လၧဎြံၬဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ မံၩ့ဎိၩၥၪဖျီၪ မုခွၫလၧအအီၪအနိၪ့ အဆၧရၩလၩ့ဖၧၩ့ မုကနံၩယီၩ ယအဲၪဒိၭ ရၩလၩ့န့အ့ၪဘၪနၥံၪနီၪ မွဲဝ့ၫဒၪ မိမိၥံၪႇ ၥံၪ့ဎွံၪဆရၫၥံၪ ဒဲ ဖိၪၥၫအီၪဖျဲၪၥၫ့ၥံၪအဂး ဘၪဒိၭနဲၩၥၭ မွဲဝ့ၫ ၦဆံၫ့ဎံၪ Gianna Beretta Molla အဂဲး အကၠီၩ့နီၪလီၫႉ ၦဆံၫ့ဎံၪ Gianna ယီၩ အီၪဖျဲၪလၧ နံၪ့ (၁၉၂၂) နံၪ့ လၩ အီၫဒိၪဘၪ (၄) ၥၫ့ လၧ ခး Italy ႇ ဝံး Magenta နီၪလီၫႉ ၦဆံၫ့ဎံၪ Gianna ယီၩ အထၧၫ့ဖုထၧၫ့ဝဲအီၪ (၁၃) ဂၩနီၪလီၫႉ အဝ့ၫယီၩ ခီၫလၧ ဖိၪၥၫအခံၫ့ဒၪအိၩ ၥီၪ့လိၪန့ဘၪ ကၭၥလ့ၬ ဆၧကိၪ့ဘၪ ကိၪ့ၥ့ၪဒဲၪ ဆၧဆူၩနဲၩ လၧအမိမိဖါဖါအီၪ ဂ့ၩဂ့ၩဘၪဘၪနီၪလီၫႉ
ဆၧနီၪအကၠီၩ့ အဝ့ၫန့ထၪ့ဘၪ အၥၭမၧၫ့ယီၩအဂးနီၪ ဆံၭခိၭဆံၭတၩဘၪ ကဆါယွၩကိၭကၠၪနီၪလီၫႉ နံၪ့(၁၉၄၂) နံၪ့ ဆၧဒုၭထၪ့ နံၫဘျၩ့လဘျၩဖၧၩ့နီၪ ၦဆံၫ့ဎံၪ Gianna ယီၩ မၩလိၪၥံၫ့ဎွံၫဆၧမၩလိၪနီၪလီၫႉ အဝ့ၫယီၩ ဆၧဆူၩနဲၩဂၧးခၧၫ့ဂီၩ ကျ့ၭစၨၭမၩလိၪလံၬ အၪမၬဒ့ၭနီၪလီၫႉ လကၭဒ့ၭဘၪ ၦဆံၫ့ဎံၪ Gianna ယီၩ ယိၦၥၭၡါၥံၪ ဒဲၦလၧအၪ့လအီၪဘၪၥံၪနီၪလီၫႉ နံၪ့ (၁၉၄၉) နံၪ့ နီၪ လၧ (Pavia) ဘျၪ့ကိၪဒိၪနီၪ အဝ့ၫ န့ဒံၫကရံၫဂီၩ့ နံၪ့ (၁၉၅၀) နံၪ့ နီၪ ဝဲထၪ့ နၫ့ဆါအဆၧ ဆၧဆၫဂံၪ့လၧ အဝ့ၫ အီၪ ဝံး Magenta နီၪလီၫႉ လကၭဒ့ၭဘၪ နံၪ့ (၁၉၅၂) နံၪ့ နီၪ ၥီၪ့လိၪထဲၩ့ ကဘၪဘၠၩ့ဖိၪၥၫ ဆၧမၩလိၪဂီၩ့ ဘၠၩ့အ့ၪ ဖိၪၥၫဒဲ အမိႇ ၦၥၭၡါၥံၪ ဒဲ ၦလၧဘၪ အီၪလၧဆၧၡၪ့ဆၧနါၥံၪနီၪလီၫႉ
ၦဆံၫ့ဎံၪ Gianna ယီၩ အဝ့ၫမၩလိၪထၬ ၥံၫ့ဎွံၪဆၧမၩလိၪနီၪ ၥိၩ့ထၪ့ဝ့ၫလၧ အဝ့ၫမၩ ၡၩခံးဂးဒဲ ၥၫထနၫဆၧမၩဖၧၩ့ ကဆါယွၩအဂး ဖ့ၪလၫ့လၩ့ၥၭလၧ ၥၧၫ့ဂ့ၩၥၭဘွၩနီၪလီၫႉ ၦလၧဂဲၫအဝ့ၫ အဆၧဆၫဂံၪ့ ကိၭဂၩနီၪ ကိၭဖံၭၥိၭဝ့ၫလၧ ဆၧနံမွံၫနီၪလီၫႉ နံၪ့ (၁၉၅၄ ) နံၪ့နီၪ အဝ့ၫထၪ့ၡါလၧ Pietro Molla ဂီၩ့ အဖိၪန့ ၥၧၫ့ဂၩနီၪလီၫႉ အဝ့ၫကအီၪဖျဲၪထီ အဖိၪလၧခဲၫကဂၩအခံၫ့နီၪ အဝ့ၫဘၪထိး ဒၧၩ့လး အချံၫဖျိၪ့ ဆၧဆၫနီၪလီၫႉ ဆၧနီၪအကၠီၩ့ ၥံၫ့ဎွံၪဆရၫ စ့ၭအဝ့ၫနီၪ နကဘၪရွံထၪ့ဖၧၩ့ၥၭကအီၪနံၫမံၩ့ ယကဘၪပဒၩ့နၥၭဧၪႇ ဖိၪၥၫအၥၭဧၪနီၪလီၫႉ ၦဆံၫ့ဎံၪ Gianna ယီၩ ယကရွံထၪ့ ဖိၪၥၫအၥၭႇ ယကပဒၩ့ထၬဖိၪၥၫအၥၭ နီၪအကၠီၩ့ စ့ၭထဲၩ့ ၥံၫ့ဎွံၫဆရၫနီၪလီၫႉ
အဝ့ၫအီၪဖျဲၪန့ အဖိၪခွၫဂီၩ့ လၩ့မၬယံၬ (၇) ၥၫ့ လၩ့ April (28) ၥၫ့ (၁၉၆၂) နံၪ့နီၪ ၥံၫဖီၩ့ခွံၬဝ့ၫဒၪနီၪလီၫႉ အဝ့ၫၥံၫဖီၩ့ခွံၬဂီၩ့ ၥၫ့ဎွၩ John Paul နံၫ ရွံထၪ့အဝ့ၫ ၦဆံၫ့ဎံၪ နီၪလီၫႉ ဆၧနီၪအကၠီၩ့ ၦဆံၫ့ဎံၪ Gianna ယီၩ မိမိၥံၪႇ ၥံၫ့ဎွံၪဆရၫၥံၪ ဒဲ ဖိၪၥၫအီၪဖျဲၪၥၫ့ၥံၪ ဘၪဒိၭနဲၩၥၭ မွဲဝ့ၫ ၦဆံၫ့ဎံၪ နီၪအကၠီၩ့ ယရၩလၩ့န့အ့ၪဘၪနၥံၪလၧ ဆၧအဲၪဆၧကွံၩ ဎိၩဒိၪဖၧၩ့နီၪလီၫႉ အဲၪကွံၩဘၪ ထၧၫ့ဖုဝဲ ထံၩၥိၭထီးအလူၬႇ မွဲနၥံၪလၧၫ့ဎွ့ၩဝ့ၫဒၪလၧ ကဆါယွၩ အဆၧအဲၪဆၧကွံၩလါဆံၭႉ