ကဲၪထၪ့ ဖိၪအအၧၩ့လဖၪလဂ့ၩ

လၧကကၠၪအိၩ ဝံးဖိၪကဝံးဖၧၩ့ ၦထၧၫ့မၪဝၩအီၪဝ့ၫနံၫဂၩနီၪလီၫႉ အဝ့ၫၥံၪနီၪ အဖိၪမုၪအီၪကဂၩ အဖိၪခွၫ အီၪကဂၩနီၪလီၫႉ ၦလၧကဲၪဖါနီၪ အၪ့ဆၫဆၧၥူၫဆၧၥၪဆၧဒိၭဆၧလၪဂီၩ့ ၦလၧကဲၪမိနီၪဘိၭ ဆၭဆၧနီၪလီၫႉ

အဝ့ၫၥံၪယီၩ အဖိၪနံၫဂၩအဂး မၩဆၧမၩ လၧဆၧဖၩ့လၫ့ ထၧၩ့ထီၩ့ဆၧခံၭနီၪလီၫႉ အဝ့ၫၥံၪယီၩ ကၠၧၩ့ကၠီၩအ့ၪ အဖိၪအဒံၪလၧဆၧကီၩ့ဆၧၥိၭအဂ့ၩလဖၪဂီၩ့ ဖဲထၬအဖိၪအဒံၪလၧဆၧမၩလိၪလး အဂ့ၩထုၬ အလးနီၪလီၫႉ ဘိၩၥိၭအဖိၪနံၫဂၩယီၩကကဲၪထၪ့ ၦကိၪ့ၥ့ၪလဖၪအဂး အဝ့ၫၥံၪ ကျ့ၭစၨၭခိးဂဲးခိးဘၭ ဒိၪဒိၪ ဒ့ၭနီၪလီၫႉ

လါနၫ့ၦထၧၫ့ဖုဝဲနံၫဂၩနီၪ မွဲလၥ့ၪယၪဆၧၫ့ထဲၩ့ဘၪ မိဖါခိးတၩလီၫႉ ကယဲအဝ့ၫၥံၪမိမၩနးမံၩ့ မိဖါနံၫဂၩယီၩ မၩလၧၫ့ဎွ့ၩအ့ၪဒၪလူၬ ၥ့ၪယၫစံၭခိးစံၭတၩထဲၩ့မိဖါအ့ၬႉ  ဖိၪခွၫနီၪ ကလီၩ့မုၬလီၩ့လၩလၧ အထံၩၥိၭလဖၪအဂး ထဲၩ့အၪ့ကံၩ့မိဖါထီးႉ ဖိၪမုၪနီၪဆ့ ကမိဎွ့ၩဆၧကီၩ့ဆၧၥိၭအဂး ထဲၩ့အၪ့ကံၩ့မိဖါထီးႉ အဝ့ၫၥံၪထဲၩ့အၪ့ကံၩ့မိဖါထီးအခံၫ့ အ့ၪမွဲမိဖါၥံၪလဖ့ၪလၫ့ဘၪအဝ့ၫၥံၪစွါဘိၩ ကစဲၪ့လၩ့ကၠၭလၧဂံၪ့ဖၧၩ့ အဂဲး စံၭအမိအဖါၥံၪနီၪလီၫႉ

အကနံၩ ဖိၪခွၫနီၪ ကမိလီၩ့နၫ့စဲၭလဲၪ့ယဲးခၪ့လၧအထံၩၥိၭၥံၪအကၠီၩ့ ထဲၩ့အၪ့ကံၩ့အဖါထီးနီၪလီၫႉ အနီၪအခၫအဖါဝ့ၫအထီးလအီၪဘၪအကၠီၩ့ ယဖ့ၪလၫ့နၧၩန့အ့ၬဖိၪခွၫဧ့ စံၭဝ့ၫဘနီၪအခၫ ဖိၪခွၫနီၪၥၭထၪ့ ဒိၪဒိၪဒ့ၭဂီၩ့ ယထံၩၥိၭၥံၫခီၫ တခၩအဝ့ၫၥံၪကမိမၩနးမံၩ့ အမိဖါမၩအ့ၪနးထီးလူၬ လၩ့လၧယၧၩခီၫနီၪ အယီၩလီၫမၬ နၥံၪမၩအ့ၪယၧၩန့အ့ၬႉ စံၭအမိဖါဘိၩနီၪဂီၩ့ စဲၪ့လၩ့လၧဂံၪ့ဖၧၩ့နီၪလီၫႉ အနီၪအခၫ အမိနီၪ လၧမ့ၬထံၫမ့ၬနီၫ့အကျၩ ဖိၪခွၫဧ့ မိၥံၪဖါၥံၪယီၩ လၧနၥံၪအဂး ပကျ့ၭစၨၭအ့ၪနၥံၪအဂ့ၩထုၬဆ့ဘ့ၩ စံၭအဖိၪခွၫဘဲၫနီၪလါနၫ့ ဖိၪခွၫနီၪ ခိၭနၪဘူၭအမိအဆၧချဲၩ့အ့ၬႉ

အခံၫ့ယံၭထၪ့ကကၠၪ မိဖါၥံၪယီၩအၥၭဂဲၫၡါလၫ့ဂီၩ့ ဆၧဆီၪ့ဆၧချဲၩ့လဂ့ၩလၧၩ့ဘၪလီၫႉ အနီၪအခၫ အဝ့ၫၥံၪအဆၧဖံၭဆၧမၩလဖၪဆ့ အီၪဘၪလၧၩ့ဧၪအ့ၬလၥၨၩႉ အဝ့ၫၥံၪယီၩ ကျိၪစ့ၩဆၧကၪ ဆၧဂဲၩအီၪထၪ့အခံၫ့ ယိလါအဖိၪအဒံၪအဆၧမၩဆၧၩ့လါနၫ့ အဖိၪခွၫနီၪ ဘၪယိထဲၩ့ခွါထဲၩ့ အဖိၪအမၪအကၠီၩ့ မၩဆၧၩ့အဝ့ၫၥံၪန့အ့ၬအဂဲးႇ အဖိၪမုၪနီၪနးဆ့ ကထၪ့ၡါလၧအဆၧခွၫအဂး ဘၪခိးဂဲးခိး ဘၭဝ့ၫအကၠီၩ့ ဂဲၫယိထဲၩ့ခွါထဲၩ့အမိဖါချူၭအ့ၬအဂဲး စံၭကၠၭဝ့ၫဘိၩနီၪလီၫႉ

မိဖါနံၫဂၩ နါဂၧၫ့ဖိၪၥံၪအဆၧချဲၩ့ဂီၩ့အခၫ အၥၭအုၭဝ့ၫဒၪဒိၪဒိၪဒ့ၭဂီၩ့ အၪ့ဎၬထၪ့ထဲၩ့ဘၪ ဖိၪၥံၪအဂး အဝ့ၫၥံၪဂဲၫထဲၩ့ထိးၡၪ့ထိးနၭထၬအၥၭလဖၪနီၪလီၫႉ မိဖါၥၭၡါနံၫဂၩယီၩ ကဆုးထဲၩ့အီၪမၧၫ့အၥၭပၥ့ၪလဲၪႉ

ဆၧမၩလိၪ

လၧပဂး ပမိဖါၥံၪ ဘၪဂဲၫထဲၩ့ထိးၡၪ့ထိးနၭထၬအၥၭလဖၪ ဘၪဂဲၫထဲၩ့ထိးလီၩထိးချဲၩ့ထၬအၥၭ လဖၪနီၪ ကြၨၭပၥၭနၪ့အ့ၬႉ ဖိၪဒံၪလၧအၥ့ၪယၫထဲၩ့ မိဖါခိးတၩလဖၪနီၪ အဆၧၥၭမၧၫ့ထၧၫ့ဖျီၩ့ယၫ ထဲၩ့ အီၪဘၪ ၡူၪၡူၪဘၩဘၩနီၪလီၫႉ