အီၪမုၬမုၬလၩလၩဆံၭ

အဲၪဖီၫဘွၩ  – မွဲအ့ၬဘီၩ ယဆၧၫ့နၩ့ယိထၪ့နၧၩ အီၪကဆိဖိၪယူၭ မနဘၪမန့လဲၪႉ ယဘၪဒၪနၧၩ ယၥၭၡၪ့ထဲနီၪဘ့ၩႉ

ဎံၫ  – လီၩလၧၩ့ကစ့ၩနးဧ့ ယကိၭယစခွၫခွ့ၩဒိၭနါခီၫ ခွံၬလၩ့ထ့ၬဝံၭဝ့ၫႇ ယၥိၫ့ဒီၭလံၬဒီၭ ယိဝ့ၫနးဆ့အ့ၬႉ လၧကနံၩဒၪအိၩ ကိၭယၧၩခွ့ၭဒိၭနါဂီၩ့ လီၩယၧၩ ပကဂၭဖၬလၫ့ဒၪ ပဖၧၩ့ၥၭ ယဖၧၩ့ၥၭႉ စံၭယၧၩဘနီၪနးဧ့ႉ အနီၪယကဘၪမၩပၥ့ၪလဲၪႉ ယၧၩခီၫယၥၭထ့ၬအဝ့ၫန့အ့ၬနးဧ့ႉ

အဲၪဖီၫဘွၩ – အီၩဘနီၪဧၪ အနီၪဘိၭ ယကလီၩနၧၩဆၧနးမံၩ့အီႉ ၦၡၩလၧလမိအီၪဘၪ လၧပနဲၩ့နီၪ နဘၪလီၩ့ကၠူၭ ထၬလိၪအ့ၬႉ အ့ၪမွဲနကလီၩ့ကၠူၭထၬဘနီၪစွါဘဲၫ နၧၩမွဲ နၥၭကၡၪ့ အဝ့ၫဆ့ မွဲအၥၭကၡၪ့ႉ ဆၧနီၪအကၠီၩ့နီၪ အ့ၪမွဲအဝ့ၫကမိဂၭဖၬလၫ့ဘိၭ ဖျါလၩ့ဝံၭႉ လၧအဝ့ၫကမိလ့ၩအလးနီၪ လ့ၩဒၪဝ့ၫႉ နၧၩဆ့ ၦၡၩလမိအဲၪလၧၩ့ ဘၪနၧၩနီၪ ကျ့ၭစၨၭၥၭနၪ့ခွံၬဝံၬႉ ကထံၪတွၭနီၪဘိၭ နၥၭကဘၪထံၭလၥၨၩႉ လါနၫ့အ့ၪယံၭထၪ့နီၪ နၥၭနၪ့ခွံၬ အဝ့ၫန့လီၫႉ ခီၫခီၫနၥၭကဘၪၡၪ့ ဆၧၥၭမၧၫ့ထၧၩ့ထီယၫနီၪ မၩဆၫခွံၬနၥၭကဆိဖိၪဂီၩ့ နဆၧၥၭမၧၫ့ထၧၩ့ဖျီၩ့ ယၫနီၪ ဆုးထဲၩ့အီၪမၩလၧဆၧမုၬဆၧလၩအဖၧၩ့လီၫႉ “အဝ့ၫလအီၪဘၪန့အ့ၬ” ဆၧဆီၫ့မီၪ့ဆီၫ့မၬအဘၪမၪနီၪ အီၪပဲၩခွံၬဝံၬဂီၩ့ “ယဆၧၥၭမၧၫ့ဖၧၩ့ အဝ့ၫလအီၪဘၪဆ့ ဘၪနးမံၩ့ဧၪအ့ၬ”. ဆီၫ့မီၪ့ထဲၩ့ဘနီၪႉ အခံၫ့နီၪ ကဘၠၩ့ ထဲၩ့အ့ၪဒၪနၧၩ နၥၭအဆၧဆၫနီၪလီၫႉ  ၦၡၩလၧကမိအီၪလၧနၧၩလဆိၩယၫ ၦၡၩလၧ အအဲၪနၧၩလူၬၥုၪ့လူၬၥၭ ကဂၩနီၪ လၧခးၥဲၫ့ဖၧၩ့ယီၩ အီၪဝ့ၫဒၪဒံၭႉ အၪ့ဎၬထၪ့ဘနီၪဂီၩ့ အီၪမၧၫ့နၥၭနးထံၪဘ့ၩႉ အနီၪဖျီၪ့မုၬထဲဎွ့ၩပၥ့ၪ လဲၪႉ ကဲ စၭထၪ့လၧအခံၫ့ဘဲၫယီၩ ဆီၫ့မီၪ့ လၩ့ထဲၩ့နၥၭ ဘဲၫၦအပျီၩဖျ့ၭကဂၩအၥိၭဂီၩ့ အီၪထဲၩ့မုၬမုၬလၩလၩ နးထံၪနဲၪႉ  

ဎံၫ – မွဲယူၭနးဧ့ ခိၭနလီၩအၥိၭနီၪ ယကကျ့ၭစၨၭအီၪထၧၫ့အန့ဒ့ၭႉ အ့ၪလမွဲဘၪနီၪ မွဲကယီၫယဂးလၧၩ့အ့ၬႉ