အဝ့ၫဂဲၫထဲၩ့ထီၩ့ဂံၪ့ကထံၪဎး ၥ့ၪယၫဝ့ၫလၧ အဝၩထဲၩ့စဲၪ့တၭ အၪ့န့ထၪ့အဖိၪဂီၩ့ လ့ၩလီၩ့အဝၩလါနၫ့ မွဲလချုၭလၧၩ့ဘၪတၭ ဂၪ့ကိၭၡၭအလူ ဆိၪအဝၩနီၪလီၫႉ ဒိၭခၩမုၪနးခၫရံၫနီၪ ဆိၪအဝၩဘဲၫၥ့ၪလဲၪစွါဘဲၫ ကဎုၬယီၩ ၦဒူၩဖိၪအီၪက့ၪထးအဝ့ၫ ဘၪလီၩ့ဝ့ၫ လၧဆၧၡၪ့ဆၧနၭအဖၧၩ့ အၥၭထ့ဖၭအကၠီၩ့ နးဎုၬဒီၭနီၪ မွဲၦဒူၩဖိၪ ဘၪဂဲၫလီၩ့ထဲၩ့အဝ့ၫ ဘဲၫယီၩၥိၭအကၠီၩ့ အၪ့န့အဖိၪအခၪ့နံၫခီၫနီၪဂီၩ့ အိၭၡၬဝ့ၫဒၪနီၪလီၫႉ ဖိၪၥၪအခၪ့ကကဲၩ့နီၪ ခွံၬၡိၬစိၩဝ့ၫလၧ ၦဒူၩဖိၪအီၪဂီၩ့ အီၪထးကကဲၩ့နီၪ အဝ့ၫဎုထၪ့ခွံၬနီၪလီၫႉ ဂီၩ့နီၪ အဝ့ၫ နၪ့ထၪ့ ၥၭယူ အၥၭဆၫ အဝၩၥၭဘီၩ့ဒဲ အဖိၪမုၪဆံၭ အၥၭထ့ဖၭ ၥံၫထးလၧ ထံၫနဲၩ့ထံၭနီၪလီၫႉ ၦဒူၩဖိၪနးဆ့ မွဲအဲၪအဖိၪအမၫဆ့ လၧဆၧၥုၪ့လမုၬ ၥၭလမုၬဘၪအဖၧၩ့ ဘၪထဲၩ့ထဲၩ့လၧ အခးနီၪလီၫႉ

အဝ့ၫထဲၩ့ထီၩ့လၧ အခးအခၫ ၦဒူၩဖိၪနီၪ လၥံၫဘၪဒဲ ဂဲၫထဲၩ့န့ထဲးဎုၬလၧ ဒိၭခၩမုၪၡါအၥၭတၭ ထီးမၩၥံၫအဝ့ၫလဂ့ၩအဂး ဒိၭခၩမုၪၡါနီၪ အၪ့ယၫၦဒူၩဖိၪအမံၩ့မံၩ့နီၪလီၫႉ ၦဒူၩဖိၪလဂၩ အၥၭဆၫအကၠီၩ့ ဒိၭခၩမုၪၡၩ့အၪ့ယၫအဝ့ၫနီၪ မွဲလခိၭနၪဘၪဝ့ၫဒဲ ၦခမျၧးၥံၪ ဂဲၫစူၭကီၪ့လၫ့အၥၭအထီနီၪ မၩထ့ဖၬခွံၬ ထံၫလူၩၥၪနီၪကထံၪဎး ဒိၭခၩမုၪၡါနီၪ ကဲၪ့ထၪ့ဒိၭခၩကထံၪလီၫတၭ ၦခမျၧးၥံၪလၪဖ ၡးဖျးကၠၭနီၪလီၫႉ ၦလၧအၥၭမဲၪဆၧ အနၭထုၬနီၪ မွဲစဎွၩဖၭဒိၪလီၫႉ အဝ့ၫဂဲၫထဲၩ့အီၪဎုၬအနံၪ့ယံၬယူၭလါနၫ့ မွဲလၥ့ၪယၫဘၪဝ့ၫလၧ ဒိၭခၩနးကၠၪဒဲ ၥ့ၪယၫဘၪဝ့ၫ ဘဲၫယီၩလီၫအကၠီၩ့ ခိးတၩထၪ့ ၦဒူၩဖိၪနီၪလီၫႉ ဂီၩ့နီၪ ၦဒူၩဖိၪနီၪ မွဲဒၪအဝ့ၫအဖိၪခွၫလီၫတၭ ၥ့ၪယၫဝ့ၫအခၫ ဒံၩ့အဲၪဝ့ၫဒၪဒီၭနီၪလီၫႉ ကထံၪဎး ၦဒူၩဖိၪဒဲ အမိဂါၥံၪနီၪ ကိၭထဲၩ့ဝ့ၫလၧ နီးဖၧၩ့ဂီၩ့ ထၩ့လၫ့ထဲၩ့အ့ၪဝ့ၫအမ့ၬၥၪၥံၪနီၪလီၫႉ လၧခဲၫ့ထုၬ ၦဒူၩဖိၪယီၩ ကဲၪထၪ့ထဲၩ့ စဎွၩနီၪလီၫႉ လါနၫ့ အဝ့ၫမွဲၥၭနၪ့ အမၫၥၭဘီၩ့ လန့ဘၪနးကၠၪဒဲ အၥၭမုၬအ့ၬနီၪလီၫႉ

နးခၫရံၫကမိၥံၫထီ ဘဲၫဆိၪထၬဝ့ၫအၥိၭ လၧခဲၫ့ ကဎုၬအခၫ ၦဒူၩဖိၪနီၪ ဂဲၫထဲၩ့ကဲၪထၪ့ထဲၩ့ မၩ့ၥူၫခနူၬဒဲ နးခၫရံၫနီၪ ဂဲၫထဲၩ့ကဲၪထၪ့ထဲၩ့ နးနီၩ့ခၫရံၫ ၦမုၪနၩ့ဖိၪလၧအအီၪစ့ၩခိၪလီၩ့ (ငွေတောင်ပြည်သူ)နီၪလီၫႉ လၧအဝ့ၫအဆၧဆိၪအဖၧၩ့ မၩ့ၥူၫခနူၬနီၪ အဖိၪခွၫန့ကဂၩအခၫ ခွံၬၡိၬထး အမၫဂီၩ့ ထဲၩ့ထဲၩ့လၧ စ့ၩခိၪလီၩ့တၭ မၩ့ၥူၫကနူၬဆ့ ဘၪထိးဆၧကၪဆၧဂဲၩ့အမံၩ့မံၩ့ဂီၩ့ လ့ၩလီၩ့ဎွါထဲၩ့ နးနီၩ့ခၫရံၫ ထီးအဒၪဝ့ၫဒၪနီၪလီၫႉ