ယူၭယၪ့ထဲၩ့ မိဖါဆံၭ
လၧတဝၫ့ ကတဝၫ့အဖၧၩ့ ပထၧၫ့ဖုဝဲအီၪနံၫဂၩနီၪလီၫႉ အဝ့ၫၥံၪ အမိၡါက့ၭအီၪကဂၩလီၫႉ အဝ့ၫၥံၪ အဖါနီၪ ၥံၫဒၪခွံၬအဝ့ၫၥံၪ ခီၫလၧအဝ့ၫၥံၪ အဆံၭဆံၭဒၪအိၩနီၪလီၫႉ အဝ့ၫၥံၪအမိနီၪ ခိးဂဲးခိးဘၭ ကျ့ၭစၨၭ ဒုၭထၪ့အဝ့ၫၥံၪ ဆၧမၩလိၪအကၠီၩ့ အဝ့ၫၥံၪဂဲၫဎိၩ့လၫ့အခၫ ၦလၧကဲၪဖိၪခွၫနီၪ အဆၧမၩန့လၧ စဲၭဆၧမၩလး နီၪလီၫႉ ၦလၧကဲၪ ဖိၪမုၪနီၪဘိၭ မၩဆၧမၩလၧ ဆၧအၪ့ဆၫ ဆၧဖံၭဆၧခီၫအလးနီၪလီၫႉ
ၦထၧၫ့ဖုဝဲနံၫဂၩယီၩ ၥ့ၪယၫအမိအဂးဒိၪဒိၪလ့ၬလီၫႉ ၦအကဲၪဖိၪခွၫနီၪ လီၩ့ဎွါထီးန့အဖၧၩ့ ဖိၬဖၫ့နီၪ ထဲၩ့ဖ့ၪလၫ့အမိလီၫႉ ၦလၧကဲၪဖိၪမုၪနီၪဆ့ လၧအမိလိၪဝ့ၫဒၪလဖၪနီၪ ထဲၩ့ဎွ့ၩန့အ့ၪဝ့ၫ ကယဲအမိ အဆၧဖံၭ ဆၧမၩအီၪလဖၪနီၪ မၩဆၧၩ့အ့ၪဝ့ၫကိၭမံၩ့နီၪလီၫႉ
ကနံၩတၭ မိၥၭၡါနီၪ အီၪလဆီၪ့ဘၪအကၠီၩ့ ဘၪထၪ့ဆၧဆၫဂံၪ့နီၪလီၫႉ အနီၪအခၫ အထၧၫ့ဖုဝဲနံၫဂၩ ယီၩ အၪ့န့ခွးဂီၩ့ ဂဲၫယိအမိလၧဆၧဆၫဂံၪ့ ဂ့ၩဂ့ၩဘၪဘၪနီၪလီၫႉ အဝ့ၫၥံၪလီၩ့ဎွါထၬန့ကျိၪစ့ၩလဖၪနီၪ ဖ့ၪလၫ့ခွံၬဆၧဆၫဂံၪ့အလံၩ့ထီးလူၬနီၪလီၫႉ
လယံၬယမီးဘၪနီၪ မိၥၭၡါယီၩအီၪမုၬလၫ့ထဲၩ့အကၠီၩ့ အထၧၫ့ဖိၪမိၥံၪ ထဲၩ့စဲၪ့လၩ့ထဲၩ့လၧ ဆၧဆၫဂံၪ့ နီၪလီၫႉ ထဲၩ့ထီၩ့လၧဂံၪ့အခၫ မိၥၭၡါနီၪ ယိထၪ့အဖိၪနံၫဂၩနီၪဂီၩ့ အမ့ၬထံၫဂဲၫအုၪ့လၫ့နီၪလီၫႉ ဂီၩ့နီၪ လီၩဘၪ အဖိၪၥံၪ “ဖိၪမုၪဖိၪခွၫၥံၪဧ့ နၥံၪယိထဲၩ့ခွါထဲၩ့ယၧၩ ဎွ့ၩယီၩဒ့ၭနီၪ ယစံၭခိးဆံၭတၩဘၪထဲနၥံၪနီၪ ဖိၪၥံၪဧ့ နၥံၪနီၪ မွဲဒၪ ကဆါယွၩဖ့ၪလၫ့ထၬအ့ၪယၧၩယဂး ခိၪဖၭလီၫ ဖိၪၥံၪဧ့ႉ”
ဂီၩ့ ၦလၧကဲၪဖိၪခွၫနီၪ ဖီၪ့ထၬအမိအစူၪဂီၩ့ စံၭဝ့ၫဒၪ “မိဧ့ အ့ၪနလအီၪဘၪနီၪ ပကမၩပၥ့ၪလဲၪႉ နဂဲၫထဲၩ့ လုအၪ့လုအီၩထၬပၧၩ အခိးအတၩလဖၪနီၪ ပၥၭနၪ့အ့ၬဘ့ၩမိဧ့ႉ နကအီၪဘၪဂ့ၩဂ့ၩဘၪဘၪအဂးနီၪ မွဲဒၪ ဖိၪၥံၪအဆၧမုၬလၩလီၫဘ့ၩမိဧ့ႉ”
ၦလၧကဲၪဖိၪမုၪနီၪနးဆ့ “မွဲမိဧ့ ပမိဒၪမွဲ နကအီၪဘၪမုၬမုၬလၩလၩအဂးလီၫႉ ဘိၩပမၩန့အၥိၭ ပကယိ ထဲၩ့ခွါထဲၩ့နၧၩဘ့ၩမိဧၪ ၥၭခိဆၧနးမံၩ့လဂ့ၩနဲၪႉ”
မိနီၪ နါဂၧၫ့ဘၪ ဖိၪဒံၪလဖၪ အဆၧချဲၩ့ဘိၩနီၪအခၫ ဆၧမုၬအၥၭဒိၪဒိၪလ့ၬနီၪလီၫႉ စၭထၪ့လၧအခံၫ့နီၪ အဝ့ၫၥံၪအထၧၫ့ဖိၪမိ၃ဂၩယီၩ ထဲၩ့အီၪကၠၭလၧမုၬမုၬလၩလၩအဖၧၩ့နီၪလီၫႉ
ကဲ ထၧၫ့ဖုဝဲမုၪခွၫ ၦလၧအကဲၪဖိၪလဖၪဧ့ ဘဲၫၡါဖိၪယီၩအဖၧၩ့ ဖိၪနံၫဂၩအၥိၭ လၧပမိပဖါအဖၫ့ခိၪ ပကဲၪထၪ့ ဖိၪဒံၪလၧ အၥ့ၪယၫဆၧလဖၪယူၭဧၪနီၪ ပကဘၪအၪ့စၪ့လၩ့ထဲၩ့ပၥၭ ကလိၪဝ့ၫဒၪနီၪလီၫႉ
