ၦဆံၫ့ဎံၪ  Philip Neri   အဂဲး

လၧဎြံၬဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ  မံၩ့ဎိၩၥၪဖျီၪ မုခွၫလၧအအီၪအနိၪ့ အဆၧရၩလၩ့ဖၧၩ့  မုကနံၩယီၩ ယအဲၪဒိၭ ရၩလၩ့န့အ့ၪဘၪနၥံၪနီၪ ၦလၧ လဒိၭန့ဘၪ ဆၧမုၬဆၧလၩၥံၪ အဝ့ၫၥံၪ ကန့ထၪ့ဆၧမုၬဆၧလၩအဂး ဘၪဒိၭနဲၩၥၭ မွဲဝ့ၫ ၦဆံၫ့ဎံၪ Philip Neri   အဂဲးအကၠီၩ့နီၪလီၫႉ ၦဆံၫ့ဎံၪ Philip Neri   ယီၩ အီၪဖျဲၪလၧ နံၪ့ (၁၅၁၅)  နံၪ့ လၧ ခး Italy ဝံး Florence နီၪလီၫႉ အဝ့ၫယီၩ အထၧၫ့ဖုဝဲအီၪ (၄) ဂၩနီၪလီၫႉ အမိမိၥံၫဖီၩ့ခွံၬဒၪအဝ့ၫၥံၪ အကၠီၩ့နီၪ အဖါဖါနီၪ အၪ့န့ထၪ့ အမၫလၧခဲၫကဂၩနီၪလီၫႉ အဝ့ၫၥံၪအမိယါနီၪ အဲၪအဝ့ၫၥံၪ ဘဲၫၥိၭ အမိအထံၭနီၪလီၫႉ  ၦဆံၫ့ဎံၪ Philip Neri   ယီၩ ခီၫလၧဖိၪၥၫအခံၫ့ဒၪအိၩ ခိၭနၫမိဖါအဆၧချဲၩ့ ဂီၩ့ ဘၩဆိၪဖၪဆၧၥ့ၪ အၪမၬဒ့ၭနီၪလီၫႉ

အဝ့ၫယီၩ လ့ၩဂါလၧ Domini ၥၫ့ခၫၥံၪအီၪ ခိၪမၬခိၪမၬနီၪလီၫႉ အဝ့ၫကဘၪဒိၭန့ဆၧန့ၥၫအဂး အဝ့ၫအၥၭအီၪ (၁၈) နံၪ့နီၪ အဖါဖါ့လ့ၩၥိၫ့ထၬ အဝ့ၫလၧ ၦကဲၪဒိၪကဲၪမုၬ အမၩ့စီၩအီၪနီၪလီၫႉ ၦဆံၫ့ဎံၪ Philip Neri   ယီၩ မၩခီၫ့ၡၩဂး ၥ့ၪအၬမၬဒ့ၭဂီၩ့ အမၩ့စီၩအဲၪအဝ့ၫအၪမၬဒ့ၭနီၪလီၫႉ လါနၫ့ အဝ့ၫယီၩ န့ထၪ့ဘၪ ဆၧန့ၥၫဒၪဆၧ အၥၭနီၪအဲၪဒိၭ မၩၥၫထနၫဆၧမၩနီၪလီၫႉ ဆၧနီၪအကၠီၩ့ အဝ့ၫလ့ၩလၧ ဝံး Roma နီၪဂီၩ့ လ့ၩမၩဆၧမၩလၧ ၦဒိၪအဂံၪ့နီၪလီၫႉ အဝ့ၫအီၪအဂးႇ အၪ့အဂးအလံၩ့နီၪ ၥီၪ့အ့ၪ ၦဒိၪအဖိၪနံၫဂၩ လံၬနီၪလီၫႉ အဝ့ၫအီၪထနီ အခံၫ့နီၪ ဘၩကၠဲၬ အီၪလၧကၠဲၬလူကၠဲၬထၫ ကိၭနံၩနီၪလီၫႉ လကၭဒ့ၭဘၪ အဝ့ၫယီၩဘၪၥီၪ့အ့ၪ ၦခွၫၥံၪလံၬနီၪလီၫႉ

လၧခဲၫနီၪ ၥီၪ့လံၬလၧအ့ၬ အၪ့ဆၫ အလံၬအုၬၥံၪဂီၩ့ ထီးန့ကဒီၪ့နီၪ ဖ့ၪအ့ၪ ၦၡၪ့ဖိၪၥံၪထီးအလူၬနီၪလီၫႉ အနီဂီၩ့ အဝ့ၫလ့ၩနုၬလၩ့လၧ Augustianians  အခရၧၫ့ဖၧၩ့ဂီၩ့ ယိၦလၧအီၪလဆီၪ့ဘၪၥံၪနီၪလီၫႉ လၧခဲၫနီၪအဝ့ၫ ကဲၪထၪ့ ၥၫ့ခၫကပၩနီၪလီၫႉ ၦဆံၫ့ဎံၪ Philip Neri ယီၩ တရါလၩ့ကဆါယွၩ ဆၧပရၧၫ့ ၥ့ၪဂ့ၩဂ့ၩဘၪဘၪအကၠီၩ့နီၪ ပၡၩကိၭအဝ့ၫလၧ အၥီၫ့နီၪလီၫႉ လကၭဒ့ၭဘၪ အဝ့ၫယီၩ မၩနံၦၡၩၥ့ၪႇ မၩမုၬၦၡၩအၥၭၥ့ၪႇ ၦၡၩလနၩ့နၩ့ အၥၭခံဖၧၩ့ ဆၧမုၬဆၧလၩ လအီၪဘၪအခံၫ့ အ့ၪဒၪဘၪ အဝ့ၫႇ ခိၬနၫဘၪ အဝ့ၫအဆၧချဲၩ့စွါဘဲၫ န့ထၪ့ဘၪ ဆၧမုၬဆၧလၩ ကိၭဂၩနီၪလီၫႉ

လၧခဲၫနီၪ အဝ့ၫကၧၩ့ထၪ့ အဖုၫနီၪမွဲဝ့ၫ Congregation of the Oratory နီၪလီၫႉ ပကိဝ့ၫလၧ ပယၩ့ခီၫနီၪ (ကတိသစ္စာပြုစရာမလိုဘဲ ဆက်ကပ်ခြင်း) နီၪလီၫႉ အဝ့ၫယီၩဆၧဖံၭထံၩဖံၭၥိၭအီၪဂီၩ့ မၩမုၬၦၡၩအၥၭၥ့ၪ အၪမၬဒ့ၭအကၠီၩ့နီၪ ၦဂူၫဂၩ ဂဲၫဂၬလၧအဝ့ၫအီၪ အဆၧၫ့ထုၬနးကၠၪအ့ၪနီၪလီၫႉ လၧခဲၫ့ထုၬနီၪ အဝ့ၫအီၪမုၬအီၪဆီၪ့အ့ၬဂီၩ့ အၥၭအီၪ (၈၀)  နံၪ့ (၁၅၉၅) နံၪ့ မ့ၫ (၂၆ ) ၥၫ့ နီၪၥံၫဖီၩ့ခွံၬဝံၫဒၪနီၪလီၫႉ ၦဆံၫ့ဎံၪ Philip Neri   ယီၩ အီၪလၧ ဆၧမုၬဆၧလၩ့ ဖံၭထံၩဖံၭၥိၭလၧ ၦၡၩကိၭဂၩႇ ချဲၩ့ဒၧၫ့ၦၡၩလၧ ဆၧနံမွံၪ ကိၭကၠၪဂီၩ့ ၦလၧလဒိၭန့ဘၪ ဆၧမုၬဆၧလၩၥံၪလဖၪ ဘၪဒိၭနဲၩၥၭ မွဲဝ့ၫ ၦဆံၫ့ဎံၪနီၪအကၠီၩ့ ယရၩလၩ့န့အ့ၪဘၪနၥံၪလၧ    ဆၧအဲၪဆၧကွံၩ   ဎိၩဒိၪဖၧၩ့နီၪလီၫႉ  အဲၪကွံၩဘၪ ထၧၫ့ဖုဝဲ ထံၩၥိၭထီးအလူၬႇ မွဲနၥံၪလၧၫ့ဎွ့ၩဝ့ၫဒၪလၧ ကဆါယွၩ အဆၧအဲၪဆၧကွံၩလါဆံၭႉ