လၧဎြံၬဆၧအဲၪဆၧကွံၩဖၧၩ့  ထၧၫ့ဖုဝဲထံၩၥိၭထီးအလူၬၥံၪဧ့ႇ မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪ မွဲၫဝ့ၫဒၪ ၥၫ့ဎွၩ Leo XIV အီၪၥၭမၧၫ့ထၧၫ့ဘီၩ့ယၫ အဂဲး အကၠီၩ့နီၪလီၫႉ အဲၪကွံၩဘၪထၧၫ့ဖုဝဲ ထံၩၥိၭထီးအလူၬၥံၪဧ့ႇ ၥၫ့ဎွၩ Leo XIV  ယီၩအီၪဖျဲၪလၧ နံၪ့ (၁၉၅၅)  နံၪ့ လၩ September ၄ ၥၫ့ ဝံး Chicago နီၪလီၫႉ ၥၫ့ဎွၩ Leo XIV ယီၩ အထၧၫ့ဖုဝဲအခွၫအီၪ ၃ ဂၩဖၧၩ့နီၪ အဝ့ၫယီၩမွဲဝ့ၫ အဆံၭထုနီၪလီၫႉ အီၪလၧဂံၪ့ဒီၪ့ဖိၪၥံၪ မုၬမုၬလၩလၩဂီၩ့ နံၪ့ (၁၉၇၇)  နံၪ့နီၪ အဝ့ၫကကဲၪၥၫ့ခၫ အဂး လ့ၩနုၬလၩ့လၧ Augustine ခရၧၫ့ဖၧၩ့နီၪလီၫႉ

နံၪ့ (၁၉၇၈)  နံၪ့ လၩ September ၂ ၥၫ့နီၪ အဆၫ့လၧၫ့ထုၬ အုၩ့လၩ့အီၪလၩ့ၥၭဂီၩ့ နံၪ့ (၁၉၈၁)  နံၪ့ လၩ August 29 ၥၫ့နီၪ ကဆိၩအဂး အုၩ့လၩ့အီၪလၩ့ၥၭနီၪလီၫႉ အနီဂီၩ့ အဝ့ၫ ၥီၪ့လိၪဆၧမၩလိၪလၧ ဝံး Chicago Catholic theological Union နီၪလီၫႉ အဝ့ၫအၥၭအီၪ ၂၇ နံၫ့နီၪ ကဘၪမၩလိၪ Canon Law အဂး ဘၪလ့ၩလၧ Rome, pontifical university of St. Thomas Aquinas နီၪလီၫႉ နံၪ့ (၁၉၈၂) နံၪ့လၩ June 19 ၥၫ့ လၧ ဝံး  Rome ,St Monica Augustine  ဘျၪ့ကိၪဒိၪနီၪ ၥၫ့ခိၪဒိၪ Jean Jadot ဖ့ၪအ့ၪအဝ့ၫ ၥၫ့ခၫအလၩအဖၩ့နီၪလီၫႉ

လကၭဒ့ၭဘၪ လၧၥၫ့ဎွၩ အရိၩ့နီၪ ဆၧဘိၪ့ဆၧဘၩ ကၩ့ကၩဎိၭလၩ့ဆၧ ဒဲ လၧဆၧဘိၪ့ဆၧဘၩဂူၫဂၩ ဆၧကၩ့ကၩဎိၭလၩ့ဆၧ ဖၧၩ့နီၪ အဝ့ၫဘၪကဲၪ အခိၪအနါနီၪလီၫႉ နံၪ့ (၁၉၈၄) နံၪ့ နီၪအဝ့ၫန့ဘၪ ဒံၫကရံၫ လၧခဲၫ့ကမံၩ့နီၪ မွဲဝ့ၫ licensiate နီၪလီၫႉ အဝ့ၫန့ဘၪ ဒံၫကရံၫဂီၩ့ ကဘၪမၩ ကိၪ့ၥ့ၪခိၪဒိၪ ဒံၫကရံၫအဂး အဝ့ၫမၩ လံၬဂဲးထု အခံၫ့နီၪ ဘၪလ့ၩမၩ ၥၫထနၫဆၧမၩလၧ ခး Peru နီၪလီၫႉ နံၪ့ (၁၉၈၇) နံၪ့နီၪ န့ထၪ့ဘၪ ကိၪ့ၥ့ၪခိၪဒိၪ ဒံၫကရံၫနီၪလီၫႉ လၧခး USA  Mother of Good Counsel St. Augustine ခရၧၫ့ဖၧၩ့နီၪ အဝ့ၫဘၪကဲၪ ၥၫထနၫ အခိၪအနါနီၪလီၫႉ

နံၪ့ (၂၀၁၄) နံၪ့ လၩ October 3 ၥၫ့နီၪ ဘၪထိးရွံထၪ့ၥၭ ၥၫ့ဎွၩအၥီၫ့နီၪလီၫႉ နံၪ့ (၂၀၁၅) နံၪ့နီၪ ခး Peru အဂး ၥၫ့ဎွၩ အၥီၫ့ James Patrick Green နီၪ ရွံထၪ့အဝ့ၫ ၥၫ့ခိၪ ထၧၫ့ထီၩ့ နံၪ့ (၂၀၂၃) နံၪ့နီၪလီၫႉ လကၭဒ့ၭဘၪ နံၪ့ (၂၀၂၃)  နံၪ့ လၩ January ၃၀ နီၪ ခး American ၥၫ့ဎွၩရိၩ့အဂး ဒဲ ၥၫ့ခိၪလးမိထုၪ့ အဂး ၥၫ့ဎွၩဖရၫ့စ့ၭ ရွံထၪ့အဝ့ၫ အခိၪအနါနီၪလီၫႉ နံၪ့ (၂၀၂၃)  နံၪ့ လၩ September ၃၀ နီၪ ၥၫ့ဎွၩဖရၫ့စ့ၭ ရွံထၪ့ထဲၩ့အဝ့ၫ ကၫဒံၫနဲၫ နီၪလီၫႉ လကၭဒ့ၭဘၪ နံၪ့ (၂၀၂၅)  နံၪ့လၩ မ့ၫ ၈ ၥၫ့ယီၩ ဘၪထိးရွံထၪ့ၥၭ ၥၫ့ဎွၩနီၪလီၫႉ အခီၫ့ဒၪအိၩ အမံၩ့နီၪ မွဲဝ့ၫ ကၫဒံၫနဲၫ  Robert Francis Prevost နီၪလီၫႉ ကဲၪထၪ့ၥၫ့ဎွၩ အမံၩ့နီၪ မွဲဝ့ၫ Leo XIV နီၪလီၫႉ