ဝံးတခိၩ့ စံၫ့ဂၠိၩဇဲၭ စံၫမ့ၫနရံၫ ၦလၧကကဲၪထၪ့ ၥၫ့မုၥၫ့ခၫလဖၪ အယူၩဘလံၫ

နံၪ့၂၀၂၅နံၪ့ လၩယူၫ၂၈ၥၫ့နီၪ ဆၧမၩလၩမၩဖၩ့ ဝံးပဲခူး၊ စိန်ဂျိုးဇက် မိုင်းနား စေမနာရီ အယူၩဘလံၫလၧ ဝံးပဲခူး စိန်ဂျိုးဇက် မိုင်းနား စေမနရီ လးဝၩ့ဖၧၩ့နီၪလီၫႉ

 လၧဘိၪ့မုနံၩမံဆၩဆၧလုထၪ့အဖၧၩ့ ၦလၧအလ့ၩခိၪလ့ၩနါ မံဆၩဆၧလုထၪ့နီၪ မွဲဝ့ၫဒၪလၧ ထအၫ့ ဆၧအီၪကီၪ့ Bishop Stanislaus Min Ko နီၪလီၫႉ  

လၧမံဆၩဆၧလုထၪ့ဖၧၩ့ ၥၫ့ခၫဒိၪFr.မာစီအန်သက်ကျော် လီၩလၩ့လၬလၩ့ဝ့ၫဒၪ “ၦကဲၪၥၫ့မုၥၫ့ခၫလဖၪ အဆၧၥၭမၧၫ့နီၪ မွဲကဘၪမၩဆၧၩ့ ၦၡၪ့ၦယၬဖိၪၥံၪလဖၪနီၪလီၫႉ ပလု ထၪ့မံဆၩဆၧလုထၪ့ ပလီၩလၩ့လၬလၩ့န့ၫ ယွၩလူယွၩထၫလီၫ လကၭဘၪတၭ လၧဆၧအီၪ ကီၪ့အဂး လၧခရၧၫ့လဖၪအဂး ပဝ့ၫၥံၪယီၩ ပကဘၪကျ့ၭစၨၭထၪ့  ဘဲၫၦလၧအအိၭထူၭဆၧ လဖၪအၥိၭနီၪလီၫႉ ခီၫခီၫပကဆၧၫ့နၩ့ခိၭ ပကကဲၪထၪ့ဘၪ ၥၫ့ခၫအမုနံၩအဂးနီၪ ပန့ထၬဘၪ ဆၧၥ့ၪဆၧဘၪလဖၪနီၪ ပကဘၪၥိၩ့ထၪ့လၧ ၦၡၩအဂးဂီၩ့ ပကဘၪကဲၪထၪ့ ၦလၧအအိၭထူၭ ဆၧလဖၪနီၪလီၫႉ ၥၫ့ခိၪဒိၪ ဂါဗြီအဲလ်မန်းသိုဟေး စံၭထးဝ့ၫဒၪ စေမနရီကၠီးနီၪ မွဲလၩ့ဂၬ ဘဲၫထံၫချိၬ လၧအဖ့ၪလၫ့လၩ့အၥၭအၥိၭနီၪလီၫႉ စေမနရီ ဆၧမၩလိၪဖိၪလဖၪနီၪ ဘၪအီၪပဲၩ့ ခွံၬ အၥၭလုလဖၪ ဘၪယိၭထၪ့အထုၪ့စူၪယၫလဖၪဂီၩ့ ကဖိၬထၪ့ကဆါယွၩအခဲၫ့အဂး ဘၪအီၪ တဲၩ့ဝဲၩဆိၫထၬအၥၭ ၦလဖၪလီၫႉ”အဂဲး ၥၫ့ခၫသက်ကျော် လီၩလၩ့လၬလၩ့ဝ့ၫ ဘဲၫနီၪအၥိၭနီၪ လီၫႉ

လကၭဘၪ မဲၩ့နၩစံၫမ့ၫနရံၫ ဆၧမၩလိၪဖိၪၥံၪလဖၪ ဘၪလီၩၥ့ၪယၫလၩ့အဂဲးအဖး ဆၧထံၪလၩ့ဒီၪလၩ့အီၪဝ့ၫဒၪနီၪလီၫႉ လၧဆၧထံၪလၩ့ဒီၪလၩ့နီၪအဖၧၩ့ အီၪဂဲၫလၧ ညောင်လေး ပင် ဆၧအီၪကီၪ့ Linus Saw Eh Do Say နီၪစံၭဝ့ၫဒၪ “လၧယဆၧအီၪကီၪ့ဖၧၩ့နီၪ ၥၫ့မုၥၫ့ခၫ အီၪၡၩဂီၩ့ ၥၫ့မုၥၫ့ခၫၥံၪ အ့ၪမွဲလ့ၩထီၩ့စိၩလၧပတဝၫ့အခၫ လ့ၩလီၩ့ဖ့ၪလၫ့အ့ၪ ၦဆူနဲၩဖိၪၥံၪ ကိၪဘိၪ့ဆံၫ့ဎံၪနီၪလီၫႉ ယဒၪဘၪဆၧအဂဲးယီၩဂီၩ့ ယစံၭလၩ့ယၥၭ ယကဘၪကဲၪထၪ့ ၦလၧ အလူဒိၪဎွ့ၩဒိၪအီၪလဂၩနီၪလီၫႉ“ပကဘၪကူၭဝ့ၫဒၪအီၪအၪမၬလါနၫ့ ၦလၧကကူၭဆၧနီၪ အီၪဝ့ၫဒၪ ၡၩၡၩဖိၪလီၫ” မွဲလၧဆၧချဲၩ့ယီၩအကၠီၩ့ဆ့ ယဂဲၫထီၩ့စိၩလၧ စံၫမနရံၫကၠီၩ့ယီၩနီၪ လီၫႉ”

လကၭဘၪ အီၪဂဲၫလၧ အ့ၩစံၫ့ ဆၧအီၪကီၪ့ John Paul Saw Myat Min Thuနီၪဆ့ ဆုးထဲၩ့စံၭဝ့ၫဒၪ “ယဒၪဘၪၥၫ့မုၥၫ့ခၫလဖၪ အဆၧၥၭမၧၫ့ႇ လုထၪ့မံဆၩဆံၫ့ဎံၪလဖၪႇ လကၭ ဘၪ ၦဆံၫ့ဎံၪထရ့ၫဇၩ အဆၧအၪ့ကံၩ့ဘၩဆိၪဖၪဆၧ အဆၧၥၭမၧၫ့နီၪဂီၩ့ ယမိကဲၪထၪ့ ၥၫ့ခၫ အကၠီၩ့ ယဂဲၫထီၩ့စိၩလၧ ဆၧအလးယီၩနီၪလီၫ” အဂဲး စံၭဝ့ၫဒၪနီၪလီၫႉ

လကၭဘၪ Rev. Fr. Peter Thein Soe လီၩလၩ့လၬလၩ့ဝ့ၫဒၪ “ပယူၭယၪ့ ၥၫ့မု ၥၫ့ခၫလဖၪနီၪ မီၪ့ဎီၩ့ဒၪပယူၭယၪ့ ကဆါယွၩနီၪလီၫႉ ပကဘၪၥိၫ့ထၪ့ ၦၡၩလဖၪ လၧကဆါ ယွၩအအီၪနီၪ မွဲၥၫ့မုၥၫ့ခၫလဖၪအမူၩဒၩနီၪလီၫႉ ပကဲၪစေမနရီဆၧမၪလိၪဖိၪလဖၪယီၩ တခၩ ပကမၩဆၧနးမံၩ့နီၪ အယီၩမွဲကဆါယွၩ အခိးအတၩအဂဲး ပကဘၪၥ့ၪယၫနၪၥ့ၪထၬနီၪလီၫႉ” အဂဲး အဝ့ၫယီၩ ၥီၪ့ၥၫ့ဘၪ ဆၧမၩလိၪဖိၪၥံၪ ဘဲၫယီၩအၥိၭနီၪလီၫႉ

Rev. Fr. Francis Dass နးဆ့ “ယူၩဘလံၫအနံၪ့ယီၩ မွဲကဆါယွၩ အဆိၪဂ့ၩဆိၪဘွၩ ယွၩလၩ့ဝ့ၫဒၪအနံၪ့နီၪလီၫႉ လၧနံၪ့ယီၩအဖၧၩ့ ပဒိၭန့ဘၪ ဆၧယၫ့ၥၭ ဆၧကွဲၪဖျါနီၪလီၫႉ”

Rev. Fr. Paulu Klo Htoo နးဆ့ ဆုးထဲၩ့စံၭဝ့ၫဒၪ “စံၫမနရံၫယီၩ လၩ့ဂၬဝ့ၫဒၪ တၩ့ဆိၫဆၧမၩလိၪလးအကၠီၩ့ ၥၫ့မုၥၫ့ခၫၥံၪႇ မံၭထၭမုၪ မံၭထၭခွၫၥံၪလဖၪ အဆၧအၪ့ၥီၪ့နီၪ နၥံၪကဘၪအီၪက့ၪဒိၪ နၥံၪကဘၪခိၭနၪ” အဂဲး စံၭဘၪ ဆၧမၩလိၪဖိၪၥံၪ ဘဲၫယီၩအၥိၭနီၪလီၫႉ

လၧခဲၫ့ထုၬနီၪ  ၥုၪ့လၩ့ ၥ့ၭအထံၭ ၄ထံၭဂီၩ့ အီၪပထုၬခွံၬ ဆၧထံၪလၩ့ဒီၪလၩ့လဖၪနီၪလီၫႉ ဆၧအယီၩ မွဲလၧယူၩဘလံၫအဆၧနဲၪ့ဂီၩ့ ဘၪၥုၪ့လၩ့ ၥ့ၭအထံၭ၄ထံၭယီၩ အခီၫပယီၫနီၪဘိၭ မွဲဝ့ၫဒၪလၧ “စံၫမ့ၫနရံၫယီၩ လၧခဲၫ့လၧယၫခီၫ ကဘၪလ့ၩထၪ့လ့ၩထီၫဝ့ၫဒၪ” အခီၫပယီၫအဂဲး ပန့ဘၪဆၧပရၧၫ့ ဘဲၫယီၩအၥိၭနီၪလီၫႉ ဆၧပရၧၫ့ယီၩ ပအၪ့န့ထၬလၧ RVA ဖျိၩ့ၡၩ့ ဆၧထံၪ လၩ့ဒီၪလၩ့အအီၪနီၪလီၫႉ

နးအဲၪဖီၫဘွၩ