ၦဆံၫ့ဎံၪ Nicholas of Flue အဂဲး
လၧဎြံၬဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ မံၩ့ဎိၩၥၪဖျီၪ မုခွၫလၧအအီၪအနိၪ့ အဆၧရၩလၩ့ဖၧၩ့ မုကနံၩယီၩ ယအဲၪဒိၭ ရၩလၩ့န့အ့ၪဘၪနၥံၪနီၪ မွဲဝ့ၫဒၪ ၦဆံၫ့ဎံၪ Nicholas of Flue အဂဲးအကၠီၩ့နီၪလီၫႉ အဝ့ၫအမိမိဖါဖါနီၪ အီၪလၧကၠဲၬလူကၠဲၬထၫ အၪမၬဒ့ၭနီၪလီၫႉ အဝ့ၫအၥၭအီၪ (၂၁) နံၪ့ လ့ၩနုၬလၩ့လၧ ၥုၭဖၧၩ့နီၪလီၫႉ လယံၬလမီးဘၪ ထၪ့ၡါဂီၩ့ အဖိၪန့ထၪ့ (၁၀) ဂၩနီၪလီၫႉ ၦဆံၫ့ဎံၪ Nicholas ယီၩ ဒူၭဆၧ အစၩ့ထံၫဂ့ၩဂီၩ့ တခ့ၭဖဝၭဂ့ၩအကၠီၩ့နီၪ ၦဂူၫဂၩ ယူၭယၫ့အဝ့ၫကိၭဂၩနီၪလီၫႉ
လါနၫ့ ၦဆံၫ့ဎံၪ Nicholas ယီၩ ထၪ့ၡါဂီၩ့ (၂၅) နံၪ့နီၪ ကဆါယွၩ ကိၭအဝ့ၫအကၠီၩ့နီၪ အၪ့န့ဆၧဖ့ၪအခွးလၧ အၦမုၪအီၪဂီၩ့ ကလ့ၩကဲၪ အဲၩ့ၥဲၭအဂး လ့ၩဒိၭန့ မးၥံၫနီၪလီၫႉ အဝ့ၫ ကအီၪအလးကၠၩ့နီၪ ဒၩ့ထၬဝ့ၫလၧ ၥံၪ့့ထဲၩ့နီၪလီၫႉ အဝ့ၫၥိၭကီၩ့ထၬ အဲၩ့ၥဲၭဆၧလုၬဆၧကီၩ့ဂီၩ့ ဘၩဆိၪဖၪဆၧ ကိၭနံၩနီၪလီၫႉ အဝ့ၫယီၩ အၪ့မ့ၩအ့ၬႇ အီၩထံၫအ့ၬ လ့ၩဒိၭန့ မးၥံၫ အနံၪ့ (၂၀) နီၪလီၫႉ ၦၡၩလနၩ့နၩ့နီၪ လ့ၩလၧအဝ့ၫအီၪဂီၩ့ အၪ့က့ၩဆၧဖ့ၪကိၪ့နီၪလီၫႉ လကၭဒ့ၭဘၪ ၦလၧယူၭယၪ့အဝ့ၫ စီၩ့မၩ့အီၪ ၦဒိၪၥံၪနီၪ ၦဆံၫ့ဎံၪ Nicholas အဂး ၥုၪ့အ့ၪဝ့ၫ ၥရိၭဂီၩ့ ဆၧအၪ့မၧၫ့ ခိၪနါ ဘၪထွ့ၫလၧ ကၠဲၬအဆၧဖံၭဆၧမၩနီၪလီၫႉ
လကၭဒ့ၭဘၪ ဆၧဒုၭလၧ ထံၫခးဖၧၩ့ ကဲၪထၪ့အခံၫ့နီၪ ၦဆံၫ့ဎံၪ Nicholas ဘၪလ့ၩကၩ့ကၩဎိၭလၩ့ဆၧနီၪလီၫႉ ၦဆံၫ့ဎံၪ Nicholas ၥံၫဖီၩ့ခွံၬဂီၩ့ အဝ့ၫအီၪအလးနီၪ ၦၡၩမၩနဲၪ့ထၬလၧ ၦဘၪလ့ၩဘၩကၠဲၬအလးနီၪဂီၩ့ အဝ့ၫယီၩ ခး Sweatlan အဂး ကဲၪထၪ့ ၦဆံၫ့ဎံၪ ကပၩနီၪအကၠီၩ့ ယရၩလၩ့န့အ့ၪဘၪနၥံၪလၧ ဆၧအဲၪဆၧကွံၩ ဎိၩဒိၪဖၧၩ့နီၪလီၫႉ အဲၪကွံၩဘၪ ထၧၫ့ဖုဝဲထံၩၥိၭ ထီးအလူၬႇ မွဲနၥံၪလၧၫ့ဎွ့ၩဝ့ၫၪလၧ ကဆါယွၩ အဆၧအဲၪဆၧကွံၩလါဆံၭႉ
