လၧဎြံၬဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့နီၪမွဲဝ့ၫဒၪ ၥၭလိဖၭ ဎီးၡၩအဂဲး အကၠီၩ့နီၪလီၫႉ ဆၧလၧ ၥၭလိဖၭနီၪ နၧၩ့ၦၡၩအၪမၬဒ့ၭႇ မၩကၪၦၡၩအၪမၬဒ့ၭနီၪလီၫႉ ၦၡၩလနၩ့နၩ့နီၪ ဘၪထွ့ၫလၧ ကျိၪစ့ၩၥံၪနီၪ ၥၭလိဖၭအီၪအၪမၬဂီၩ့ ၦၡၩလနၩ့နၩ့နီၪ ဘၪထွ့ၫလၧ ဆၧစီၩ့ဆၧမၩ့နီၪ ၥၭလိဖၭ အီၪအၪမၬဒ့ၭနီၪလီၫႉ ပအီၪၥၭမၧၫ့ဖၧၩ့ယီၩ့ ဆၧကဒီၪ့နီၪ အ့ၪအၪ့န့အလးလၧ ပၥၭခံဖၧၩ့ စွါဘဲၫ ပကကဲၪထၪ့ အဝ့ၫၥံၪ ဎီးၡၩနီၪလီၫႉ
အဲၪကွံၩဘၪထၧၫ့ဖုဝဲ ထံၩၥိၭထီးအလူၬၥံၪဧ့ႇ အနဲၩအဎီၩ့ယီၩ ပကဒၪဘၪ ၦအၪဒၪဆၧနီၪ ဘၪကဲၪအဝ့ၫၥံၪ ဎီးၡၩနီၪလီၫႉ ၦၡၩအၪဒၪဆၧနီၪ အ့ၪဘၪထိး ၥၭလိဖၭ ဎီးၡၩစွါဘဲၫ ဂံၪ့ဒီၪ့ဖိၪၥံၪ လဂၩဘၪလဂၩ ကဲၪထၪ့ဒုၪဒၩႇ အ့ၪလမွဲဘၪ လၧထံၩၥိၭၥံၪ အကျၩ ကဲၪထၪ့ဒုၪဒၩနီၪလီၫႉ ဘၪထွ့ၫလၧ ၥၭလိၭဖၭယီၩ ၦၡၩလနၩ့နၩ့နီၪ မၩၥံၫဆၧႇ မၩနၧၫ့မၩစၪဆၧႇ ဆၧလဂ့ၩဘၪထီးအလူၬ မၩဝ့ၫထၪ့ကိၭမံၩ့နီၪလီၫႉ ဆၧနီၪအကၠီၩ့ ၥၭလိဖၭယီၩ မၩအၪ့လဲၩထၪ့ ၦၡၩအၥၭ န့အမံၩ့မံၩနီၪလီၫႉ ဆၧနီၪအကၠီၩ့ ပကဖီၩ့ဖျ့ၭလၧ ၥၭလိဖၭ ဎီးၡၩယီၩကန့အဂး ပကဘၪမၩနၧၩ့ခၪ့ဖျီၪနီၪလီၫႉ
အဲၪကွံၩဘၪထၧၫ့ဖုဝဲ ထံၩၥိၭထီးအလူၬၥံၪဧ့ႇ ၦၡၩလဂၩဘၪလဂၩ ကဘၪအဲၪလိၬၥၭႇ ကဘၪမၩဆၧၩ့လိၬၥၭ ကၥ့ၪအဂး အဆၧၥီၪ့ဆၧၥၫ့နီၪ ပကဒၪဘၪလၧ လံၬဆံၫ့ဎံၪဖၧၩ့ႇ အ့ၪလမွဲဘၪ ပကနါဂၧၫ့ဘၪလၧ ဆၧဘုၪ့ဆၧဘၭ ဆၧၥီၪ့ဆၧၥၫ့ဖၧၩ့နီၪလီၫႉ ဆၧနီၪအကၠီၩ့ ပအီၪၥၭမၧၫ့ကိၭနံၩ့ဖၧၩ့ ၥၭလိဖၭ အီၪကဒီၪ့နီၪ အီၪပဲၩထၬဂီၩ့ ပကဘၪအီၪၥၭမၧၫ့လၧ ဆၧအဲၪဆၧကွံၩ လိၪဝ့ၫဒၪအကၠီၩ့ ၥၫ့ဎွၩဖရၫ့စ့ၭ အဆၧၥီၫ့ဆၧၥၫ့အီၪ ဝ့ၫဒၪ ဘဲၫယီၩၥိၭအဂဲး ယရၩလၩ့န့အ့ၪဘၪနၥံၪလၧ ဆၧအဲၪဆၧကွံၩ ဎိၩဒိၪဖၧၩ့နီၪလီၫႉ အဲၪကွံၩဘၪထၧၫ့ဖုဝဲထံၩၥိၭ ထီးအလူၬ မွဲနၥံၪလၧၫဎွ့ၩဝ့ၫဒၪလၧ ကဆါဎြံၬအဆၧအဲၪဆၧကွံၩ လါဆံၭႉ