လၧဎြံၬဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ မံၩ့ဎိၩၥၪဖျီၪ မုခွၫလၧအအီၪအနိၪ့ အဆၧရၩလၩ့ဖၧၩ့ မုကနံၩယီၩ ယအဲၪဒိၭ ရၩလၩ့န့အ့ၪဘၪနၥံၪနီၪ မွဲဝ့ၫဒၪ ၦဆံၫ့ဎံၪ Oscar Romero အဂဲးအကၠီၩ့နီၪလီၫႉ ၦဆံၫ့ဎံၪ Oscar Romero ယီၩ မွဲဝ့ၫ ၥၫ့ခိၪဒိၪကပၩနီၪလီၫႉ အဝ့ၫကဲၪၥၫ့ခိၪ ၥၧၫ့နံၪ့အထးဖၧၩ့နီၪ ဘၪဒၪလၧ မၩဆီၪ့ဆၧ အၪမၬဒ့ၭနီၪလီၫႉ လကၭဒ့ၭဘၪ ၦလၧဘၪထိး မၩနၧၩ့မၩစၪၥၭၥံၪအဂး ပဒၩထၬအ့ၪဝ့ၫနီၪလီၫႉ အဝ့ၫဘၪဒၪဆၧၫ့ယၫလၧ ဆၧလတီၩလဘၪအခံၫ့ လီၩဆၧအတီၩ ဒူၩဒူၩနီၪလီၫႉ အခံၫ့အထီဒၪအိၩ အဝ့ၫတရါလၩ့ ဆၧပရၧၫ့လၧ လၫ့ခွ့ၩလူဖၧၩ့ နီၪမွဲဝ့ၫဒၪ ဆၧမၩနၧၩ့ မၩစၪဆၧအဂး ဆၧအတီၩနီၪ ၦကိၭဂၩကဘၪၥ့ၪယၫ အဂဲးအကၠီၩ့ နီၪလီၫႉ
လကၭဒ့ၭဘၪႇ နၥံၪလီၩမၩၥံၫ ၦမၩဆံၬဖိၪၥံၪနီၪ မွဲဝ့ၫဒၪနၥံၪ အထၧၫ့ဖုထၧၫ့ဝဲၥံၪနီၪအကၠီၩ့ လီၩအဝ့ၫၥံၪ ဒူၩဒူၩနီၪလီၫႉ နၥံၪကဘၪမၩၥံၪ ၦၡၩအၥၭအဂး ခွံၬလၩ့အလူ နၥံၪနါဂၧၫ့စွါဘဲၫ ပမၩၥံၫဘၪ ၦၡၩအၥၭအ့ၬ နၥံၪကဘၪ နၪ့ထၪ့ထဲၩ့ ကဆါယွၩ ဆၧမၪလူၬနီၪလီၫႉ ဘၪမနီၪလဲၪစွါဘဲၫ နၥံၪလီၩမၩၥံၫဆၧအကၠီၩ့နီၪ ပအီၪၥၭမၧၫ့လၧ မူၬခိၪ ဒဲဂၪ့ခိၪဖၧၩ့နီၪ ဘၪဎွ့ၩထၪ့လၧ ဆၧဂၪ့အလူၬနီၪအကၠီၩ့ ၦဆံၫ့ဎံၪ Oscar Romero လီၩဖျီၪထၪ့ဝ့ၫ ဒူၩဒူၩနီၪလီၫႉ ဆၧနီၪအကၠီၩ့ နၥံၪၥ့ၪယၫလၩ့ထဲၩ့ နၥံၪအဆၧမၪဂီၩ့ နၥံၪကဖျါထုၬ ဆၧမၩယီၩအဂး ယအၪ့က့ၩအၪ့ယၫနၥံၪနီၪလီၫႉ
ၦဆံၫ့ဎံၪ Oscar Romero လီၩဆၧချဲၩ့ယီၩအကၠီၩ့နီၪ အဝ့ၫဘၩကဲၠဲၬအခံၫ့ ၦၡၩဂဲၫခၬၥံၫခွံၭ ၦဆံၫ့ဎံၪ Oscar Romero နီၪလီၫႉ နံၪ့ (၂၀၁၅) နံၪ့နီၪ ၥၫ့ဎွၩဖရၫ့စ့ၭ ရွံထၪ့အဝ့ၫ Blessed Oscar Romero ဂီၩ့ နံၪ့ (၂၀၁၈) နံၪ့ နီၪ ရွံထၪ့ဝ့ၫ ၦဆံၫ့ဎံၪ Oscar Romero နီၪလီၫႉ အဲၪကွံၩဘၪ ထၧၫ့ဖုဝဲထံၩၥိၭ ထီးအလူၬၥံၪဧ့ႇ ဘဲၫၥိၭ နၥံၪကထီးန့ထၬ ၦဆံၫ့ဎံၪ Oscar Romero အဂဲးအကၠီၩ့ ကန့အဂး ယရၩလၩ့န့အ့ၪဘၪနၥံၪလၧ ဆၧအဲၪဆၧကွံၩ ဎိၩဒိၪဖၧၩ့နီၪလီၫႉ အဲၪကွံၩဘၪထၧၫ့ဖုဝဲထံၩၥိၭ ထီးအလူၬ မွဲနၥံၪလၧၫဎွ့ၩဝ့ၫဒၪလၧ ကဆါဎြံၬအဆၧအဲၪဆၧကွံၩ လါဆံၭႉ