိၩ့အဆၧးဎံၫဆၧးလၩ ဆၧနဲၪ့ကမံၩ့နီၪလီၫႉ ၦဖျိၩ့ဆၨၩအဆၧအူၪဆၧဒံၩ့ကမံၩ့မွဲဝ့ၫ ဖျိၩ့ကျိၪနီၪ ဖျီၪထၪ့ဝ့ၫဂီၩ့ ဂဲၫထဲၩ့ၥိၩ့ထၪ့ထၬဝ့ၫခီၫလၧ ဖီၩ့ခွံၬနံၪ့ (၃၀၀၀) ဘျဲၪအိၩ ဆၨၩအဆၧဆၧးဎံၫဆၧးလၩ ဆၧကမံၩ့နီၪလီၫႉ ဖးဖီၩ့ကိၪ့ၥ့ၪလဖၪ လီၩ့ထၬဝ့ၫ မိၫဂိၫဆၨၩဆၬ ဖျိၩ့ဆၨၩလဖၪနီၪ ဂဲၫထီၩ့လၧ ခးအ့ၩၡၩခီၫလၧ လိးထီ (ကျောက်ခေတ်) ကလူၬထီအခံၫ့နီၪလီၫႉ မိဂိၫ ဆၨၩဆၬဖိၪ ဖျိၩ့ဆၨၩလဖၪ စၭထၪ့ ဂဲၫဆုးၥုၭအီၪအၥၭ လၧခးအ့ၩၡၩကျၩ မွဲဝ့ၫ မိၫဂိၫလံၩယၩခိၪလီၩ့လးကျဲၩ့နီၪလီၫႉ အလးနီၪ ခိဆၧၩ့ချံၪ့ အၪ့လဲၩ့ထၪ့အၥၭမွဲဂ့ၩႇ ၡၩအဆၧဝံဆၧနၭဂဲၫအၪထၪ့မွဲဂ့ၩႇ ဆၨၩဆၬဖိၪၥံၪအဂူၫဂၩ မၩနၧၩ့မၩစၪအဝ့ၫၥံၪမွဲဂ့ၩႇ ဆၧအၪ့ဆၧအီၩ ဂဲၫလၩ့ၡၩ ထၪ့မွဲဂ့ၩတၭ ဂဲၫထဲၩ့ၥုၭအီၪအၥၭလၧ ဖံၬဂ့ၩထံၫဎံၫအလးကဆံၭကဆံၭတၭ ပကလီၩ့လၧပယၩ့ခီၫနီၪဘိၭ (ရေကြည်ရာမြက်နုရာ) ဂီၩ့ လၧမိၫဂိၫလံၩယၩ ခိၪလီၩ့လးကျဲၩ့ကဆၫ့ ဂဲၫထီၩ့စိၩ တံဘဲၭထံၫခးနီၪလီၫႉ လၧခဲၫ့ ဖျိၩ့ဆၨၩၥံၪနီၪ ထီးလၧ တံဘဲၭကဆၫ့ ဆုးၥုၭထဲၩ့အၥၭ ထီၩ့လၧ ယူၫနၫ့လးကျဲၩ့နီၪလီၫႉ

ထၧၫ့ဖုဝဲမုၪခွၫၥံၪဧ့ႇ ၦဖျိၩ့ဆၨၩၥံၪနီၪ ဂဲၫထဲၩ့ၥုၭအီၪအၥၭ ကဆၫ့ဘၪကဆၫ့တၭ အီၪလၧ ခးတရူၭ ယၫ့စံၫကၠၫ့ ထံၫချိၬဂုၬဒၩႇ ဟွမ်ဟို ထံၫချိၬဂုၭဒၩႇ စင်ကျန် ထံၫချိၬဂုၭဒၩႇ ကောင်းတုံ ထံၫချိၬဂုၭဒၩၥံၪနီၪ ခၪ့ဂၬဝ့ၫဂီၩ့ ဂဲၫထီၩ့ကၠၭလၧ ယူၫနၫ့လးကျဲၩ့နီၪလီၫႉ ၦဖျိၩ့ဆၨၩအနိၪ့တၧၩ့ယါလီၩ့ပၫဝ့ၫ မုဂိးခွံၫဘီၩ့နီၪ ဖျိၩ့ဆၨၩဖိၪၥံၪအီၪလၧ ခးတရူၭအထီ နဲၪဖျီၪ့ထၪ့ဝ့ၫဒၪ ထံၫချိၬဂုၭဒၩ လံဘီၩ့နီၪဂီၩ့ အီၪထးမုးဂိး (၅) ဒုၩနီၪ မွဲ မဲနမ် ထံၫချိၬဂုၭဒၩႇ မဲခီၫထံၫချိၬဂုၭဒၩႇ စစ်တောင်း ထံၫချိၬဂုၭဒၩႇ ၥၫ့လွ့ၫထံၫချိၬဂုၭဒၩဒဲ အံၫယၫဝတံၫ ထံၫချိၬဂုၭဒၩနီၪလီၫႉ

ခးတရူၭလံၩခံၫကကဲၩ့ခီၫ နီၪ ထံၫဆ့ၬမ့ၬယွၩ ဆၧကိၭလၧ ပယၩ့ခီၫ ‘ရေစီးသဲမျော’ လးကျဲၩ့အီၪတၭ အဝ့ၫနီၪ အီၪလၧ ယၫ့စံၫကၠၫ့ထံၫခံၫလးကျဲၩ့အကၠီၩ့ ဆၧလီၩ့ထၬအီၪနီၪလီၫႉ ဆၧလၧထံၫဆ့ၭမ့ၬယွၩနီၪ ဂဲၫထဲၩ့ခၪ့ဂၭထၬဝ့ၫအကၠီၩ့ပၥ့ၪယၫဘၪလၧ ဖျိၩ့ထၩၥံၪ လံၬလဲၥံၪအဖၧၩ့နီၪလီၫႉ ၦကိၪ့ၥ့ၪလနၩ့နၩ့နီၪဘိၭ နဲၩ့ထၬဝ့ၫဒံၭလၧ ထံၫဆ့ၭမ့ၬယွၩနီၪ ၦဖျိၩ့ဆၨၩဖိၪၥံၪ အီၪဘဲၫယီၩဒံၭနီၪလီၫႉ