လံဘျၩ့လဘျၩ့ ခးၥဲၫ့ထၧၫ့ဘံၪ့ယၫ ၥၭၡါလဖၪအဘိၪ့မုနံၩ

လၧၥၭၡါအဘိၪ့မုနံၩဖၧၩ့ ၥၫ့ဎွၩဒိၪ လေအို ၁၄ဂၩလဂၩနီၪ လီၩလၩ့လၬလၩ့ဝ့ၫဒၪ ဘိၩယီၩ အၥိၭလီၫႉ (နီတိဒေသနာကျမ်း ၁၄:၂) ဖၧၩ့ ကွ့ၭထၬဝ့ၫ ဆၧယိလါ လလၩ့မါဘၪ ၦၡၩလဖၪနီၪ ဘၪဆၧဆိၪဂ့ၩလီၫႉ

လၧပကဲၪၦၡၩ ထၧၩ့ထီယၫအဖၧၩ့ ပဘၪဒၪဆၧၫ့ယၫလၧ ဆၧကၪဆၧဂဲၩ အၪမံၩ့ လါနၫ့ ဆၧယိလါနီၪ မွဲလၧ ဆၧမုၬဆၧၡူၪ အခၪ့ထံၭခၪ့ဎၧၩ့နီၪလီၫႉ ပကမၩထၪ့ကဆါယွၩ အဆၧထိးထဲၩ့တၩ့ထဲၩ့ ဆၧဖံၭဆၧမၩအဂး ကဆါယွၩနီၪ လအီၪက့ၪဘၪ မုၪႇခွၫႇၥၭဘၪ့ႇ ၥၭၡါဂီၩ့ ၥိၩ့ၦၡၩကိၭဂၩဒ့ၭနီၪလီၫႉ

ၦၥၭၡါလဖၪနီၪ မွဲလၧဆၧယိလါအဆၧနဲၪ့နီၪလီၫႉ ဆၧၥၭၡါထၪ့နီၪ မွဲလၧဆၧယိလါ အဆၧနဲၪ့ကမံၩ့နီၪလီၫႉ နၥၭၡါထၪ့ဂီၩ့ နဂဲးနဘၭလၩ့ဆါအခၫ ယကဖ့ၪလၫ့နၧၩ ယဂဲး ယဘၭအဂဲး ကဆါယွၩလီၩထၬပၧၩ အီၪဝ့ၫလီၫႉ စပီၩလူစံၭဝ့ၫ ယဂဲးယဘၭလၩ့ဆါအခံၫ့ ယဂဲးဆီၪ့လီၫႉ ပၥၭၡါထၪ့နီၪ မွဲလၧအခံၫ့အဆၧနဲၪ့လီၫႉ ဆၧမၩဒၪမ့ၬၡၩဝ့ၫဒၪ ၥၭဘၪ့လဖၪ အဂး ကလိၪဘၪ ၥၭၡါလဖၪ အဆၧဖ့ၪကိၪ့ဖ့ၪတဲၩ့နီၪလီၫႉ

ၥၭၡါလၧအဘၪအီၪလၧ ၥၭၡါၥံၪအီၪဒုၩၥၭအလးအခံၫ့ ပလ့ၩဂၭကွ့ၩစိၩလၧအဝ့ၫ ၥံၪအီၪ ပလ့ၩဖ့ၪလၫ့အ့ၪအဝ့ၫၥံၪပအခံၫ့နီၪ အဂ့ၩထုၬလီၫႉ ပၥၭၡါထၪ့အခံၫ့ ကဆါယွၩနီၪ ဖ့ၪလၫ့ပၧၩ ဆၧဆိၪဂ့ၩဆိၪဘွၩလဖၪနီၪလီၫႉ ၥၭၡါလၧအဘၪထိးခွံၬၡိၬၥၭလဖၪအအီၪ ပဘၪလ့ၩဂၬကွ့ၩစိၩ ကလိၪဝ့ၫဒၪလီၫႉ

ပကဘၪအၪ့ကံၩ့ဘၩဆိၪဖၪဆၧ လၧအဝ့ၫၥံၪကၠၧၫ့ကၠၧၫ့ ပကဘၪလ့ၩယိထဲၩ့ခွါထဲၩ့ အဝ့ၫၥံၪ ကလိၪဝ့ၫဒၪနီၪလီၫႉ ပလ့ၩဂၬကွ့ၩစိၩလၧ ပၥၭၡါလဂၩအအီၪနီၪ မီၪ့ဎီၩ့ ပဒၪဘၪ လၧကဆါယွၩနီၪလီၫႉ ၥၫ့ဎွၩဖရၫ့စံၭ အၥၭမၧၫ့ဒံၭအထီ ဘၪထၪ့လၧဆၧဆၫဂံၪ့အခံၫ့အိၩ စံၭထၬဝ့ၫဒၪ ပနးခီၫ့မိၡါယီၩ အဂဲးလၩ့ဆါလါနၫ့ဂ့ၩ ဆၧဂဲၫပဒၩ့ပၧၩန့ အီၪနးမံၩ့အ့ၬႉ ပဆၧအဲၪဆၧကွံၩႇ ပဆၧအၪ့ကံၩ့ဘၩဆိၪဖၪႇ ပဆၧဖ့ၪလၫ့မၩဘိၪ့လဖၪနီၪ ၦၡၩဂဲၫပဒၩ့ထၬ ပၧၩန့နးဂၩအ့ၬႉ ဆၧကၪဆၧဂဲၩလအီၪဘၪအဖၧၩ့ ပမၩန့ဝ့ၫလဖၪနီၪ မွဲပကဘၪမၩနီၪလီၫႉ ၥၭၡါလဖၪအဂး ပကဘၪအၪ့ကံၩ့ဘၩဆိၪဖၪအ့ၪႇ ပကဖ့ၪလၫ့မၩဆၧၩ့အဝ့ၫၥံၪဒဲ ပကဘၪ အဲၪကွံၩအဝ့ၫၥံၪႇ ပကဘၪယိထဲၩ့ခွါထဲၩ့အဝ့ၫၥံၪနီၪလီၫႉ

ဆၧအဲၪကွံၩလၧအဝံဆဲၩ့လၩ့ထၬၥၭ လၧကဆါယွၩအအီၪနီၪ အ့ၪပဒၪလၧခီၫ့ကကဲၩ့ ခီၫစွါဘဲၫ ကဲၪထၪ့ဘိၩပမၩလူၬဂီၩ့လူၬစၪအခံၫ့ၥိၭလါနၫ့ လၧပၥၭဖၧၩ့နီၪ မွဲပဘၪမၩဂ့ၩလၫ့ ကိၭထီဒ့ၭနီၪလီၫႉ ပၥၭၡါလၫ့နီၪ မွဲဆၫ့ထွ့ၫပၧၩလၧ ပကအီၪလၩ့ဘူၭလၧကဆါယွၩ ပကဆူ နဲၩထဲၩ့ကဆါယွၩအဂးနီၪလီၫႉ ဆၧအၪ့ကံၩ့ဘၩဆိၪဖၪလဖၪဒဲ မံဆၩဆၧလုထၪ့လဖၪနီၪ ဖ့ၪလၫ့ပၧၩ ဂဲးဘၭအၥၫ့နီၪလီၫႉ ဆၧဆူနဲၩနီၪ ဘိၩၥိၭပဆုးထဲၩ့ဖ့ၪလၫ့ ပဖိၪပလံၩလဖၪ ကန့အဂး ၥၭၡါလဖၪယီၩ ဖ့ၪနဲၪပၧၩ ဆၧဒီၩ့ဆၧထ့ၬ အဂ့ၩအဘွၩလဖၪနီၪလီၫႉ