ဆၧဘံၪၥိၭလဖၪၥံၪယီၩ အ့ၪပခွံၬၡိၬထၪ့ဘဲၫယီၩၥိၭအခၫ ကဆုးကဲၪထၪ့ဝ့ၫဆၧအအၧၩ့လဖၪနီၪ ဘဲၫယလီၩ ထၬအဂုးခိၪအိၩအၥိၭ အၪဝ့ၫအၪမၬနီၪလီၫႉ အ့ၪပနီၫစွါဘဲၫ ဆၧအၪ့စၪ့ကအီၪလၧ ပမၩထဲၩ့အဂူၫဂၩန့နးမံၩ့အ့ၬဧၪႉ ကဝ့ၫနီၪ မွဲပၥိၩ့ထၪ့ထဲၩ့နးကၠၪဒီၭ ၥ့ၪဒံၭနီၪလီၫႉ ၥဲၫထံၫခးနီၪ ဘဲၫထံၫခးလ့ၩထၪ့လ့ၩထီၪ့ဝ့ၫအၥိၭ ဆၧဘံၪၥိၭနီၪ မွဲၦလၧအမၩကဲၪထၪ့ဝ့ၫဘဲၫထီၪ့ၥံၪနီၪလီၫႉ
အၡါမၪနီၪ ပအၪဒၪဆၧ ပခွံၬၡိၬခွံၬ ဆၧဘံၪၥိၭၥံၪလဖၪနီၪ ပကဘၪၥိၭထၪ့ထဲၩ့ပၥ့ၪလဲၪ မွဲလၧ ပၥ့ၪယၫဘၪနီၪလီၫႉ ပကၥိၩ့ထၪ့ထဲၩ့ ပၥ့ၪယၫယူၭလါနၫ့ ပကဘၪၥိၩ့ပၥ့ၪလဲၪ မွဲပဆုးအၪ့ဎၬလန့ဘၪလီၫႉ ဆၧအယီၩနီၪမွဲ ဂၪ့ခိၪယီၩ ပလၭစတ့ၭဆၧဘံၪၥိၭလဖၪ ပလီၩ့အၪ့ထုၪ့ဎီၩ့လူၬလၧၩ့အ့ၬ ဘၪအၪဝ့ၫဒၪ အဂဲးအဖးနီၪလီၫႉ မွဲဆၧဘဲၫနီၪ ဆၧလၧဆၧဘံၪၥိၭနီၪ လၧပၥိၩ့ထၪ့ထဲၩ့ဘၪအကၠီၩ့ ဘၪကဲၪထၪ့ဆၧဘံၪၥိၭနီၪလီၫႉ အ့ၪပကၥိၩ့ထၪ့ထဲၩ့ လၧအဂူၫဂၩစွါဘဲၫ ဆၧဘံၪၥိၭနီၪ ပမၩကဲၪထၪ့ကန့ ဘဲၫထီၪ့ ဒဲ ဘဲၫပမၩကဲၪထၪ့ကန့ ဘဲၫယီၩၥိၭအဂး ပကဘၪမၩထီၪ့ထၪ့ ပဆၧစီၪဆၧဒီၩ့ၥံၪ အကၠီၩ့ အဲၪဒိၭပဂၨၪထၪ့ဘၪလၧ ဆၧထံၪလၩ့ဒီၪလၩ့ဖၧၩ့ ယီၩနီၪလီၫႉ