ၦဆံၫ့ဎံၪ Christina အဂဲး

လၧဎြံၬဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ  မံၩ့ဎိၩၥၪဖျီၪ မုခွၫလၧအအီၪအနိၪ့ အဆၧရၩလၩ့ဖၧၩ့  မုကနံၩယီၩ ယအဲၪဒိၭ ရၩလၩ့န့အ့ၪဘၪနၥံၪနီၪ မွဲဝ့ၫဒၪ ၦဆံၫ့ဎံၪ Christina အဂဲးအကၠီၩ့နီၪလီၫႉ အဝ့ၫၥံၪအဂံၪ့ဒီၪ့နီၪ မွဲဝ့ၫဒၪ ကၭၥလ့ၬဖိၪနီၪလီၫႉ အထၧၫ့ဖုဝဲမုၪ ၥၧၫ့ဂၩဖၧၩ့နီၪ အဝ့ၫယီၩမွဲဝ့ၫ အဆံၭထုၬနီၪလီၫႉ အဝ့ၫအၥၭအီၪ ၁၅ နံၪ့နီၪ အမိမိဖါဖါၥံၫဖီၩ့ခွံၬဒၪအဝ့ၫနီၪလီၫႉ ဆၧနီၪအကၠီၩ့  ၦဆံၫ့ဎံၪ Christina ယီၩ ဆၧအၪ့ဆၧအီၩ့အဂး ဘၪမၩၦယိၥိၫဆၧမၩနီၪလီၫႉ အဝ့ၫယီၩ ဖျုထိၭဆၧဆၫအီၪအကၠီၩ့နီၪ အၥၭအီၪ ၂၁ နံၪ့နီၪ လၩ့ထံၭဖၬလၧ ယိၥိၫအလးဂီၩ့ၥၭနၫ့ဆၧခီၪ့နီၪလီၫႉ

ဆၧနီၪအကၠီၩ့ ၦၡၩဆီၫ့မီၪ့အဝ့ၫလၧ ၥံၫအကၠီၩ့နီၪ ၦၡၩစၭထၪ့တဲၩဝဲၩ့ အဝ့ၫဆၧၥံၫ အဂးနီၪလီၫႉ အဝ့ၫအနးၥၭအဂး ၦၡၩ ဘိၪ့ထၪ့ဘၩထၪ့ ဆၧအခံၫ့ အဝ့ၫအမိဎွါနီၪ ထၪ့ထီၩ့လၧ ၥရိၭအခိၪနီၪလီၫႉ ၦၡၩၥၭမဲၫအဝ့ၫဂီၩ့ စဲၪဖီၩ့ခွံၬထီးအလူၬနီၪလီၫႉ လါနၫ့ဂ့ၩ အဝ့ၫအနးမုၪၥံၪဒဲ ၥၫ့ခၫနီၪအီၪထးလၧအဝ့ၫအီၪနီၪလီၫႉ အဝ့ၫၥၭနၫ့ဆၧခီၫ့ အခံၫ့နီၪ လ့ၩဒၪဘၪလၧ အၥီၪ့ၥံၪနီၪအကၠီၩ့ ဂဲၫထဲၩ့လီၩဝ့ၫဒၪနီၪလီၫႉ ၦဆံၫ့ဎံၪ Christina ယီၩ အ့ၪဒၪၦၡၩစွါဘဲၫ ထၪ့စဲၪလၧ ၥံၪ့ခံၫနီၪလီၫႉ ဆၧနီၪအကၠီၩ့ ၦဂူၫဂၩဆီၪ့မီၪ့အဝ့ၫလၧ ဆၧအဂီၩ့ အကၠီၩ့နီၪ ခွံၬလၩ့အဝ့ၫလၧ ထီၫဖၧၩ့နံၪ့ဘျၩ့နီၪလီၫႉ

လၩ့မၬနံၩနံၪ့ ဂဲၫထဲၩ့စဲၪလၫ့လၧ ထီၫ့ဖၧၩ့ဂီၩ့ လီၩ့အၪချၭအၪ့ဆၧဂီၩ့   လီၩ့မံၫလၧဖၧၩ့ၥၭနီၪလီၫႉ လၧခဲၫ့ထုၬနီၪလ့ၩနုၬလၩ့လၧ ၦဆံၫ့ဎံၪ Dominicam မံၭထၬမုၪ ခရၧၫ့ဖၧၩ့ဂီၩ့ အၥၭအီၪ ၇၄ နံၪ့နီၪ ၥံၫဖီၩ့ခွံၬဝ့ၫဒၪနီၪလီၫႉ လၩယူၫလဲၪ ၂၄ ၥၫ့နီၪ မွဲဝ့ၫဒၪ  ၦဆံၫ့ဎံၪ Christina ဘိၪ့မုနံၩနီၪလီၫႉ အဲၪကွံၩဘၪ ထၧၫ့ဖုဝဲထံၩၥိၭထီးအလူၬၥံၪဧ့ႇ ဘဲၫၥိၭနၥံၪ ကထီးန့ထၬဘၪ ၦဆံၫ့ဎံၪ Christina အဂဲးအကၠီၩ့ ကန့အဂး ယရၩလၩ့န့အ့ၪဘၪနၥံၪလၧ    ဆၧအဲၪဆၧကွံၩ   ဎိၩဒိၪဖၧၩ့နီၪလီၫႉ  မွဲနၥံၪလၧၫ့ဎွ့ၩဝ့ၫဒၪလၧ ကဆါယွၩ အဆၧအဲၪဆၧကွံၩလါဆံၭႉ