ကနၩနီၪတၭ အဝ့ၫၥံၪ မံၫအဒူၭဖၧၩ့ခိၪထိၭနီၪ လၧဆၧလၩ့ဆၫ့အဖၧၩ့ ဒၪဘၪ ၦၡၩအမ့ၬၥၪ ကဆံၫၥၧၫ့ဖျိၪ့တၭ အၪ့စၪ့အမၫၥၭဘီၩ့နီၪလီၫႉ နးခၫရံၫနးဆ့ လီၩအ့ၪအဝၩအတီၩ ၦၡၩအမ့ၬၥၪၥံၪယီၩ အမိမိၥၭဘီၩ့ ၥိၫ့စိၩထၬအ့ၪအဝ့ၫအကၠီၩ့နီၪလီၫႉ ကထံၪဎး ပဒူၩဖိၪလဂၩ ၥ့ၪယၫဝ့ၫလၧ အဝ့ၫအမိဂါၥံၪဒဲ အမိမိၥၭဘီၩ့ အမ့ၬၥၪၥံၪနီၪလီၫႉ လါနၫ့ လီၩဝ့ၫနးမံၩ့အ့ၬႉ ကနံၩနီၪတၭ ၦဒူၩဖိၪလဂၩ လၧဒူၭကဒူၭအဖၧၩ့နီၪ ဒၪန့ ထံၫလူၩကၠၭကဖျိၪ့တၭ အၪ့စၪ့အမၫ အယီၩမနီၫလဲၪအခၫ အမၫနီၪအဲၪအဝၩဒဲ နဲၩ့ဝ့ၫအကၠီၩ့ လီၩအ့ၪအဝၩ အမိမိဒိၭခၩလ့ၩလၧ ၦၡၩၥံၪအီၪအခးနီၪ အီၪက့ၪထးအၥၭလၧ ထံၫလူၩကၠၭဖၧၩ့ယီၩ မွဲၦၡၩမၩၥံၫအဝ့ၫ လန့ဘၪနးမံၩ့အကၠီၩ့ အ့ၪထံၫလူၩၥၪယီၩ ထ့ဖၬမၬ အဝ့ၫကၥံၫအကၠီၩ့ မွဲဆၧဘဲၫနီၪ အဝ့ၫဘၪယိထွ့ၫအမိမိအၥၭအကၠီၩ့ လီၩအ့ၪဝ့ၫထီးအလူၬလီၫႉ ၦဒူၩဖိၪလဂၩ နါဂၧၫ့ဘၪဆၧပရၧၫ့ယီၩဂီၩ့အခၫ အၥၭဎွံၫထၪ့အၪမၬလီၫႉ ဘၪန့လဲၪစွါဘဲၫ အဝ့ၫအမိမိဒဲ အမိဂါၥံၪအဒူၪဒၩနီၪ ကဘၪမၩၥံၫဝ့ၫပၥ့ၪလဲၪ ၥ့ၪယၫဝ့ၫယူၭနီၪလီၫႉ

ထီးနီၪ လၧခဲၫ့ကနံၩ နးခၫရံၫအထၧၫ့မၫဝၩနံၫဂၩ ဂၭဖၭလၧ အဖီၩ့ဖၧၩ့နီၪအထီ ၦဒူၩဖိၪနီၪအၪ့မၩဘၪ ဆၧအထံၭကထံၭအလၪတၭ ဆၧအလၪနီၪ ၡၭအလူကထံၪလီၫစွါဘဲၫႉ လၧဆၧလၩ့ဆၫ့အဖၧၩ့ အၪ့စၪ့အမၫ ဆၧယီၩ မနီၫလဲၪအထံၭလဲၪအခၫ ဆၧအထံၭယီၩ မွဲၥံၪ့ဎွံၪအလၪအကၠီၩ့ အ့ၪမွဲဆၧအဂဲးအဖးဂဲၫကဲၪထၪ့ကမံၩ့မံၩ့စွါဘဲၫ မၩလၩ့ဘျ့ၭဆၧအလၪယီၩကထံၪဎး မ့ၪကဂၭထုၪ့လၫ့အၪ့ၡိၬ ခိၪလီၩ့ထၧၫ့ဖျိၪ့ယၫနီၪလီၫႉ နးခၫရံၩလဂၩ စီၪဝ့ၫ အဝၩၦဒူၩဖိၪယီၩ ကအီၪလၧအဝ့ၫလဆိၩၡၩတၭ ကယဲအဝၩအၪ့စၪ့ လီၩအ့ၪဝ့ၫကိၭမံၩ့လီၫႉ ပဒူၩဖိၪနးဆ့ မွဲလအဲၪဘၪအမၫမွဲအ့ၬႉ လါနၫ့ အဝ့ၫအမိမိၥၭဘီၩ့ဒဲ အမိဂါၥံၪ ဘၪထိးထၬနီၪ ကမိမၩဆၧၫ့ထဲၩ့ဝ့ၫဒဲ မုၫလါအမိဂါၥံၪ ဒၪထဲၩ့ဆၧၥ့ၪအကၠီၩ့တၭ ကိၪ့တဲၩ့ထၪ့ဂူၪဝ့ၫလၧ ကထဲၩ့ထဲၩ့လၧ အခးနီၪလီၫႉ

ထီးကနံၩနီၪတၭ ဒိၭခၩမုၪနးခၫရံၫလဂၩ ကဘၪအီၪကီၪ့ဎိၭလၩ့လၧ အဒိၭခၩၥံၪအီၪတၭ အဝ့ၫကိၪ့တဲၩ့ထၪ့လၧ ကထဲၩ့စဲၪ့ဂူၪလီၫႉ လါနၫ့ ဒိၭခၩၥံၪနီၪ ခိၭဆၧထီးအဎံၩ့တၭ မွဲထဲၩ့လန့ဘၪလီၫႉ လၧခဲၫ့ ဒိၭခၩမုၪနးခၫရံၫနီၪ အဖိၪခွၫအီၪကဂၩလီၫႉ နးခၫရံၫဝ့ၫ စီၪဝ့ၫ ဖိၪၥၪအီၪယူၭအကၠီၩ့ အဝၩနီၪ မွဲကထဲၩ့အခးထၪ့လၧၩ့အ့ၬတၭ လီၩယိအဝၩ ဖိၬနီၪလၧၩ့အ့ၬႉ နဲၩ့ထၬအဝၩယူၭနီၪလီၫႉ  ကနံၩနီၪတၭ နးခၫရံၫလ့ၩ ဆၧအီၪကီၪ့အထီ ၦဒူၩဖိၪလဂၩ အၪ့န့ထၪ့ အမိဂါၥံၪဒဲ အမိၥၭဘီၩ့အမ့ၬၥၪၥံၪႇ ၥံၪ့လၪလၧအဂ့ၩၥံၪ့ဎွံၪ ဒဲ ဒိၭခၩမုၪၡါအၥၭအီၪထံၫလူၫကၠၭနီၪဂီၩ့ ထူၭလၫ့ၥ့ၪဂဲၫထဲၩ့စဲၪ့ကထံၪလီၫႉ ဂီၩ့နီၪ လယံၬလမီဘၪအဖၧၩ့ နးခၫရံၫဂဲၫထဲၩ့ထီၩ့ဂံၪ့နီၪလီၫႉ