ပကဲၪၦဖျိၩ့ဖိၪၥံၪယီၩ အၪဒၪဆၧနီၪ ပၥၭဂ့ၩၥၭဘွၩအီၪ လကၭဘၪ ပဆၨၫကၠၭဒံၭႉ ပၥၭဂ့ၩၥၭ ဘွၩအီၪ ပအီၪၥ့ၪတီၩတီၩလီၩ့လီၩ့နီၪ မငါႉ လါနၫ့ဂ့ၩ အ့ၪပဆၨၫနီၪဘိၭ မငါလၧၩ့အ့ၬႉ

ဘၪထွ့ၫလၧ အဆၧအဂဲးယီၩ ယဖီထၬဘၪလၧ လံၬစီၩ့ဖၧၩ့ လၧအခီၩ့အိၩ လၧဒိၩ့မုတဝၫ့ၥံၪနီၪ ဆၧဂၩ့မၧၫ့ၥံၪ စဲၭလူလဲၥံၪ စဲၭလူၥီၫၥံၪ အီၪနၭဒံၭအ့ၬမွဲအ့ၬဧၪႉ အနီၪဒၪအိၩ အ့ၪမွဲဆၧဘိၪ့ၥံၪဘၪၥံၪ အီၪအခၫ ၦၡၩလီၩ့အၪ့လံၩ့ ဝဲလၫ့စဲၭလူလဲ ဘနီၪအီၪဘီၩႉ အနီၪ ၦထၧၫ့ဖိၪဖါနံၫဂၩနီၪ လီၩ့အၪ့လံၩ့လၩ့ အစဲၭလူလဲဘနီၪဂီၩ့ လီၩ့ဎွါကၠၭကျိၪစ့ၩလၥၨၩႉ အဝ့ၫၥံၪအစဲၭလူလဲနီၪ အ့ၪမွဲပျၩကမံၩ့မံၩ့စွါဘဲၫ အဝ့ၫၥံၪယီၩ ဘၪလ့ၩမၩဂ့ၩလၫ့ထဲၩ့ဝ့ၫလၥၨၩႉ

လၧအဝ့ၫၥံၪ လ့ၩမၩဂ့ၩလၫ့ယံၩယါဝ့ၫအလး ၦအမၩဂ့ၩလၫ့ဆၧနီၪ အ့ၪမွဲမၩဂ့ၩလၫ့ဆၧဂီၩ့ယူၭ စွါဘဲၫ အၪ့ကံၩ့အဝ့ၫၥံၪ လၩ့ထ့ၭဎွ့ၩနီၪဎွ့ၩယီၩဂီၩ့ စံၭအဝ့ၫၥံၪ အယီၩ မနၥံၪနီၪ ယအၪ့န့ဒၪ ယစူၪအလံၩ့ လီၫအီၭႉ ဆၧပိၭဆၧလၫ့အဎွ့ၩနီၪ ယအၪ့န့အ့ၬႉ စံၭဝ့ၫဘနီၪကိၭကၠၪႉ ၦအကဲၪဖါနီၪ မွဲၦလၧအၥၭဂ့ၩ ၥၭဘွၩဘိၭ နဲၩဝ့ၫအၡါမၪဂီၩ့ လ့ၩဘၪအခၫ လ့ၩန့ထဲးအ့ၪဝ့ၫ ဆၧၥူၫဆၧၥၫ ဆၧဒိၭဆၧလၪလဖၪ ခိၭမၬခိၭမၬႉ

လါနၫ့ၦအကဲၪဖိၪနီၪ မွဲလနဲၩဘၪဝ့ၫအကၠီၩ့ ဆၧပိၭဆၧလၫ့လၧအဂၭဂီၩ့နီၪ ဂဲၫထဲၩ့ဆိၬန့ထဲၩ့ ဝ့ၫဂီၩ့ လ့ၩလီၩ့အၪ့စၪ့ထဲၩ့ဝ့ၫအနံၪ့ လၧၦၡၩအၪ့ဆၫဆၧအလးအခၫ ၥ့ၪယၫဝ့ၫလၧ ၦမိနီၪအိၩ ဒိၪအၪ့ အဝ့ၫၥံၪကိၭဘျၩ့အဂဲးနီၪလီၫႉ အဝ့ၫအၪ့ကံၩ့ အစူၪလံၩ့နီၪ အၪနဲၪ့န့ ဆၧပိၭဆၧလၫ့အဎွ့ၩ၃စၩ၄စၩဒံၭနီၪ လီၫႉ

ၦအကဲၪဖိၪခွၫယီၩ ထဲၩ့လီၩအ့ၪအဖါအခၫ အဖါယီၩ ဘၪထိးအၪ့လီၫ ကိၭဘျၩ့အကၠီၩ့ အၥၭမုၬ လၧၩ့နးဆံၭလၧၩ့အ့ၬႉ စၭထၪ့လၧအခံၫ့နီၪ အဝ့ၫၥံၪ လ့ၩမၩဂ့ၩလၫ့ ဆၧလၧၦၡၩနီၪ အအီၪနးဆိၭလၧၩ့ အ့ၬႉ

ဆၧထယီၩ ပကဘၪၥ့ၪယၫထၬကမံၩ့နီၪ ၦကိၭဂၩဒ့ၭနီၪ မ့ၬချူၭဘံၭ အီၪဝ့ၫဒၪကိၭဂၩႉ အ့ၪမွဲပ ဆၨၫနီၪဘိၭ ပကဘၪထိးဒိၪအၪ့ပၥၭ ကိၭဘျၩ့ဒ့ၭနီၪလီၫႉ ပဖျိၩ့ဖိၪၥံၪအၪဒၪဆၧ ဘၪၡၪ့ဘၪယၬကၠၭနီၪ ဆၨၫအကၠီၩ့နီၪမွဲပၫဆ့ႉ ပဆၨၫဘိၭပၡၩဒိၪအၪ့ပၧၩမုၬလၥၨၩမွဲအၬဧၪႉ ကဘၪလူၬဝ့ၫဒၪ ၅၀၀ႇ ၁၀၀၀ အလးနီၪ လူၬ ၂ ၃ ၄ ထီၫႉ ဆၧအယီၩယံၭထၪ့ကဆံၭ ပထီးလူၬဂီၩ့လူၬစၪ ကအၪလၫ့ကဆံၭမွဲအ့ၬဧၪႉ ၦအဆၨၫအဂးနီၪ အီၪဒၪဆၧအစၪလီၫႉ ဆၧနီၪအကၠီၩ့ ဆၨၫကၠၭဘၪလၧၩ့လဂ့ၩနီၪဘိၭ ယမိလီၩၥ့ၪယၫအ့ၪဘၪနၥံၪလၧဆၧဂဲးဖိၪယီၩနီၪလီၫႉ ဘဲၫၥိၭပလဆၨၫဘၪအဂးနီၪ ပကဘၪမၩ မၥ့ၪ လဲၪစွါဘဲၫ ပကဘၪဖီလံၬအၪအၪ ပကဘၪလီၩ့မၩလိၪပၥၭ ဆၧမၩလိၪလဖၪအၪအၪနီၪလီၫႉ ဆၧအ ဂဲးယီၩ ယဖီထၬဘၪလၧ ဟန်စိုင်းကွ့ၭထၬ ညီမလေး သို့ပေးစာလံၬစီၩ့ဖၧၩ့နီၪလီၫႉ