နံၪ့၂၀၂၅နံၪ့ လၩယူၫ၇ၥၫ့အဂၫလၩ့ ၇နၩရံၫခီၫအခံၫ့နီၪ ခးပယၩ့ထၧၫ့ဘံၪ့ယၫ ဆၧအီၪ ကီၪ့ဆရၫ ဆရၫမုၪ အဆၧမၩလိၪလးမိထုၪ့ အီၪဝ့ၫဒၪအလး ဝံးမၠီၩ့မၠၭနီၪ ဆရၫ ဆရၫမုၪၥံၪ အဂး၂၀၂၅-၂၀၂၆ဆၧမၩလိၪလံၬအနံၪ့ဝဲထၪ့ ဆၧထံၪလၩ့ဒီၪလၩ့အီၪဝ့ၫဒၪနီၪလီၫႉ ၦလၧအလ့ၩ ဝဲထၪ့အ့ၪ အဝ့ၫၥံၪ ဆၧမၩလိၪလံၬအနံၪ့နီၪ မွဲဝ့ၫဒၪ ၥၫ့ခိၪဒိၪ Henry မၩ့အဲၪချဲၫ့နီၪလီၫႉ  

“ဆၧဝဲထၪ့ဆၧမၩလိၬလံၬအနံၪ့ယီၩ ပအီၪကၠၭဘၪ ဘယီၩနီၪ မွဲလၧယွၩ အခိးအတၩ လီၫႉ ဆၧအယီၩနီၪ မွဲပကဘၪထံၭလၩ့ထၬလၧပၥၭဖၧၩ့ကလိၪဝ့ၫဒၪနီၪလီၫႉ ဘဲၫနီၪအၥိၭ ကနံၪ့ယီၩနီၪ မွဲလၧယူၩဘလံၫအနံၪ့အကၠီၩ့ ပဒိၭန့ဘၪ ယူၩဘလံၫအဆၧဆိၪဂ့ၩဆိၪဘွၩ အနံၪ့ ကနံၪ့နီၪလီၫႉ

ပဝ့ၫၥံၪလဖၪယီၩ ပဂဲၫထီၩ့စိၩလၧအလးထယီၩနီၪ ဆၧအဂဲးလအီၪနးမံၩ့အဖၧၩ့ လမွဲဘၪတၭ ကဆါယွၩကိၭပၧၩအကၠီၩ့ ပဂဲၫထီၩ့စိၩလၧအလးထယီၩအဂဲး ထံၭလၩ့ထၬ လၧနၥံၪအၥၭဖၧၩ့လါဆံၭႉ လၧဆၧအလးဖၧၩ့ယီၩ မွဲနၥံၪကဘၪၥီၪ့လိၪၥၭ ယွၩလူယွၩထၫ ယွၩအဆၧၥီၪ့ဆၧၥၫ့လဖၪနီၪလီၫႉ အ့ၪနၥံၪထၪ့ဆၧမၩလိၪဖျီၫ့ဂီၩ့ကကၠၪ နၥံၪကဘၪထဲၩ့ထဲၩ့ လၧ နၥံၪအထံၪအခးဂီၩ့ နၥံၪကဘၪဆုးထဲၩ့ ရၩလၩ့ယွၩလူယွၩထၫလဖၪနီၪလီၫႉ ဆၧနီၪအကၠီၩ့ ပဝ့ၫၥံၪယီၩနီၪ ၦမွဲလၧၦဆိၬၥၫထနၫလဖၪအဂဲး ထံၭလၩ့ထၬလၧနၥံၪအၥၭဖၧၩ့ဂီၩ့ ကျ့ၭစၨၭ မၩလိၪယွၩလူယွၩထၫလဖၪလါဆံၭႉ နၥံၪဂဲၫထီၩ့လၧအလးထယီၩဂီၩ့ ကနံၪ့နံၫနံၪ့ယီၩအထး ဖၧၩ့ နၥံၪကဘၪအီၪအၪ့လ့ၩထဲၩ့လၧ အခံၫ့ႇ လၧၥနိၫ့လဖၪအဖၧၩ့နီၪလီၫႉ နၥံၪဘၪအီၪအၪ့ လ့ၩထဲၩ့ဘယီၩနီၪ မွဲလၧနၥံၪအဆၧၥၭမၧၫ့ ကလ့ၩထၪ့လ့ၩထီၫအဂးႇ ကဂၩဒဲကဂၩ ဘဲၫဂံၪ့ဒီၪ့ဖိၪအၥိၭ မွဲနၥံၪကဘၪ အီၪက့ၪလိၬၥၭနီၪလီၫႉ

နၥံၪဘၪအီၪဘဲၫယီၩၥိၭအခံၫ့ နၥံၪကဘၪအီၪက့ၪဒိၪလၩ့နၥံၪအၥၭႇ နၥံၪကဘၪ ကျ့ၭစၨၭ မၩလိၪလံၬလဲလဖၪဂီၩ့ နၥံၪကဘၪအီၪလၧ ဆၧလူဒိၪဎွ့ၩဒိၪအဖၧၩ့နီၪလီၫႉ ယွၩနီၪကမိၥိၩ့နၥံၪ အကၠီၩ့ ၥိၫ့စိၩနၥံၪလၧအလးထယီၩတၭ နၥံၪဆ့ ဖ့ၪဆၧၫ့လၩ့ထဲၩ့နၥံၪအၥၭလၧယွၩအဂး လူၬဂဲးလူၬဘၭလါဆံၭႉ အီၪလၧယွၩဘူၭဘူၭလါဆံၭႉ ကျ့ၭစၨၭကၧၩ့ဖျိၪ့နၥံၪအၥၭလၧယွၩဆံၭႉ အၪ့ကံၩ့ဘၩဆိၪဖၪလၧ ၥၭမုဆံၫ့ဎံၫအအီၪဆံၭႉ ပအီၪလၧယွၩလူယွၩထၫ ပလီၩ့ဖိၬခိၭနၪယွၩ အဆၧၥီၪ့ဆၧၥၫ့နီၪ မွဲအဂ့ၩထုၬဆၧအီၪမၧၫ့လီၫႉ” အဂဲး ၥၫ့ခိၪဒိၪယီၩ ဖ့ၪဂဲးဖ့ၪဘၭ ဆရၫ ဆရၫမုၪ လဖၪ ဘဲၫနီၪအၥိၭနီၪလီၫႉ

၂၀၂၅-၂၀၂၆နံၪ့ ဆၧမၩလိၪနံၪ့အဖၧၩ့ ဆၧမၩလိၪဖိၪဆရၫ ဆရၫမုၪလဖၪ အီၪဝ့ၫဒၪ အဂၩ၄၂ဂၩတၭ ၦလၧကဘၪထၪ့ ဆၧမၩလိၪခၪ့ထံၭအနံၪ့ အီၪဝ့ၫဒၪ၂၂ဂၩဂီၩ့ ၦလၧကဘၪ ထၪ့ဆၧမၩလိၪနံၫနံၪ့လနံၪ့နီၪ အီၪဝ့ၫဒၪအဂၩ၂၀အဂဲးႇ ဒိၩ့ပၥံၫ့ဆၧအီၪကီၪ့ႇ မီၫလမၠဲၫ့ ဆၧအီၪ ကီၪ့ႇ ကလ့ၩဆၧအီၪကီၪ့ဒဲ ဟားခါးဆၧအီၪကီၪ့လဖၪအဖၧၩ့ ဆရၫ ဆရၫမုၪလနၩ့ဆ့ မွဲဂဲၫထၪ့ ဆၧမၩလိၪယီၩဆ့အဂဲး ပန့ဘၪဆၧပရၧၫ့ယီၩလၧ Fr.Pius Win Than အအီၪနီၪလီၫႉ

နးအဲၪဖီၫဘွၩ