ဒိၭခၩမုၪၡါလဂၩ ကမိမၩၥံၫ ၦဒူၩဖိၪနီၪအကၠီၩ့ ကအၪ့မၧၫ့ဝ့ၫလ့ၩၥိၪ့လံၬလၧ ဒိၭခၩၥံၪအီၪအလးနီၪလီၫႉ ဒိၭခၩမုၪနီၪ လ့ၩလၧစဎွၩဒိၪအီၪဂီၩ့ စံၭဝ့ၫ ယမိၥိၪ့လံၬလၧ ယမၧၫ့မုၪအီၪ အဝ့ၫအီၪမွဲဒၪ ထံၫခးကခးဘိၭ အၪ့မၧၫ့အ့ၪယၧၩ ၦဒူၩဖိၪလ့ၩၥိၫ့အ့ၪယၧၩနးထံၪ စဎွၩနးဆ့ ၥ့ၪယၫအမၫအဆၧကိၪ့တဲၩ့အ့ၬ စီၪဝ့ၫအၡါမၪတၭ အၪ့မၧၫ့ၦဒူၩဖိၪလ့ၩၥိၫ့လံၬနီၪလီၫႉ အၡါမၪနီၪ အဝ့ၫအၪ့မၧၫ့ ၦဒူၩဖိၪလ့ၩအလးနီၪ ထံၫခးလၧ လမွဲဘၪၦၡၩအီၪတၭ မွဲလၧ ဒိၭခၩၥံၪအီၪအလးနီၪလီၫႉ ဂီၩ့နီၪ အဝ့ၫလီၩအမၧၩ့မုၪနီၪ အၡါမၪနီၪ မွဲအမၧၩ့မုၪအ့ၬ အဝ့ၫအဖိၪမုၪလီၫ အဝ့ၫလအီၪဘၪအခံၫ့ အဖိၪမုၪယီၩ ဘၪယိထွ့ၫထၬ အဝ့ၫအလးနီၪလီၫႉ အဝ့ၫအဖိၪမုၪ ဒိၭခၩမိဖိၪယီၩ အမံၩ့မွဲဝ့ၫ နးခၫရံၫနီၪလီၫႉ အဝ့ၫကွ့ၭထၬလံၬနီၪ ၦလၧအဂဲၫၥိၫ့လံၬယီၩ အ့ၪမွဲထီၩ့မုဆၫ အၪ့မုဆၫ အ့ၪမွဲဂဲၫထီၩ့မုနၩ အၪ့မုနၩ နီၪလီၫႉ လါနၫ့ ၦဒူၩဖိၪနီၪ မွဲၥီၪ့ယံၩယါလံၬနးကၠၪဘိၭ မဆၧကွ့ၭထၬပနီၫလဲၪ လၥ့ၪယၫဘၪဝ့ၫလီၫႉ စဎွၩအၪ့မၧၫ့ဘိၭ ဘၪလ့ၩနီၪလီၫႉ အဝ့ၫကဘၪလ့ၩလၧ ဒိၭခၩအလး လၥ့ၪယၫဘၪဝ့ၫလါနၫ့ လ့ၩဆိၬန့ထဲးအဎ့ၬနီၪလီၫႉ ၦဒူၩဖိၪယီၩ လ့ၩလၧဖၧၩ့ၥၭအထီ ဆၧပွံၭအၥၭတၭအီၪပွံၭလၧ ချိၫ့ခၪ့ထံၭအထီ မံၫမၪဝ့ၫဒၪလီၫႉ

အထီနီၪ ကလိၬကလၬလၧ အခိၬချိၫ့ထံၭနီၪ ယိၦဒူၩဖိၪနီၪဂီၩ့ ဒၪလံၬဘျံၭလၧ အဂဲၫပၫလၧအထိၪ့ဖၧၩ့နီၪ ၥ့ၪယၫဝ့ၫလၧ ဖိၪၥၪခွၫယီၩ ဖီလံၬဘၪအ့ၬ ၦၡၩကိၪ့ၥံၫအဝ့ၫနဲၪ ထူၭထၪ့အၪ့န့ထၬ လံၬနီၪဂီၩ့ ကွ့ၭထဲၩ့အ့ၪဝ့ၫ အ့ၪမွဲထီၩ့မုဆၫခီၫ ထၪ့အီၪဎုၬ မုဆၫႇ အ့ၪမွဲလ့ၩထီၩ့မုနၩ ထၪ့အီၪဎုၬမုနၩ အၪ့လဲၩ့ကွ့ၭထၪ့ထဲၩ့ဝ့ၫ ဘဲၫယီၩၥိၭနီၪလီၫႉ ၦဒူၩဖိၪလဂၩ နၪ့အၥၭအခၫ ဆုးလ့ၩဝ့ၫဒၪ လၧဒိၭခၩအခးနီၪလီၫႉ မုဂၪလၩ့အခၫ ၦဒူၩဖိၪယီၩ လ့ၩထီၩ့ဝ့ၫဒၪလၧ ဒိၭခၩအခးလီၫႉ ဒိၭခၩမုၪ နးခၫရံၫလဂၩ စီၪဘၪဝ့ၫ အမိမိၥိၫ့စိၩအ့ၪ ကအီၪဎုၬအဂး ၦၡၩတၭ ဆၧမုၬအၥၭဒိၪမၬဒဲ စံၭအဖျဲၪၥံၪ အမိမိၥိၫ့စိၩၦၡၩယီၩ မွဲအဝ့ၫၥံၪအဆၫအ့ၬဂီၩ့ အဝ့ၫကအီၪဎုၬ ၦခွၫအဂးနီၪလီၫႉ ဒိၭခၩလဖၪနးဆ့ အၥၭဎွံၫကၠၭဂီၩ့ မၩအ့ၪဝ့ၫဆၧအီၪဎုၬမုၬဂ့ၩဂ့ၩဘၪဘၪနီၪလီၫႉ ၦဒူၩဖိၪလဂၩ ၥ့ၪယၫဆၧနးမံၩ့အ့ၬ အမၫအီၪဝ့ၫနီၪလီၫႉ

အနီၪတၭ ၦဒူၩဖိၪလဂၩ အီၪလၧ ဒိၭခၩအခးနီၪ အခံၫ့ယံၬထၪ့ကဆံၭအခၫ လၧအမၫ ဒိၭခၩမုၪအီၪ ၥ့ၪယၫထၪ့ ဖျ့ၩလဲးဒိၭခၩမုၪၡါအဂဲးတၭ ဂဲၫၥ့ၪယၫထၪ့ဝ့ၫ အီၪကၠၧၫ့ကၠၧၫ့လၧ ဒိၭခၩအဖိၪမုၪယီၩ ကိၭကၠၪကၥ့ၪအ့ၬနီၪလီၫႉ လါနၫ့ ဒိၭခၩမုၪ နးခၫရံၫဝ့ၫ အဲၪအဝၩၥၭဘီၩ့ ၦဒူၩဖိၪနီၪ အၪမၬလီၫစွါဘဲၫႉ အဝ့ၫလီၩမၩအဝၩၥၭဘီၩ့ လၧအဘၪအၥၭလဖၪ ကိၭမံၩ့လါနၫ့ အဝၩၥၭဘီၩ့ဝ့ၫဒၪ ကမိဂဲၫထဲၩ့ထဲၩ့လၧ ၦၡၩအီၪအလး အီၪဝ့ၫမုၬနးၥၫ့အ့ၬစွါဘဲၫႉ