ၦနွ့ၫမုၪၥံၪနးဆ့ အဖါဖါလီၩနီၪ စီၪဝ့ၫအၡါမၪဘိၭ ခိၬကၠၭဝ့ၫလၥၨၩႉ လါနၫ့ မွဲအဖါဖါလဂဲၫထဲၩ့ဘၪလၧအဝ့ၫၥံၪအီၪ နးကၠၪလီၫႉ လၧခဲၫ့ ဆၧကဂဲၫခံၭလၩ့လီၫ အဖါဖါမွဲဂဲၫထဲၩ့နးကၠၪလၧၩ့တၭ စီၪဘၪဝ့ၫ ဘီၪအဲၪ့အဖါဖါဘိၭ လီၩယိဎွါကၠၭဝ့ၫလၧ ၡိၬကျၩဖၧၩ့နီၪလီၫႉ ၦနွ့ၫမုၪၥံၪယီၩ ထဲၩ့အဂံၪ့ခီၫ မဘၪလၧၩ့ဧၪအ့ၬ ဆၧခံၭယူၭတၭ ၥၭမဲၪဆၧ ကကၠၪကၠၪ အထၧၫ့ဖုဝဲမုၪနွ့ၫဂၩယီၩ ဖီၪ့ဝၭထၬလိၬၥၭဂီၩ့ဂၪ့ကၠၧၫ့ကၠၧၫ့ အဝ့ၫၥံၪဘၪထိးဆၧကၪဆၧဂဲၩလၧ ၡိၬကျၩ အမံၩ့မံၩ့နီၪလီၫႉ ၦနွ့ၫမုၪၥံၪလဖၪယီၩ လီၩလ့ၩလၧ ၡိၬကျၩ အခံၫ့ယံၬ နံၫၥၫ့ကကၠၪ အၪ့ဘၪဆၧနးမံၩ့အ့ၬ အီၩဘၪထံၫဧၪအ့ၬ ကလၩ့ထံၩဖါထီနီၪ လဘူၭလယဲၩ့ဘၪလၧအဝ့ၫၥံၪ နီၪ နါဂၧၫ့ထံၫကၠီၪ့ဆ့ၭယွၩလၩ့ကဒုၩတၭ ဆုးလ့ၩဝ့ၫထၧၩ့အထီၩ့နီၪလီၫႉ အဝ့ၫၥံၪ လ့ၩထီၩ့လၧ ထံၫကၠီၪ့ဖိၪနီၪကကၠၪ ဒၪဘၪ ယၪဖိၪၥံၪအၪမၬတၭ ဆၧမုၬကၠၭအၥၭ အီၩထံၫန့ အၪ့လုထံၫန့ အၪ့ကၪအၪ့ယၪန့  လၧမုနၩခီၫအခၫ မံၫကၠၭလၧ ထံၫကၠီၪ့နဲၩ့နီၪလီၫႉ အလးထနီၪ မံၫထၪ့ဘၭၥၧၫ့နၩကကၠၪ ဒၪဆၧအမ့ၬၥၪဝီၩဝီၩယိထၪ့အဝ့ၫၥံၪတၭ ၥၭမဲၪဆၧ စဲၪ့ကၠၭနီၪလီၫႉ

ထၧၫ့ဖုဝဲမုၪခွၫၥံၪဧ့ႇ ဆၧအမ့ၬၥၪဝီၩဝီၩနီၪ မွဲဆၧအဂူၫဂၩအ့ၬ အဝ့ၫနီၪ မွဲဒၪ ဖျ့ၪထီၪ့ဒိၭခၩမိဎွါ လၩ့ၥၭမဲၪဝ့ၫဒၪ အၪမၬလီၫစွါဘဲၫႉ အဝ့ၫအီၪလၧ ဒိၭခၩအခးလါနၫ့ဂ့ၩ ကမိအၪ့ၦၡၩအယၪနီၪ ဂဲၫလၩ့လၧ ၦၡၩၥံၪအီၪအလးနီၪလီၫႉ အနီၪတၭ အဝ့ၫဒၪလၧပနွ့ၫမုၪၥံၪနီၪ ကမိအၪ့ဝ့ၫလါနၫ့ ၦနွ့ၫမုၪၥံၪနီၪ စဲၪ့တၭ အဝ့ၫလီၩ့လၧ အလးခဲၫ့နီၪလီၫႉ လၧခဲၫ့ ၦနွ့ၫမုၪၥံၪနီၪ လ့ၩစဲၪ့ထီၩ့လၧ ထံၫခးကခးနီၪလီၫႉ အဝ့ၫၥံၪလ့ၩထီၩ့အလးနီၪ မွဲလၧ စဎွၩအနီးဖၧၩ့ အၪ့လုထံၫအလးကမၫကကမၫတၭ ထံၫအီၪဝ့ၫဎံၫဖျံၩ့ ကမၫဖၭဒိၪနီၪ ဒၪဝ့ၫကထံၪဎး ကမိအၪ့လုကၠၭထံၫနီၪလီၫႉ အနီၪတၭ ၦနွ့ၫမုၪယီၩ စဲၪ့လၩ့အၪ့လုကၠၭထံၫလၧ စဎွၩအကမၫဖၧၩ့နီၪလီၫႉ

လၧခဲၫ့ ၦမၩဆၧဖိၪလၧ စဎွၩအနီးဖၧၩ့ ၦမုၪနၩ့ဖိၪလဖၪ ဂဲၫဒုၪ့ထံၫတၭ ဒၪၦနွ့ၫမုၪၥံၪနီၪလၥၨၩႉ ကထံၪဎး ၦမုၪနၩ့ၥံၪလဖၪနီၪ ထဲၩ့လီၩအ့ၪအစဎွၩ ဂဲၫထဲၩ့ဒၪဝ့ၫ လၧကမၫနီၪ ဎံၫလၩဝ့ၫနၭဒ့ၭ ၦနွ့ၫမုၪၥံၪ အၪ့လုထံၫအဂဲးနီၪလီၫႉ လၧခဲၫ့ စဎွၩနီၪ လ့ၩယိဂီၩ့ ကဲၪ့ထၪ့လၧၦၡၩတၭ ဂဲၫထဲၩ့ကိၭန့ဝ့ၫလၧနီးဖၧၩ့ဂီၩ့ ဒုၭကဲၪ့ထၪ့ဝ့ၫဒၪ နးဎွၩမုၪၥံၪနီၪလီၫႉ ဖျ့ၪထီၪ့ဒိၭခၩမိဎွါနးဆ့ လီၩ့လ့ၩဖိၬၦနွ့ၫမုၪၥံၪ အခၪ့လးတၭ လ့ၩထီၩ့လၧ စဎွၩအထံၫခးနီၪဆ့လီၫႉ အဝ့ၫနီၪ လူလၫ့အၥၭဘဲၫၦၡၩဂီၩ့ လ့ၩအၪ့လုထံၫလၧ စဎွၩအကမၫဖၧၩ့နီၪဂီၩ့ မၩအၥၭဘဲၫၥိၭကလိၬမုၪလဂၩလီၫစွါဘဲၫႉ ၦမၩဆၧဖိၪလၧ နီးဖၧၩ့ လ့ၩဒုၪ့ထံၫအခၫ ဒၪဝ့ၫကဂၩဒီၭအကၠီၩ့ ဂဲၫထဲၩ့လီၩအ့ၪအစဎွၩအခၫ စဎွၩနီၪ အၥၭဎွံၪလၥၨၩႉ လၧခဲၫ့ စဎွၩဖၭဒိၪနီၪ လ့ၩကိၭဂီၩ့ ဒုၭကဲၪ့ထၪ့ဒီၭဝ့ၫ အဝ့ၫအနးဎွၩမုၪဒီၭနီၪလီၫႉ

ဖျ့ၪထီၪ့ဒိၭခၩမိဎွါလဒုၩ လူၫလၫ့အၥၭဘဲၫၦၡၩဂီၩ့ ထီၩ့လၧ စဎွၩအနီးအခၫ ၦၡၩဖိၪယီၩ ကဂဲၫကဲၪ့ထၪ့ဘဲၫၥ့ၪလဲၪနီၪ လၧခဲၫ့မုနွ့ၫမၬ ယကဆုးလီၩဖ့ၪနဲၪနၥံၪနဲၪႉ