ဒီၩကလုခရၧၫ့

ဘဲၫၦဖျိၩ့ဆၧကိၪ့ဘၪဆၧၥ့ၪလ့ၩထၪ့လ့ၩထီၫအၥိၭ လၧၫ့ဎွ့ၩထၪ့ဝ့ၫလၧ ထီအဆၧၥ့ၪယၫနၪၥ့ၪႇ ဆၧကိၪ့ၥ့ၪကိၪ့ဘၪ ဖျိၩ့ၥၭဘၪ့လဖၪ ဂဲၫအီၪထၪ့ဝ့ၫဒၪနီၪလီၫႉ မွဲဆၧဘဲၫနီၪ ပဒၪဘၪ ဖျိၩ့ၥၭဘၪ့ၥံၪ ဖိၬလိၬထၪ့ ၦဖျိၩ့ဆၨၩခရၧၫ့န့နီၪလီၫႉ နံၪ့ ၁၈၈၁နီၪ ဒီၭတၫ တံၫၥၫ့ပၠၫ မၩကဲၪထၪ့ ၦဖျိၩ့ဆၨၩဒီၭကလုခရၧၫ့ဂီၩ့ အဝ့ၫလ့ၩခိၪလ့ၩနါ ဘဲၫၦဖျိၩ့ဆၨၩကလ့ၩထၪ့လ့ၩထီၫအဂး ကျ့ၭစၨၭဖီၪ့ထၪ့ ဖံၭထၪ့ဝ့ၫနီၪလီၫႉ

            ၦဖျိၩ့ဆၨၩခရၧၫ့အခၪ့ထံၭ ဒီၩကလု (KNA – Karen National Association) နီၪ စၭထၪ့ဖိၬလိၬထၪ့ဝ့ၫလၧ ၁၈၈၁နံၪ့နီၪလီၫႉ ဒီၩကလုနီၪ အီၪထၪ့ဂီၩ့န့ YMBA အခရၧၫ့ (၂၅) နံၪ့ဂီၩ့ လၧခဲၫ့ ဂီၩ့န့ဒံၭ အံၫ့ဒံၩယါကိၩဂရဲၭ၂နံၪ့ဒံၭတၭ ဆၧကိၪ့ဘၪကိၪ့ၥ့ၪအနိၪ့ ထံၫဂဲးခးဂဲးအဆၧဒၪနီၪ ဆၧဒၪဎီၩ့ဆၧၫ့ယၫ အၪန့ၦဂူၫဂၩနီၪလီၫႉ ခိၪလၩဘွၩ ပယၩ့ ဆၧဒုၭၥုၭကဲၪထၪ့ နံၫဘျၩ့လဘျၩ့ (၁၈၅၂) နံၪ့နီၪဂီၩ့ ခးပယၩ့လၬကကဲၩ့နီၪ ဘၪဖ့ၪလၫ့ခွံၬ ခိၪလၩဘွၩၥံၪနီၪလီၫႉ ဝံးတခိၩနးဆ့ မွဲထီၩ့လၧ ခိၪလၩဘွၩၥံၪအဆၧပၧၩ့ဖၫ့လၬနီၪလီၫႉ ဝံးတခိၩနီၪ ဘၪအီၪလၧ ခိၪလၩဘွၩအဆၧပၧၩ့အဖၫ့လၬ ယံၬဝ့ၫဒၪ ၂၉နံၪ့ အထီနီၪ ဖိၬလိၬထၪ့ ဒီၩကလုၫခရၧၫ့ဖၭဒိၪ န့ဝ့ၫဒၪ ပျီၩပျီၩဖျ့ၭဖျ့ၭနီၪလီၫႉ လၧစဎွၩအထီဒၪအိၩနီၪ မွဲခရၧၫ့ၥံၪ မွဲဆၧန့ ဂ့ၩဂ့ၩနးမံၩ့အ့ၬႉ ခးပယၩ့စဎွၩလဖၪ အစီၩ့အမၩဎိၩဝ့ၫအခံၫ့လီၫႉ

            ဒီၩကလုခရၧၫ့ယီၩ အဆိၪထုၬ ခိၪနါဒိၪနီၪမွဲ ဒီၭတၫ တံၫၥၫ့ပၠၫနီၪလီၫႉ နဲၪရွဲ အဆိၪထုၬလဂၩနီၪမွဲ အူၩလူၫနံၫ (စီၩဆ့ၭဒနံၫလူၫနံၫ အဖါဖါၥၭဘီၩ့) နီၪလီၫႉ ၦလၧဖီၪ့ထၪ့ဖံၭထၪ့ဆၧ ခိၪနါအဂူၫဂၩလဖၪနီၪမွဲ ဒီၭတၫ မၠၭစၫ့ႇ အူၩရွ့ၫမီၫအိၫႇ ဆရၫစီၩတ့ၫၥံၪမွဲပၫဆ့နီၪလီၫႉ

ဒီၩကလု ခရၧၫ့ဖၭဒိၪ ခိၪနါလဖၪ ဂဲၫထဲၩ့ကျ့ၭစၨၭဖီၪ့ထၪ့ဖံၭထၪ့ အီၪထးလၧ ဖးဖီၩ့ဖၧၩ့ဖၧၩ့နီၪ မွဲ ၦဖျိၩ့နံၪ့ထၪ့ၥၫ့ မုနံၩဒိၪ ကမံၩ့လီၫ လကၭဘၪ ၦဖျိၩ့ဆၨၩနိၪတၧၩ့ယါႇ ၦဖျိၩ့ဆၨၩဆၧၥၭအွံၪႇ ၦဖျိၩ့ဆၨၩအမံၩ့အမ့ၬယၫ ဆၧနဲၪ့လၧအနဲၪဖျီၪ့ထၪ့ဆၨၩၥံၪနီၪ မွဲၦဖျိၩ့လဖၪအဂး မၩဖျီၪ့ထၪ့ထးဝ့ၫန့နီၪလီၫႉ ဆၧလဖၪၥံၪယီၩ မွဲန့ယီၫယီၫအ့ၬ မွဲမၩထၪ့ဝ့ၫလၧ ပဒိၪပမုၪၥနိၫၥံၪအကျၩနီၪလီၫႉ

လကၭဒံၭဘၪ ၦဖျိၩ့ဆၨၩအၥၭၥွံၪဖျီၩ့မွဲဝ့ၫ ဖျိၩ့လံၬလဲနီၪနးဆ့ လၧပဒိၪဆၧမၩလိၪလးအဖၧၩ့ တၩ့ကျၩ ထီးထီၩ့ တၩ့ထီၫ ဆၧၥီၪ့လိၪကန့အဂး ပကဒၪဘၪကျ့ၭစၨၭမၩထၪ့ထၬဝ့ၫနီၪလီၫႉ အထီအနီၫဒၪအိၩ လၧပဒိၪဆၧမၩလိၪလးဖၧၩ့ ဆၧၥီၪ့လိၪ မွဲန့ဆ့ဒံၭနီၪလီၫႉ အီၪဂုးခၧၫ့ဝ့ၫဒၪ (၆၂) နံၪ့ ဒီၩကလုခရၧၫ့ဖၭဒိၪယီၩ ၦဖျိၩ့ထၧၫ့ဆၨၩယၫအဂး ဖျီၪ့ထၪ့ထးလၧဖးဖီၩ့ဖၧၩ့ ဎိၩဒိၪဝ့ၫဒၪ ဖီၪ့တၨၩလဖၪ ဂဲၫထဲၩ့မၩထၪ့ဝ့ၫန့အၪမၬနီၪလီၫႉ လၧဆၨၩအဂး မွဲဒံၭ လၧမ့ၪလၪအနဲၪဖၧၩ့ၥၭ ဒံၭနီၪလီၫႉ