လၧဎြံၬဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့နီၪမွဲဝ့ၫဒၪ ဆၧလမီၪ့ဎီၩ့ဘၪနီၪ မၩဒိၪထၪ့အၪထၪ့ ဆၧအခိးအတၩ အဂဲးအကၠီၩ့နီၪလီၫႉ ဆၧလမီၪ့ဎီၩ့ဘၪအီၪနီၪ ပဘၪၥၭမဲၫလိၪအ့ၬ ပအီၪၥၭမၧၫ့ဖၧၩ့ ဆၧလမီၪ့ဎီၩ့ဘၪ အီၪအမံၩ့မံၩ့အကၠီၩ့နီၪ ပန့ထၪ့ဘၪ ဆၧမုၬဆၧလၩအမံၩ့မံၩ့နီၪလီၫႉ ဆၧလၩ့ဆၫဒဲ ဆၧယံၩၡီၩ့နီၪ ခီၫလၧဎရံၬဖိၪၥံၪ စၭထၪ့အီၪဒၪအိၩ အီၪထၬဝဲၩ့နီၪလီၫႉ ဆၧလၩ့ဆၫ ၥၭနီၩ့ထၪ့ဒၪဆၧ ပကဘၪမၩလီၩပျၩ့ ကၩ့ကၩဎိၬလၩ့နီၪလီၫႉ
အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ဆၧလမီၪ့ဎီၩ့ဘၪအီၪနီၪ ဎရံၬဖိၪၥံၪအဂး ကဆါယွၩဖ့ၫအ့ၪ အခိးအတၩကမံၩ့နီၪလီၫႉ ပကယိ မုၬထၪ့ခးဒီၪ့ ဎရံၬဖိၪၥံၪစွါဘဲၫ အဝ့ၫၥံၪဘိၪ့ထၪ့ဘၩထၪ့ ဆၧမီၪ့ဎီၩ့လိၬၥၭ အီၪန့မံၩ့အ့ၬ လါနၫ့ အဝ့ၫၥံၪယီၩ အီၪအၪ့လၧ ဆၧဆူၩနဲၩဒဲ ဆၧယံၩၡီၩ့နီၪလီၫႉ ဆၧလမီၪ့ဎီၩ့ဘၪအီၪဒၪဆၧ အဝ့ၫၥံၪအီၪၥၭမၧၫ့ဖၧၩ့နီၪ အီၪက့ၪပဲၩခွံၬလိၬၥၭ အီၪနးဆံၭအ့ၬ အဝ့ၫၥံၪန့ထၪ့ဘၪ ဆၧအဂဲးအဘၭနီၪလီၫႉ ပအီၪၥၭမၧၫ့လၧ ဂၪ့ခိၪဖၧၩ့ယီၩ ၦကိၭဂၩၥံၪယီၩ ပမီၪ့ဎီၩ့လိၬၥၭ အီၪအ့ၬမွဲလါနၫ့ ကဆါယွၩအမ့ၬယၫနီၪ ပမီၪ့ဎီၩ့လိၬၥၭထီးလူၬနီၪလီၫႉ
အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ပကဲၪဎရံၬဖိၪၥံၪ ကိၭဂၩယီၩ ဆၧလမီၪ့ဎီၩ့ဘၪ ပဒၪစွါဘဲၫ ဆၧအယီၩနီၪမွဲဝ့ၫဒၪ ကဆါယွၩအခိးအတၩနီၪ ပကဘၪနၪ့ထၪ့ လိၪဝ့ၫဒၪအကၠီၩ့ ၥၫ့ဎွၩဖရၫ့စ့ၭ အဆၧၥီၫ့ဆၧၥၫ့အီၪ ဝ့ၫဒၪ ဘဲၫယီၩၥိၭအဂဲး ယရၩလၩ့န့အ့ၪဘၪနၥံၪလၧ ဆၧအဲၪဆၧကွံၩ ဎိၩဒိၪဖၧၩ့နီၪလီၫႉ အဲၪကွံၩဘၪထၧၫ့ဖုဝဲထံၩၥိၭ ထီးအလူၬ မွဲနၥံၪလၧၫဎွ့ၩဝ့ၫဒၪလၧ ကဆါဎြံၬအဆၧအဲၪဆၧကွံၩ လါဆံၭႉ