ၦဖျိၩ့ဆၨၩၥံၪလဖၪ ကဘၪအီၪလၧ ဒီၩ့ဝိၩၥံၪအဆၧပၧၩ့ဖၫ့လၬ လၧခဲၫ့ကကၠၪဒီၭနီၪ မွဲၦဖျိၩ့ဆၨၩဖိၪၥံၪထိးဆၧၫ့ လန့ဘၪအကၠီၩ့ နံၪ့ ၁၉၂၈နံၪ့နီၪ ဒီၭတၫစၫ့စံၫဖိၩလ့ၩလၧ ဝံးလၫ့ဒၫ့နီၪလီၫႉ အဝ့ၫလ့ၩဒၪလၩ့ဎိၭလၧ ခိၪလၩဘွၩပဒိၪၥံၪဂီၩ့ ဒီၩ့ဝိၩၥံၪနီၪ မွဲလကျ့ၭလဖ့ၪလၫ့ဘၪ ဆၧပၧၩ့ဒၪဝ့ၫထံၫခးအ့ၬနီၪလီၫႉ လါနၫ့ ဒီၩ့ဝိၩၥံၪနီၪ အၪ့ကံၩ့ထၪ့ဝ့ၫဒၪ ကမိပၧၩ့ဆၧအခွးကမံၩ့လီၫနီၪလီၫႉ ဆၨၩဒီၪ့ဖိၪၥံၪအဂးအခွးအရ့ၩမွဲလပၫဘၪလီၫႉ အ့ၪမွဲ အဝ့ၫၥံၪလီၩ ကအၪ့ဎၬအ့ၪဆၨၩဒီၪ့ဖိၪၥံၪအဂးနးဆ့ ဆၧလၧဒီၩ့ဝိၩၥံၪနီၪ မွဲၦလၧ အဆၧအုၩ့လၩ့လဂုးခၧၫ့ဘၪလီၫႉ ဘဲၫယီၩကမံၩ့ ခိၬနီၪကမံၩ့ ချဲၩ့ဝ့ၫၥ့ၪ မၩဝ့ၫၥ့ၪလီၫႉ မွဲဒံၭ ၦလၧ ဆၧအုၩ့လၩ့ကဒုၩနီၪ ဖ့ၪလၫ့ဝ့ၫယီၫယီၫဂီၩ့ မၩပျၩဝ့ၫယီၫယီၫဖိၪၥံၪလီၫႉ

            လၧခိၪလၩဘွၩပၧၩ့ဆၧအထီ ဖျိၩ့ၥံၪနီၪ မွဲဘၪန့ထၪ့မူၩဒၩလၧ ဘျၪ့ဒိၪအလးလီၫလကၭဘၪဒဲ ကဲၪထၪ့ဒံၭလၧ ပဒိၪအခရၧၫ့ဖၧၩ့ ခၩ့ဒိၪၥံၪဒံၭနီၪလီၫႉ စီၩဖ့ၫၥၪနီၪ မွဲပဒိၪအခရၧၫ့ဖိၪအၥိၭ စီၩဘိၩခၠ့ၩနးဆ့ မွဲဆၧကိၪ့ဘၪကိၪ့ၥ့ၪခၩ့ဒိၪနီၪလီၫႉ မၩ့ဘၭခ့ၫနီၪ မွဲလၧဖျိၩ့ၡိၬအကျၩ အဆိၪထုၬ ၦလၧကဲၪထၪ့ခၩ့ဒိၪလဂၩဒဲ စီၩဘၭအူၩကၠံၩနီၪ မွဲကဲၪယံၫယါ စဎွၩဆာဟူးဘတ်ရန့် အရၧၫ့ဖၧၩ့ ခၩ့ဒိၪလဂၩနီၪလီၫ. အထီနီၪ လၧဘျၪ့ဒိၪအဖၧၩ့ ၦဖျိၩ့ဘျၪ့ဒိၪလၬ (၁၂) ဂၩ လကၭဒံၭဘၪ ဘျၪ့ဒိၪထၬ (၃) ဂၩ အၪ့န့ထၪ့အလးန့ဂီၩ့ မၩ့ထၪ့ ၦခမျၧးၥံၪအဂးနီၪလီၫႉ ဘျၪ့ဒိၪလဖၪၥံၪယီၩ ၦဖျိၩ့နံၪ့ထၪ့ၥၫ့ကန့အဂး ဂဲၫထဲၩ့ခိးဂဲးခိးဘၭ အၪ့န့ထၬဝ့ၫ ၦဖျိၩ့အဲၪဆၨၩခိၪနါလဖၪနီၪလီၫႉ

            ထီးမုဆၫကနံၩယီၩ ပကဒၪဘၪ ဒီၩ့ဝိၩထံၫခး (ဗမာပြည်) မွဲဂ့ၩႇ ခးပယၩ့ (မြန်မာပြည်) မွဲဂ့ၩ ကိၭကၠၭဝ့ၫလီၫႉ ဒီၩ့ဝိၩ (ဗမာ) နီၪ မွဲဒီၩ့ဝိၩအဆၨၩၥံၪအဂးနီၪလီၫႉ ဆၧကိၭဝ့ၫလၧ မၠၫ့မၫ ခးပယၩ့နီၪ မွဲလၧ ဆၨၩဒီၪ့ဖိၪၥံၪလဖၪ အီၪလၩ့ဎိၭဝ့ၫဒၪ အလး ခးပယၩ့ထံၫခးဒဲ မွဲဒီၩ့ဝိၩကဆၨၩလီၫအဂးလမွဲဘၪနီၪလီၫႉ ၦဖျိၩ့ဆၨၩဖိၪၥံၪလဖၪ ဘၪထွ့ၫလၧ ခးပယၩ့ထံၫဂဲးခးဂဲးနီၪ ခီၫလၧဖျိၩ့ဖျိၩ့အိၩ ထီးမုဆၫကနံၩယီၩ ဂဲၫထဲၩ့ပၫဝ့ၫဘဲၫဒံၭနီၪလီၫႉ

            ထၧၫ့ဖုဝဲမုၪခွၫၥံၪဧ့ႇ လၧဖးဖီၩ့ယီၩအဖၧၩ့ ပကဒၪဘၪ ဖံၫဖူၫၥံၪလၧဖျိၩ့ဖျိၩ့အိၩကဆၫ့ဘၪကဆၫ့ ဂဲၫထဲၩ့ကျ့ၭစၨၭခိးဂဲးခိးဘၭ ထၬလၧ ဆၨၩဖိၪၥံၪအထီလၧယၫအဂးအၪမၬနီၪလီၫႉ ထီမုဆၫကနံၩယီၩ ပကဲၪၥၭဘၪလဖၪ ပကြၨၭအၪ့န့ ဖံၫဖူၫခိၪနါၥံၪ လဖၪယီၩအဒီၩ့အထ့ၬဂီၩ့ လၧပအီၪအလး ပဆၨၩအဂး ပမၩထၪ့ကန့မနီၫလဲၪ ပကကျ့ၭစၨၭမၩထၪ့ကၠၭ လၧဆၧယံၩဆၧၡီၩ့အဖၧၩ့ လါဆံၭနဲၪႉ ဆၧခိးဆၧတၩႉ