အဝ့ၫၥံၪအဆၧထိစိၩနီၪ ခးပယၩ့ယီၩ ဘဲၫဂဲၫထဲၩ့အီၪထၬဝဲၩအဆိၩဆိၩအိၩအၥိၭ ဒိၩဝိၩၥံၪနီၪ ကမိပၧၩ့ဆၧထီးအလူၬ နီၪလီၫႉ ဖျိၩ့ၥံၪလဖၪန့ဘၪအခွးအရ့ၩလၧ ခိၪလၩဘွၩအီၪနးဆ့ မွဲဒိၩ့ဝိၩၥံၪလထိးဆၧၫ့ဘၪလီၫႉ (GCBA)  ခရၧၫ့ဖၭဒိၪနီၪ ဆၧပၧၩ့ဆၧအၥၫ့ အ့ၪဂဲၫကဲၪထၪ့အခၫ ဆၧပၧၩ့ဆၧအစီၩ့အမၩ့ (စီမံခန့်ခွဲရေးအာဏာ)ထီးအလူၬနီၪ ကဘၪဖ့ၪလၫ့ဝ့ၫလၧ ဒိၩ့ဝိၩအဆၨၩလဖၪ အစူၪဖၧၩ့အကၠီၩ့ အၪ့ကံၩ့ထၪ့ဝ့ၫလီၫႉ လါနၫ့ ဆၧအၪ့ကံၩ့ယီၩ ဝဲၭခမံတံၫ လထိးဆၧၫ့ဘၪထီးအလူၬလီၫႉ ခိၪလၩဘွၩအဆၧပၧၩ့ဆၧအၥၫ့နီၪ ထိးဆၧၫ့ဝ့ၫ လါနၫ့ ဖျိၩ့ဆၨၩၥံၪအဂး ကဖ့ၪလၫ့ဝ့ၫ အလး (သီးခြားနေရာ)နီၪ မွဲဒိၩ့ဝိၩၥံၪထိးဆၧၫ့ကၠၭအ့ၬဒဲ ဒိၩ့ဝိၩလၧစံၭလၩ့အၥၭအဲၪအဆၨၩလဖၪ ၦလၧအဖီၪ့ထၪ့ထံၫဂဲးခးဂဲးလဖၪ လီၩကၠၭဝ့ၫ ယိလၩ့န့အၥၭ စဎွၩအဆၧပၧၩ့အထီနီၪ ထုၬယူၭ အထီဘဲၫယီၩ ၦကိၪ့ၥ့ၪၥၭဘၪ့လဖၪ ဖျိၩ့ ဒီၩ့ဝိၩ မီၪ့ဎီၩ့လီၫ ပကထိးရွံပၥၭကၠၧၫ့ကၠၧၫ့နီၪလီၫႉ

            လၧခဲၫ့ ဆၧချဲၩ့အၪကၠၭလိၬၥၭ ဆၧကၪဆၧဂဲၩ့ဂီၩ့အခၫ ဝဲၭခမံတံၫလဖၪ ၥိၩ့ထၪ့အစီၩ့အမၩ့ဂီၩ့ အီၪက့ၪဖ့ၪလၫ့ဝ့ၫ ၦဖျိၩ့ကိၫ့စၩ အလး (၅) လးဂီၩ့ ၦဖျိၩ့ဆၨၩၥံၪလဖၪ လၧအဝ့ၫၥံၪဘၪအၥၭကိၫ့စၩနီၪဖ့ၫလၫ့ဆၧဖၭ ရွံထၪ့ဝ့ၫန့အကၠီၩ့နီၪလီၫႉ ၁၉၂၃နံၪ့နီၪ ဒဲၫ့အၫခံၫအဆၧပၧၩ့ စၭထၪ့နီၪလီၫႉ စၭထၪ့လၧ နံၪ့ ၁၉၂၀နီၪ  ခးပယၩ့ထံၫခးအဂး ဂဲၫဂဲၩဝၬထၪ့နီၪလီၫႉ ဒီၩ့ဝိၩအဲၪဆၨၩလဖၪ ဆၧပၧၩ့ဒၪဝ့ၫ (Self-Rule)နီၪ အၪ့ကံၩ့ထၪ့ဝ့ၫ ထ့ၬထ့ၬဖိၪလီၫႉ အဆၧၫ့အထီလဖၪ ဂဲၫဆၧၫ့ထၪ့ဝ့ၫအၪမၬလီၫႉ ၥနိၫကီၫ့စ့ၫခရၧၫ့ဖိၪ ဒီၭတၫစၫ့စံၫဖိၩနးဆ့  စၭထၪ့လၧ ၁၉၂၅နံၪ့နီၪ ဒၪလၩ့ဎိၭအီၪကီၪ့လၧ ၦဖျိၩ့ဆၨၩခရၧၫ့ (KNA)ခိၪနါလဖၪၥံၪ ခိၪမၪခိၪမၪဒဲ ၦဖျိၩ့ဆၨၩဖိၪၥံၪအထီလၧယၫအဂး ဘဲၫမၩထၪ့ဝ့ၫကန့အဂ့ၩထုၬနီၪ အၪ့ထၪ့ကၠၭဆၧထံၪလၩ့ဒီၪလၩ့နီၪလီၫႉ

            အထီနီၪ ဒိၩ့ဝိၩၥံၪလဖၪ ဖိၬလိၬထၪ့ဆၧကၪဆၧဂဲၩလၧ အံၫ့ဒံၩယါၥံၪနီၪလီၫႉ လါနၫ့ မွဲဒီၭတၫစၫ့စံၫဖိၩ လခိၬနၪဘူၭဘၪဒဲ အဝ့ၫ အၪ့ဎၬၥၭခိဝ့ၫမွဲ ဖျိၩ့ဆၨၩအထီလၧယၫအဂးနီၪလီၫႉ  [စဎွၩပၧၩ့ဆၧ ထီအအၧၩ့မွဲဂ့ၩႇ ဒီၩ့ဝိၩၦလၧအမၩထၪ့ထံၫဂဲးခးဂဲးမွဲဂ့ၩ ဆၧလၧဒီၩ့ဝိၩၥံၪထီးအလူၬနီၪ မီၪ့ဎီၩ့ဒၪလိၬၥၭလီၫႉ ဂဲးဘၭဆံၭဝ့ၫဒၪ ထၧၫ့ဖုဝဲဆၨၩဆၬဖိၪၥံၪအဖၫ့ခိၪ ယၫ့ၥၭမၩဆၧၩ့ဝ့ၫဒၪ ဖးဖီၩ့အီၪယံၫယါနးဆိၬအ့ၬနီၪလီၫႉ ကမွဲဒၪဒီၩ့ဝိၩနီၪ မၩနၧၩ့မၩစၪၦၡၩၥ့ၪလီၫႉ အနၭထုၬနီၪ ဒီၩ့ဝိၩ (အာဏာပိုင်)လဖၪ အ့ၪမွဲအစီၩ့အမၩ့ဂဲၫအီၪထၪ့အခၫ ၦၡၩနီၪ စီၪဝ့ၫလၧၦၡၩလၧၩ့အ့ၬ မၩနၧၩ့မၩစၪဝ့ၫၥ့ၪ ဖီၩ့ခွံၬဖးဖီၩ့ၥံၪအီၪထၬဝဲၩ့ အၪမၬနီၪလီၫႉဘဲၫၥ့ၪနီၪ ၦၡၩထၩ့လၫ့အ့ၪအနိၩ့အၥိၭ ဒီၩ့ဝိၩၥံၪအစီၩ့အမၩ့အ့ၪဂဲၫအီၪထၪ့အခၫ ကမိပၧၩ့ဆၧ ၦခမျၧးၥံၪလဖၪ မၩနၧၩ့မၩစၪဝ့ၫဒၪနီၪ အလုၫလါအီၪထၬဝဲၩတၭ ဆၨၩဒီၪ့ဖိၪၥံၪလဖၪနးဆ့ ခီၫခီၫကဘၪအီၪလၧ ဒီၩ့ဝိၩခိၪနါလဖၪအဆၧပၧၩ့ အဖၫ့လၬနီၪ ကမိဖိၬလိၬထၪ့ဒၪ ၦဖျိၩ့ထံၫခးလၧ ခိၪလၩဘွၩၥံၪအဆၧပၧၩ့ဖၫ့လၬနီၪလီၫႉ