ၦဖျိၩ့ၡါဖိၪ နးနီၩ့ခၫရံၫဒဲ မၩ့ၥူၫခနူၬ (၂)

အီၪယံၬကဆိ ဖူၫလၩတၩဂဲၫထၪ့ဝ့ၫနီၪလီၫႉ  လၧခိၪလီၩ့ထိၩ့ချိၬနီၪ လမၠါလၧ အဂဲၫလီၩ့ခၬ ၥမၫ့ၥံၪ ဆၧဖိၪဆၧဎါၥံၪ ဂဲၫထီၩ့ဝ့ၫကဂၩနီၪလီၫႉ လမၠါနီၪ လီၩ့ယိအနဲၩ့ဝါဝါအခၫ ဒၪစဎွၩဖိၪနီၪ ဂဲၩ့အ့ၬ ဘိၭစီၪဝ့ၫလၧ ဆၧဖိၪဆၧဎါကမံၩ့မံၩ့တၭ ခၬဝ့ၫ လၧဖျါ ၥၧၫ့ကၠၪနီၪလီၫႉ စဎွၩဖိၪယီၩ အဝ့ၫအစီၩ့အမၩ့အကၠီၩ့ မွဲဖျါလ ဘၪ ဘၪအဝ့ၫနးကၠၪနီၪလီၫႉ စဎွၩဖိၪယီၩ ဒၪတၭ အၪ့န့လၫ့ထဲၩ့အဖျါ ကခၬထဲၩ့ လမၠါအခၫ လမၠါယီၩ အၪ့ယၫ့ စဎွၩဖိၪ အဝ့ၫလၥ့ၪယၫ ဘၪနီၪ ခၬ ဘၪဝ့ၫအကၠီၩ့ တၭ စဎွၩဖျါခွံၬနီၪလီၫႉ

လၧခဲၫ့ စဎွၩနီၪ အၪ့စၪ့ လမၠါ လမုဆၫခီၫအခၫ ၦနွ့ၫမုၪ (၇) ဂၩ အီၪဂဲၫယူၩလၩ့လၧ မူၭခိၪဂီၩ့ ယဒၪ ဂဲၫကွ့ၩၥဲၫထံၫလၧ ကမၫဖၧၩ့လီၫႉ အဝ့ၫၥံၪ မအီၪဂဲၫကၠၭအလးခလဲၪ ယမိၥ့ၪယၫနီၪလီၫႉ ကထံၪဎး လမၠါနီၪ စံၭဆၧၫ့ထဲၩ့ စဎွၩဖိၪဧ့ႇ ကမၫအယီၩ ဆၧကိၭဝ့ၫအမံၩ့လၧ ပုၭတလုၭ ကမၫနီၪလီၫႉ လၧကမၫယီၩ မုထၪ့လံၩခံၫကကဲၩ့ခီၫနီၪ ကလိၬၥံၪအီၪအလး ခးစ့ၩခိၪလီၩ (ငွေတောင်ပြည်ကြီး ) အီၪဝ့ၫလီၫႉ စဎွၩလၧအပၧၩ့ ခးစၧၩ့ခိၪလီၩ့နီၪ အဖိၪမုၪအီၪ (၇) ဂၩနီၪလီၫႉ အဝ့ၫၥံၪနီၪ (၇) ၥၫ့ကကၠၪ ဂဲၫကွ့ၩၥဲၫထံၫလၧ ပုၭတလုၭကမၫယီၩနီၪလီၫႉ

လၧခဲၫ့ စဎွၩဖိၪနီၪႉႉဂ့ၩယူၭ လမၠါ အနီၪစွါဘဲၫ ၦနွ့ၫမုၪၥံၪယီၩ နဖီၪ့န့ဧၪႇ ယဖီၪ့န့အ့ၬ ၦလၧအၡီၩ့ခၩ့ခၫ့အီၪနီၪမၬ ကဖီၪ့ဝ့ၫန့နီၪလီၫႉ ကထံၪဎး စဎွၩဖိၪစံၭဆၧၫ့ထဲၩ့ ၡီၩ့ခဲၩ့ခၫ့နီၪ ကန့ခလဲၪ လမၠါအခၫ ၡီၩ့ခဲၩ့ခၫ့နီၪ ကန့ဒၪလၧ ၡီၩ့ၥံၪအအီၪလီၫ စဎွၩဧ့ႇ ယဆရၫ အဲၩ့ၥဲၭ လီၩယံၫယါယၧၩနီၪ ဆၧလၧၡီၩ့ၥံၪနီၪ လ့ၩလီၩ့ဎွါအၪ့ယံၫယါအဆၫလၧ လံၩဒံၭမၫဆမံၭဖၧၩ့လီၫႉ အဝ့ၫၥံၪၥၭမဲၪ ထိၪဖချီးအဒုၪဒၩတၭ ဂဲၫန့ကၠၭအဝ့ၫၥံၪအၡီၩ့ခဲၩ့ခၫ့ၥံၪ နီၪလီၫႉ ကထံၪဎး စဎွၩဖိၪစံၭဆၧၫ့ အ့ၪမွဲဘနီၫစွါဘဲၫ ယကမိလ့ၩလၧနီၪ လ့ၩနဲၪအ့ၪယၧၩဖၧၩ့ၥၭ လမၠါဧ့ နီၪလီၫႉ