ၦဖျိၩ့ဆၨၩဒဲ  ဆၧဘိၪ့ဆၧဘၩဖးဖီၩ့

ၦဖျိၩ့ဆၨၩၥံၪနီၪ ခီၫလၧ ဘုၭဒၭဆၧဘိၪ့ဆၧဘၩဒဲ ဎရံၬဆၧဘိၪ့ဆၧဘၩၥံၪလအီၪဒံၭဘၪအထီအိၩ ပကဒၪဘၪ အဝ့ၫၥံၪနဲၩ့ ကလိၬကလၬလဖၪမွဲဂ့ၩ လၧအဝ့ၫနဲၩ့လၧ ဒိၭနဲၩ့ဝ့ၫန့အမံၩ့မံၩ့နီၪလီၫႉ ၦဖျိၩ့ဆၨၩလုၫလါထူၫရူၫကမံၩ့မွဲဝ့ၫ အၪ့ဎဲၩ့နီၪဆ့ မွဲမၩဝ့ၫဆ့နီၪလီၫႉ ကိၭဝ့ၫလၧ ကဆါဖါဒိၪ ဘနီၪ မွဲဘိၪ့ထၪ့ဘၩထၪ့ဝ့ၫဆ့လီၫႉ အခံၫ့အနီၪဒၪအိၩ မွဲလၧ ဆၧဘိၪ့ဆၧဘၩ လအီၪဒံၭဘၪနးမံၩ့လီၫႉ လၧခဲၫ့ လၧခးပယၩ့ဖၧၩ့ယီၩ ဘုၭဒၭဆၧဘိၪ့ဆၧဘၩဒဲ ဎရံၬဆၧဘိၪ့ဆၧဘၩၥံၪဂဲၫထီၩ့အခၫ ဖျိၩ့ၥံၪလဖၪ ဂဲၫကဲၪထၪ့ ဆၧဘိၪ့ဆၧဘၩဖိၪၥံၪနီၪလီၫႉ ဘဲၫဂၪ့ခိၪခမျၧးအၥိၭ ဆၧဆၧးဎံၫဆၧလၩ လ့ၩထၪ့လ့ၩထီၫအဖၫ့ခိၪ ဆၧဘိၪ့ဆၧဘၩအနိၪ့ဆ့ မွဲအၪထၪ့နီၪလီၫႉ ခးပယၩ့ဖၧၩ့ယီၩ မွဲဘုၭဒၭဆၧဘိၪ့ဆၧဘၩ ဂဲၫထီၩ့ဂုဝ့ၫအဆိၪထုၬနီၪလီၫႉ လၧနံၪ့ ၁၈၀၀အထီဒၪအိၩ ၡၩအဆၧဝံဆၧနၬထီးအလူၬဆံၫပိၩ့ ခွံၫပိၩ့နီၪ မွဲ ဘုၭဒၭဆၧဘိၪ့ဆၧဘၩၥံၪနီၪလီၫႉ လၧခဲၫ့ ဎရံၬဆၧဘိၪ့ဆၧဘၩ ဂဲၫထီၩ့နီၪလီၫႉ ဎရံၬဆၧဘိၪ့ဆၧဘၩနီၪ ပကစံၭအီၪဝ့ၫ (၃) မံၩ့ မွဲဝ့ၫ ကဲၭၥလံၬဎရံၬဖိၪႇ ဘၧၩ့ထံၫဎရံၬဖိၪ ဒဲ အ့ၫဂလံၫကၫ့ဎရံၬ ဆၧဘိၪ့ဆၧဘၩၥံၪနီၪလီၫႉ ဎရံၬဆၧဘိၪ့ဆၧဘၩ (၃) မံၩ့ယီၩအဖၧၩ့ ကဲၭၥလံၬဎရံၬနီၪ မွဲဂဲၫထီၩ့ဝ့ၫ အဆိၪထုၬနီၪလီၫႉ ဆၧဘိၪ့ဆၧဘၩၥံၪ ဂဲၫအီၪအၪထၪ့လါနၫ့ ၦဖျိၩ့လုၫလါထူၫရူၫကမံၩ့မွဲဝ့ၫ ဆၧအၪ့ဎဲၩ့ အဘိၪ့နီၪ မွဲထၧၫ့ဖုဝဲဖျိၩ့ဘုၭဒၭၥံၪ ဆုးဖီၪ့ဂုးထၬ ထီးမုဆၫကနံၩယီၩဒံၭနီၪလီၫႉ

            ဆၧဘိၪ့ထၪ့ဘၩထၪ့ ကလိၬနီၪ မွဲဖံၫဖူၫၥံၪလၧဖျိၩ့ဖျိၩ့အိၩ အဆၧဆူၩနဲၩကမံၩ့လီၫႉ ဎရံၬဖိၪၥံၪလဖၪ ဆၧဘိၪ့ထၪ့ဘၩထၪ့ ကလိၬလုၫလါနီၪ ခွံၬၡိၬခွံၬဝ့ၫဒၪနီၪလီၫႉ ဖျိၩ့အီၪလၧ ခိၪလီၩ့ခိၪအၪဒၪဆၧနီၪ မွဲကဲၭၥလံၬဎရံၬဖိၪၥံၪဒဲ အီၪလၧဖံၬဒၩလး ဖျိၩ့ၡၩ့ဒဲ ဖျိၩ့ၡိလဖၪနီၪ အၪဒၪဆၧ ဂဲၫကဲၪထၪ့ ဘၧၩ့ထံၫဎရံၬဖိၪၥံၪနီၪလီၫႉ လၧနံၪ့ ၁၉၇၃ နံၪ့အထီဒၪအိၩ ၦဖျိၩ့အၪ့ဎဲၩ့အီၪဝ့ၫ (၉၃၀၀) အကၠီၩ့ ပထံၫထၪကျိၩ့ယီၩ ဖျိၩ့လၧအဖီၪ့ဂုးထၬလုၫလါအၪ့ဎဲၩ့ယီၩ ပကဒၪဘၪ အီၪအအၪထုၬနီၪလီၫႉ ဘုၭဒၭဒဲ ဎရံၬဆၧဘိၪ့ဆၧဘၩၥံၪ လကၭဘၪ အီၪၥုၪ့လၩ့အၥၭလၧ တီၫငူၫ မေတ္တာဗြဟ္မစိုရ်ဆူၩနဲၩဖိၪလဖၪႇ အီၪလၧကီၭကရံၭ လ့ၩတဲၫ့ယွၫၥ့ၭ တလခုံဆူၩနဲၩဖိၪ လဖၪႇ မိၩန့ၫပွၩဖျိၩ့လၧဆူၩနဲၩကလိၬၥံၪ အီၪဝ့ၫဒံၭနီၪလီၫႉ မွဲဆၧဘဲၫနီၪ ဖျိၩ့ဆၨၩၡၩကမျၧးခရၧၫ့နီၪ ဆၧဘိၪ့ဆၧဘၩ ဆၧဆူၩနဲၪ ဂဲၫအီၪထၪ့အၪမၬနီၪလီၫႉ ဆၧဆူၩနဲၪထီးအလူၬနီၪ မွဲပဆူၩနဲၩန့ ဂ့ၩဂ့ၩဘၪဘၪအခွး ပန့ထၬဘၪလီၫႉ ထီမုဆၫကနံၩယီၩ ၦထၧၫ့ဖုဝဲဖျိၩ့ဖိၪၥံၪလဖၪ ပဆၧဆူၩနဲၪႇ ပဆၧဘိၪ့ဆၧဘၩ လမီၪ့ဎီၩ့ဘၪလိၬၥၭလါနၫ့ဂ့ၩ ကဂၩဒဲကဂၩ ပကဒၪဘၪ ဆၧဖံၭၥိၭလိၬၥၭ ဘူၭဘူၭထံၭထံၭနီၪလီၫႉ