ဒိၩ့ပၥံၫ့ဆၧအီၪကီၪ့ၥၫ့ခိၪဒိၪ ဟင်နရီမန်းအိုင်ခလိန်ကဲၪထၪ့ၥၫ့ခိၪထၪ့ဘၭ၂နံၪ့ဘိၪ့မုနံၩ

နံၪ့၂၀၂၅နံၪ့ လၩအီဂၧၭ၂၅ၥၫ့နီၪ မွဲဝ့ၫဒၪလၧ ဒိၩ့ပၥံၫ့ဆၧအီၪကီၪ့ၥၫ့ခိၪဒိၪ ဟင်နရီ မန်းအိုင်ခလိန် ကဲၪထၪ့ၥၫ့ခိၪထၪ့ဘၭ၂နံၪ့ဘိၪ့မုနံၩနီၪလီၫႉ ဆၧနီၪအကၠီၩ့ ၦၡၩမၩလၩမၩဖၩ့ထဲၩ့ ဘိၪ့မုနံၩယီၩလၧ ဒိၩ့ပၥံၫ့ St.Peter ကၥံၫဒြဲၫၥရိၬလးဝၩ့ဖၧၩ့နီၪလီၫႉ မုနံၩအနီၪမွဲဒံၭလၧ ဒိၩ့ပၥံၫ့ ဆၧအီၪကီၪ့ ၥၫ့ခၫ၃ဂၩမွဲဝ့ၫဒၪ Fr.ဂျွန်ဘောစကိုဘိုကို, Fr.ဆေလ်ဘက်စတယ်ခင်မောင် အေး ဒဲ Fr.ကွန်စတန်တိုင်း ဂေါ်သောဦး ၥံၪ ကဲၪထၪ့ဘိၪ့ခိၪ ၥၫ့ခၫ ထၪ့ဘၭ ၂၉နံၪ့ မုနံၩဒံၭလီၫႉ

မံဆၩဆၧလုထၪ့နီၪ စၭထၪ့ဝ့ၫဒၪလၧ လဂီၩ၆နၩရံၫအခံၫ့ဂီၩ့ ၦအလ့ၩခိၪလ့ၩနါ မံဆၩ ဆၧလုထၪ့နီၪ မွဲလၧ ၥၫ့ခိၪဒိၪ ဟင်နရီ မန်းအိုင်ခလိန် နီၪလီၫႉ လၧမံဆၩဆၧလုထၪ့ဖၧၩ့ အဝ့ၫ ယီၩစံၭဝ့ၫဒၪ “ကဆါယွၩအဘၩ့မုးနီၪအီၪခလဲၪႉ ကဆါယွၩအဘၩ့မုးနီၪ ဂဲၫထီၩ့စိၩလၧ ဂၪ့ခိၪ ဖၧၩ့ယူၭႉ ကဆါယွၩအဘၩ့မုးနီၪ မွဲလၧဆၧဘၪလိၬဎွ့ၪဎီၩ့ႇ ဆၧဎူၫဆၧဎၩ့ႇ ဆၧတီၩဆၧလီၩ့ႇ ဆၧဆံၫ့ဆၧဎံၫ ဒဲ ဆၧၥုၪ့ဎွံၪၥၭယီၫလၧၥၭမုဆံၫ့ဎံၫနီၪလီၫႉ ဆၧလဖၪယီၩနီၪ မွဲလအီၪဒံၭဘၪ အလၧၫ့အဎွ့ၩဒံၭနီၪလီၫႉ ကဆါယွၩအၪ့န့ထၪ့ ၦၡၩအဆၧကဲၪအခီၫပယီၫနီၪ မွဲလၧကဆါ အဘၩ့မုး ဂဲၫထီၩ့ဝ့ၫလၧဂၪ့ခိၪဖၧၩ့ယီၩနီၪလီၫႉ ကဆါဎြံၬအနၫ့ဆါဒၪဝ့ၫဆ့ မွဲကဆါအဘၩ့မုးနီၪ လီၫႉ လၧအ့ၫယၫဝတံၫခးဒီၪ့ဖၧၩ့ ကၫတိၫလံၭဆၧအီၪကီၪ့အီၪဝ့ၫဒၪနီၪ မွဲဆ့လၧပမၩယွၩအ ဆၧမၩနီၪလီၫႉ လၧဆၧအီၪကီၪ့ဖၧၩ့ ၥၫ့မုၥၫ့ခၫႇ မံၭထၭမုၪႇ မံၭထၭခွၫလဖၪႇ ဆၧအီၪကီၪ့ဆရၫႇ မုၪလဖၪႇ ၦအမၩဆၧၩ့ဆၧအီၪကီၪ့ဆၧဖံၭဆၧမၩလဖၪ ဒဲ ၥၭဘၪ့ဖိၪၥံၪအီၪဝ့ၫဒၪနီၪ မွဲလၧမူၭခိၪ ဘၩ့မုး အဆၧနဲၪ့ကမံၩ့နီၪလီၫႉ ဆၧနီၪအကၠီၩ့ အအီၪထၬဝဲၩ ကဆါယွၩအဘၩ့အမုးနီၪ ပဝ့ၫၥံၪ လဖၪ ပကဆုးထဲၩ့ၥုၪ့ထၪ့ ပၥ့ၪလဲၪႉ ၦအဒိၭန့ထၬဆၧၥူၫဝၭဆံၫ့ဎံၪလဖၪနီၪ မွဲလၧ ၦဆိၬဆၧ အီၪကီၪ့ဖိၪၥံၪနီၪလီၫႉ အၥၭအီၪဝ့ၫဒၪ ၁-၁၈နံၪ့အကျၩ ၥၭဘၪ့ဖိၪၥံၪလဖၪနီၪ ကျ့ၭစၨၭ ယိထဲၩ့ခွါ ထဲၩ့အဝ့ၫၥံၪ အဆၧဆီၪ့ဆၧချဲၫ့ႇ အဝ့ၫၥံၪအဆၧကိၪ့ဘၪကိၪ့ၥ့ၪ ဒဲ အဆၧဆူနဲၩလဖၪလါဆံၭႉ အဝ့ၫၥံၪနီၪ မွဲဝ့ၫလၧ ဆၧအီၪကီၪ့အထီလၧယၫနီၪလီၫႉ ကဆါယွၩအဘၩ့အမုးနီၪ မွဲအီၪလၧ မူၭခိၪအ့ၬ မွဲအီၪလၧယဲၩ့ယဲၩ့အ့ၬႉ အီၪဒၪလၧပအီၪနီၪလီၫႉ ဆၧနီၪအကၠီၩ့ ဘဲၫယွၩအဘၩ့မုးယီၩ ကဖျီၪထၪ့နၭအဂး ဘဲၫၦၡၩကၥ့ၪယၫအၪထၪ့အဂးနီၪ ပကဘၪကျ့ၭစၨၭကၠၭဝ့ၫဒၪနီၪလီၫႉ” အ ဂဲး ၥၫ့ခိၪဒိၪယီၩ ဖ့ၪဂဲးဖ့ၪဘၭဘၪ အၥိၪဖိၪၥံၪ ဘဲၫယီၩအၥိၭနီၪလီၫႉ

မံဆၩဆၧလုထၪ့ ဂီၩ့ဝ့ၫဒၪအခၫ ၦၡၩဆုးထဲၩ့မၩလၩမၩဖၩ့ဘၪ ဘိၪ့မုနံၩယီၩလၧ ဆၧၥၭ အွံၪၥၭဆၧၫ့လဖၪနီၪလီၫႉ

နးအဲၪဖီၫဘွၩ