ထံၫနွဲတဝၫ့ မၩလၩမၩဖၩ့ မိဖါဘိၪ့မုနံၩအဂဲး

နံၪ့၂၀၂၅နံၪ့ လၩယူၫလဲၫ့၆ၥၫ့နီၪ ဆၧမၩလၩမၩဖၩ့ မိဖါဘိၪ့မုနံၩအီၪဝ့ၫဒၪလၧ ချံၫ့မုၬခီၫ့ ဆၧအီၪကီၪ့ ထံၫနွဲတဝၫ့နီၪလီၫႉ

ၦလၧအလ့ၩခိၪလ့ၩနါ မံဆၩဆၧလုထၪ့နီၪ မွဲဝ့ၫဒၪလၧ Fr.Alexander  ဒဲ Fr.ဗင်းဆင်း နီၪလီၫႉ မိဖါဘိၪ့မုနံၩတၡါနီၪ မွဲဝ့ၫဒၪလၧ လၩယူၫလဲၫ့၂၆ၥၫ့လါနၫ့ ချံၫ့မုၬခီၫ့ဆၧအီၪကီၪ့နီၪဘိၭ လၧဒိၩ့မုတဝၫ့လဖၪအဖၧၩ့ မၩဆိၫထၬဝဲၩ မိဖါအဘိၪ့မုနံၩယီၩနီၪလီၫႉ

လၧမံဆၩဆၧလုထၪ့ဖၧၩ့ Fr.Alexander လီၩလၩ့လၬလၩ့ဆၧၥၭထိၬပရၧၫ့ ဘၪ ထွ့ၫလၧမိဖါဒဲဖိၪအဂဲး ဘဲၫယီၩအၥိၭနီၪလီၫႉ “မိဖါအဆၧအီၪအၪ့လ့ၩထဲၩ့လဖၪနီၪ မွဲလုဘံၭ ဖိၪၥံၪန့ဝ့ၫဒၪနီၪလီၫႉ ဆၧနီၪအကၠီၩ့ ပကၭၥလံၬမိဖါလဖၪနီၪ ဘဲၫၥိၭပဖိၪပဒံၪလဖၪ လထီၩ့ဘၪ လၧဖၧၩ့ၥၭအဂၭဂီၩ့ဖၧၩ့အဂး မွဲကဘၪအီၪမၧၫ့ဖ့ၪနဲၪအ့ၪဖိၪဒံၪၥံၪ လၧဆၧအီၪအၪ့လ့ၩထဲၩ့ အတီၩအဘၪအဖၧၩ့နီၪလီၫႉ မိဖါၥံၪယီၩ ကဘၪဎွံၫလၩ့ထး ဆၧအချံၫအၥၪလၧအဂ့ၩလဖၪ နီၪလီၫႉ အ့ၪမွဲပကမိန့ထဲၩ့ဘၪ ဖိၪဒံၪလၧအၥ့ၪယၫဆၧ ဖိၪဒံၪလၧအဂ့ၩအဘွၩလဖၪစွါဘဲၫ ပၧၩဝ့ၫ မွဲပကဘၪအီၪမၧၫ့ဖ့ၪနဲၪအ့ၪ ပဖိၪပဒံၪလၧ ဆၧဂ့ၩဆၧဘွၩဖၧၩ့နီၪလီၫႉ ဖိၪဒံၪလဖၪနီၪ ဒၪလိၫဒၪဒီၩ့ပၧၩဂီၩ့ အီၪမၧၫ့ထၪ့အၥၭ အကၠီၩ့နီၪလီၫႉ

ဘဲၫနီၪအၥိၭဖိၪဒံၪလဖၪဆ့ မွဲကဘၪခိၭနၪမိဖါ မွဲကဘၪယူၭယၪ့မိဖါအဂဲး လၧလံၬဆံၫ့ ဎံၪဖၧၩ့ ကဆါယွၩ ၥီၪ့ၥၫ့ထၬပၧၩအီၪနီၪလီၫႉ ဖိၪလၧအအဲၪကွံၩယူၭယၪ့ မိဖါလဖၪနီၪ ၦဂူၫဂၩဆ့ ယူၭယၪ့အဲၪကွံၩထဲၩ့အဝ့ၫၥံၪနီၪလီၫႉ ဆၧနီၪအကၠီၩ့ ဖိၪလဖၪနီၪ ကဘၪကျ့ၭစၨၭ ယူၭယၪ့အဲၪ ကွံၩထဲၩ့မိဖါ ကဘၪကျ့ၭစၨၭ ဖ့ၪအီၪမိဖါၥၭၡါလဖၪ လၧဆၧၡူၪၡူၪဘၩဘၩ အဖၧၩ့ဂီၩ့ ကဘၪ လီၩ့ဎွါဘုၪလၩ့မိဖါလဖၪ ဂ့ၩဂ့ၩဘၪဘၪနီၪလီၫႉ ဂၪ့ခိၪချိၫ့ဖၧၩ့ မိဖါလအီၪဘၪ ဖိၪၥံၪမွဲလအီၪ ဘၪနးဂၩနီၪလီၫႉ ပကဲၪၦၡၩနီၪ မွဲပလၧၫ့ဎွ့ၩနးဂၩအ့ၬႉ ပမိပဖါနးဆ့ မွဲဆၧဂဲးဆါဘၭဆါကအီၪ ဝ့ၫဒၪနီၪလီၫႉ ပလီၩ့ဒၪကၠၧၩ့ ပမိဖါအဆၧဂဲးဆါဘၭဆါလဖၪလီၫဂီၩ့ ပခၫ့ဆၧၫ့ထဲၩ့အဝ့ၫၥံၪ န့အ့ၬႉ  မိဖါလၧ လအဲၪဘၪဖိၪၥံၪဘနီၪ မွဲလအီၪဘၪလီၫႉ မိဖါကနၩ့နၩ့နီၪ မိဖါမူၩဒၩလလၧၫ့ဎွ့ၩ

ဘၪဒၪလူၬ မိဖါအၪဒၪဆၧနီၪ လၧဖိၪဒံၪအဖၫ့ခိၪ မွဲအမူၩဒၩ ထီၩ့လၫ့ထၪ့ဘၭကၠၭနီၪလီၫႉ တခၩ ကမွဲဆၧနးမံၩ့ ပဂဲၫထီၩ့လၧဂၪ့ခိၪချိၫ့ယီၩဂီၩ့ ပအီၪမၧၫ့ပၥၭန့နီၪ မွဲလၧမိဖါအခိးတၩလီၫႉ မွဲလၧ မိဖါအဆၧအဲၪဆၧကွံၩ အခိးအတၩအကၠီၩ့ ပဂဲၫကဲၪထၪ့ဘၪၦၡၩနီၪလီၫႉ ဆၧနီၪအကၠီၩ့ ပက

ဘၪအီၪက့ၪထၬ ပမိဖါလဖၪ လၧအဆိၫထုၬအလးနီၪလီၫႉ လကၭဘၪ အီၪက့ၪဒိၪကၠၭႇ ယူၭယၪ့ကၠၭႇ အဲၪကွံၩကၠၭႇ ယိထဲၩ့ခွါထဲၩ့ကၠၭႇ နၥံၪအမိအဖါဂီၩ့ ခိၭနၪလီၩ့ဖိၬအဝ့ၫၥံၪ အဆၧ အၪ့ၥီၪ့လဖၪနီၪလါဆံၭႉ ဘဲၫၥိၭပဖ့ၪကၪထဲၩ့ မိဖါခိးတၩလဖၪ ကန့အဂးဆ့ ပကဲၪဖိၪလဖၪ ကျ့ၭစၨၭထၪ့ကၠၭလါဆံၭႉ”အဂဲး ၥၫ့ခၫယီၩ စံၭဝ့ၫဒၪ ဘဲၫယီၩအၥိၭနီၪလီၫႉ

ဘဲၫနီၪအၥိၭ ဆရၫမုၪ အော်ဒီလားနးဆ့ စံၭဝ့ၫဒၪ “ယမိဖါနီၪမွဲလၧၦအၡၪ့အယၬဖိၪၥံၪ ဂီၩ့ အဖိၪအီၪ၉ဂၩနီၪလီၫႉ ယဖါနီၪ လီၩ့ဒိၭအၪ့ဖိၫ့ႇ လီၩ့ဎွါအၪ့ဒ့ၪၥံၪယၪၥံၪဂီၩ့ မၩဘုၪ့လၩ့ပၧၩ နီၪလီၫႉ ယၧၩဝ့ၫခီၫလၧယဆံၭဆံၭအိၩ ယမိထၪ့ဆၧမၩလိၪအၪမၬလ့ၬႉ ယမိကဲၪၦလၧဆၧကိၪ့ ဘၪကိၪ့ၥ့ၪအီၪလဂၩအၪမၬလ့ၬဂီၩ့ ယခိၪနုၬဂ့ၩကဆံၭနီၪလီၫႉ ဆၧနီၪအကၠီၩ့ ယဖါဖါနီၪ ကျ့ၭစၨၭဖ့ၪထၪ့ယၧၩဆၧမၩလိၫ ထၧၩ့ယဆၧမၩလိၪဂီၩ့အထီနီၪလီၫႉ

အခံၫ့နီၪယဖါဖါဘၪၡၪ့ဘၪယၬအၪမၬလ့ၬနီၪလီၫႉ ယၧၩဆ့ ယလ့ၩထၪ့ဆၧမၩလိၪလၧ ဝံးမၠီၩ့မၠၭဆၧဝံ၃အလးနီၪဒၪအိၩ ယအီၪ၆ဖၨၪဒံၭလီၫႉ ယပလူၭအဘွၩဒဲ ဆၧကီၩ့အယ့ၫ အီၪဒၪ ကဘံၪ့ဎးနီၪလီၫႉ လၧဆၧၡၪ့ဆၧယၬအဖၧၩ့ ယဘၪထၪ့ဆၧမၩလိၪနီၪလီၫႉ ယဖါဝ့ၫနီၪဘိၭ အၪ့လအီၪဘၪဘိၭအီၪ ၡၪ့ၡၪ့ယၬယၬအဖၧၩ့ ဖ့ၪဒုၭထၪ့ယၧၩဆၧမၩလိၪထၧၩ့အဂီၩ့နီၪလီၫႉ ဆၧနီၪအကၠီၩ့ ယစံၭခိးစံၭတၩဘၪ ယဖါဖါအၪမၬလ့ၬနီၪလီၫႉ မွဲလၧယဖါဖါအခိးအတၩအကၠီၩ့ မုဆၫကနံၩယီၩ ယကဲၪထၪ့ဘၪ ဆရၫမုၪကဂၩနီၪလီၫႉ ဆၧနီၪအကၠီၩ့ ယစံၭခိးစံၭတၩဘၪ ယဖါဖါဒဲယမိမိအၪမၬလ့ၬလီၫႉ လကၭဘၪ ယမိစံၭဘၪ ဖိၪၥၪလဖၪ နၥံၪအမိအဖါ ဒုၭထၪ့အ့ၪ နၥံၪ ဆၧမၩလိၪန့အခံၫ့နီၪ ကျ့ၭစၨၭမၩလိၪကၠၬလံၬနီၪဘိၭ ယမိဆၫ့ထွ့ၫဘၪနၥံၪနီၪလီၫႉ” အဂဲး ဆရၫမုၪယီၩ စံၭဝ့ၫဒၪ ဘဲၫယီၩအၥိၭနီၪလီၫႉ

ဆၧမၩလၩမၩဖၩ့မိဖါဘိၪ့နံၩ မံဆၩဆၧလုထၪ့ဂီၩ့ဝ့ၫအခၫ ဆုးထဲၩ့ကလိၬထၪ့ မိဖါဖံၫဖူၫ ၥၭၡါလဖၪ ဆၧထံၪလၩ့ဒီၪလၩ့အီၪဝ့ၫဒၪအဂဲး ပန့ဘၪဆၧပရၧၫ့ ဘဲၫယီၩအၥိၭနီၪလီၫႉ

နးအဲၪဖီၫဘွၩ