လၧဎြံၬဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့နီၪမွဲဝ့ၫဒၪ ပကဘၪ မၩဆံၫ့ဖျ့ၪထၬ ပၥၭတလၫဆုၪ့ထုၪ့ အဂဲးအကၠီၩ့နီၪလီၫႉ မုဆၫကနံၩယီၩ ပဘၪအီၪၥၭမၧၫ့လၧ ဂၪ့ခိၪဖၧၩ့ယီၩ ဆၧဘံၪဘူၪၥၭအီၪ အၪမၬနီၪလီၫႉ ဆၧနီၪအကၠီၩ့ ပအီၪၥၭမၧၫ့ကိနံၩဖၧၩ့ယီၩ ဖၧၩ့ၥၭအဖျီၩ့လၩ့မၬခွံၬႇ ပဆၧတီၩလီၩလၩ့မၬခွံၬၥ့ၪထီးလူၬနီၪလီၫႉ ဆၧလဂ့ၩဘၪယီၩ ကဲၪထၪ့အကၠီၩ့နီၪ ပၥၭခံဖၧၩ့ ဆၧလဂ့ၩဘၪ ဂဲၫနုၬလၫ့နီၪလီၫႉ
အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ပၥိၩ့ထၪ့ဆၧပိၭဆၧလၫ့ လဂ့ၩလၧဘၪအီၪစွါဘဲၫ ပခွံၬၡိၭထီးလူၬမွဲအ့ၬဧၪႇ အနီစွါဘဲၫ ပၥၭခံဖၧၩ့ ဆၧလဂ့ၩဘၪႇ ပဂးအၥိၩ့လလိၪဘၪ ထီးလူၬနီၪ ပကဘၪခွံၬၡိၭဒူၩဒူၩနီၪလီၫႉ နၥံၪအဂံၪ့ဖၧၩ့နီၪ နၥံၪအဂး အၥိၩ့လလိၪဘၪ ဆၧပိၭဆၧလၫ့ အ့ၪအီၪစွါဘဲၫ နၥံၪကဘၪခွံၬၡိၭနီၪလီၫႉ အနီၪမၬ နၥံၪကအီၪဘၪ အလးလဲလဲနီၪလီၫႉ ဘဲၫနီၪအၥိၭႇ နၥံၪအၥၭခံဖၧၩ့နီၪ နၥံၪအဂး အၥိၩ့လလိၪဘၪ အီၪကဒီၪ့နီၪ နၥံၪကဘၪ ခွံၬၡိၭထီးလူၬနီၪလီၫႉ အနီၪမၬ နၥံၪကအီၪဘၪလၧ ဆၧဆံၫ့ဖျ့ၪနီၪလီၫႉ
လကၭဒ့ၭဘၪ နၥံၪအနးၥၭဖၧၩ့ နၥံၪကဘၪမၩဆံၫ့ဖျ့ၪထၬနီၪလီၫႉ နၥံၪမၩဆံၫ့ဖျ့ၪထၬ ဆၧအယီၩၥံၪန့မၬ နၥံၪကဒၪဆၧၫ့ယၫႇ နၥံၪကမၩနၧၩ့ခၪ့ဖျီၪ ဆၧဘံၪဘူၪၥၭၥံၪယီၩ ကန့ဝ့ၫဒၪနီၪအကၠီၩ့ ၥၫ့ဎွၩဖရၫ့စ့ၭ အဆၧၥီၫ့ဆၧၥၫ့အီၪ ဝ့ၫဒၪ ဘဲၫယီၩၥိၭအဂဲး ယရၩလၩ့န့အ့ၪဘၪနၥံၪလၧ ဆၧအဲၪဆၧကွံၩ ဎိၩဒိၪဖၧၩ့နီၪလီၫႉ အဲၪကွံၩဘၪထၧၫ့ဖုဝဲထံၩၥိၭ ထီးအလူၬ မွဲနၥံၪလၧၫဎွ့ၩဝ့ၫဒၪလၧ ကဆါဎြံၬအဆၧအဲၪဆၧကွံၩ လါဆံၭႉ