ၦဖျိၩ့ၡါဖိၪနးခၫရံၫဒဲၦဒူၩဖိၪ (၄)

ဖျ့ၪထီၪ့ဒိၭခၩမိဎွါလဒုၩ စဎွၩဒုၭကဲၪ့ထၪ့နးဎွၩမုၪဂီၩ့အခၫ စဎွၩနီၪ အဲၪၦနွ့ၫမုၪၥံၪနီၪ နါလၧၩ့အ့ၬဂီၩ့ ဆၧအဲၪမွဲအဝ့ၫလီၫစွါဘဲၫႉ ကနံၩကနံၩ အဝ့ၫ လ့ၩလီၩ့အ့ၪစဎွၩ ၦနွ့ၫမုၪၥံၪအဂဲး လဂ့ၩလဘၪဘၪၥံၪဘနီၪႇ ဘၪနီၫလဲၪစွါဘဲၫ လမုနၩခီၫအခၫ အဝ့ၫအၪ့ၦၡၩလၧ နီးဖၧၩ့နီၪ ကနၩကဂၩနီၪ ၦနွ့ၫမုၪၥံၪၥ့ၪယၫအဝ့ၫအဂဲးတၭ ခံၫ့ကံၭဝ့ၫ စဎွၩကၥ့ၪယၫအဝ့ၫအဂဲးနီၪလီၫႉ ကနၩနီၪတၭ ဒိၭခၩမုၪၡါနီၪ လီၩအၪ့ၦၡၩအခၫ ဘဲၫၦနွ့ၫမုၪၥံၪဒၪအဝ့ၫလၥ့ၪဘၪအဂး လီၩ့ဘုၭလၫ့ဝ့ၫအမ့ၬၥၪ ကဂၩဂီၩ့ကဂၩတၭ ထီၩ့လၧနးဒၪဘၨၩအီၪနီၪ အမ့ၬၥၪန့ကဖျိၪ့မၬဆံၭလီၫ ဆၧဖၩ့လၫ့ချုုၭန့တၭ အီၪထးကဖျိၪ့နီၪ မၩဝ့ၫချုၭလၧၩ့အ့ၬနီၪလီၫႉ လၧခဲၫ့ ဆၧဖၩ့လၫ့အခၫ စဎွၩဒိၪနီၪ ခွံၬလၩ့အလူလၧ ၦလၧအမိၡါခံးဂၩ့လကိၭဘၪနီၪ အီၪလၧနီးဖၧၩ့ယီၩန့အ့ၬတၭ ၦနွ့ၫမုၪၥံၪနီၪ ဘၪစဲၪ့လၫ့လၧနီးဖၧၩ့ နးဒၪဘၨၩဝ့ၫအမ့ၬၥၪအီၪကဖျိၪ့ဒံၭဘိၭ လ့ၩအမ့ၬယၫဂီၩ့ အဝဲမုၪၥံၪဘၪလီၩ့ဖိၬအဝ့ၫအခဲၫ့နီၪလီၫႉ

လၩ့ယၫ့ၥၭဝ့ၫဒၪ ၦနွ့ၫမုၪၥံၪယီၩ အမ့ၬၥၪခီၫ ဒၪဆၧၥ့ၪအ့ၬ အီၪခီၫလၧ အဒံၪအဒၧၩ့တၭ ဂဲၫထဲၩ့ထီၩ့လၧ ဖၧၩ့ၥၭအထီ ဒၪၦမုၪမဲၪအဂံၪ့ကဖျိၪ့တၭ နုၬလၫ့အီၪပွံၭဂီၩ့ လ့ၩထဲၩ့အလးအီၪအ့ၬ လီၩ့အ့ၪၦမုၪမဲၪနီၪအခၫ ၦမုၪမဲၪအၡၪ့အယါဖိၪလဂၩနီၪ ယၪ့ၥၭအဝ့ၫၥံၪတၭ ဒုၭအီၪဝ့ၫလၧ အဂံၪ့နီၪလီၫႉ လၧခဲၫ့ အဝဲမုၪအဎိၩထုၬနီၪ အီၪဖျဲၪဂုန့ အဖိၪခွၫကဂၩလီၫႉ လါနၫ့  အဝ့ၫၥံၪအၪ့မွဲဆၧအီၪနးမံၩ့အ့ၬတၭ အထၧၫ့ဖုဝဲၥံၪနီၪ အၥၭဘၪလၩ့ဎိၭလၧ ကအၪ့ဖိၪအယၪနီၪလီၫႉ ဖိၪၥၪနီၪ အၪ့နၩ့ဝ့ၫ (၇) ပိၩ့ဂီၩ့ လၧခဲၫ့ ပၧၩလၧ အဖိၪအီၪထဲနီၪ ကဘၪဒုၭအၪ့ထဲၩ့ဝ့ၫ ဘဲၫယီၩၥိၭလီၫႉ အထီနီၪ နးဒၪဘၨၩဝ့ၫ လၧအဝ့ၫအဂးန့နီၪ အၪ့ဝ့ၫအၪ့ဂီၩ့ အီၪက့ၪထၬဝ့ၫလၧ မ့ၪခူၪထၪ့ဖၫ့ခိၪနီၪလီၫႉ ဘၪန့လဲၪစွါဘဲၫ အဝ့ၫအမွဲအဖိၪအီၪ ကမိမၩၥံၫဝ့ၫအ့ၬတၭ အီၪက့ၪထၬဝ့ၫလဖၪနီၪ ကဒုၭအၪ့ထဲၩ့အဝဲၥံၪအဂးနီၪလီၫႉ လၧခဲၫ့ အဝဲမုၪၥံၪလဖၪမွဲထိးဆၧၫ့ဆ့နီၪလီၫႉ နးဒၪဘၨၩလဖၪအီၪဖျဲၪန့ အဖိၪခွၫအခၫ ကိၭအ့ၪဝ့ၫအမံၩ့လၧ ၦဒူၩဖိၪနီၪလီၫႉ

ၦဒူၩဖိၪလဂၩ ဂဲၫဎိၩလၫ့အခၫ အမိမိၥၭဘီၩ့လီၩအ့ၪ ဒိၭခၩမိဎွါ မၩနၧၩ့မၩစၪထၬ အဝ့ၫအမိမိဒဲ အမိဂါၥံၪလဖၪအဂဲးအဖးလဖၪတၭ အဝ့ၫၥၭထၪ့ဒိၪမၬလီၫႉ ၦဒူၩဖိၪလဂၩ အၥၭအီၪ ၁၆နံၪ့ ၁၇နံၪ့အခၫ ကမိမၩဆၧမၩလၧ နီးဖၧၩ့အကၠီၩ့ လ့ၩလီၩအ့ၪစဎွၩအခၫ စဎွၩနးဆ့ ၦဒူၩဖိၪနီၪ မွဲၦလၧအခံးအဂၩ့ဂ့ၩဘၪဒဲ မွဲဂ့ၩဆ့အကၠီၩ့ စဎွၩဖ့ၪလၫ့အ့ၪအလးလၧ ၥုၭခိၪဒိၪမူၩဒၩနီၪလီၫႉ ၦဒူၩဖိၪယီၩ စဎွၩအဲၪအၪမၬလီၫစွါဘဲၫႉ ဂီၩ့နီၪ ၦဒူၩဖိၪယီၩ မွဲၥၭဘၪ့လၧ အဒူၩအကၠီၩ့ စဎွၩဒိၪဘၪအၥၭအၪမၬဒဲ ဖ့ၪလၫ့အ့ၪဝ့ၫ အခွးအရ့ၩ အီၪက့ၪဝ့ၫဘဲၫစဎွၩဖိၪလဂၩနီၪလီၫႉ လါနၫ့ ဒိၭခၩမုၪၡါနီၪ ၥ့ၪယၫလၧ အဝ့ၫအဒူၪဒၩအကၠီၩ့ ကိၪ့တဲၩ့ထၪ့ဝ့ၫလၧ ကမၩၥံၫ ၦဒူၩဖိၪနီၪလီၫႉ