လၧဎြံၬဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ မံၩ့ဎိၩၥၪဖျီၪ မုခွၫလၧအအီၪအနိၪ့ အဆၧရၩလၩ့ဖၧၩ့ မုကနံၩယီၩ ယအဲၪဒိၭ ရၩလၩ့န့အ့ၪဘၪနၥံၪနီၪ မွဲဝ့ၫဒၪလၧ ခး India နီၪ အဆၫ့လၧၫ့ထုၬ ကဲၪထၪ့ ၦဆံၫ့ဎံၪ Gonsalo Garcia အဂဲးအကၠီၩ့နီၪလီၫႉ ၦဆံၫ့ဎံၪ Gonsalo Garcia ယီၩအီၪဖျဲၪလၧ နံၪ့ (၁၅၅၆) နံၪ့ လၧခး India နီၪလီၫႉ အဝ့ၫအဖါဖါနီၪမွဲဝ့ၫဒၪ Portugi ၥူၭဖိၪလဂၩဂီၩ့ အမိမိနီၪမွဲဝ့ၫဒၪ Indian မုၪနီၪလီၫႉ အဝ့ၫယီၩ မွဲဝ့ၫၦကဲၪဒိၪကဲၪမုၬ ဖနံၬဖိၪ ကဂၩနီၪလီၫႉ လါနၫ့ အဝ့ၫယီၩ ကဘၪမၩၥၫထနၫဆၧမၩအဂး ဆၧၥၭနီၩ့အီၪ အၪမၬဒ့ၭအကၠီၩ့နီၪ လ့ၩနုၬလၩ့လၧ Fraciscam ခရၧၫ့ဖၧၩ့ ကဲၪၦယိၩယိၩဖိၪဂီၩ့ မၩၥၫထနၫဆၧမၩႇ လၧခဲၫ့ထုၬနီၪ ကဲၪထၪ့ အဲၩ့ၥဲၭကပၩနီၪလီၫႉ
ၦဆံၫ့ဎံၪ Gonsalo Garcia ယီၩဘၪ မၩၥၫထနၫဆၧမၩလၧ Spain ဆၨၩဖိၪၥံၪ ကၠၧၫ့ကၠၧၫ့နီၪလီၫႉ စၭထၪ့မၩ ၥၫထနၫဆၧမၩဒၪအိၩ ဖံၭၥိၭလိၬၥၭလၧ Taikosama ၦဎွၩန့ၡူၪၡူၪဘၩဘၩနီၪလီၫႉ လယံၬလမီးဘၪ ဆၧဘုၪ့ဆၧဘၩဂူၫဂၩ ၥၫ့ခၫနီၪ ၥၭခ့ၭဆၧ ကဲၪထၪ့ဂီၩ့ ဒုၭဘၪထံၭ ၦဆံၫ့ဎံၪ Gonsalo Garcia လၧ ၦဎွၩနီၪလီၫႉ ဆၧနီၪအကၠီၩ့ ၦဎွၩနီၪအၥၭထၪ့ဂီၩ့ လီၩဖီၫ့ ခး Japan ၥၫထနၫဖိၪၥံၪ ထီးအလူၬဂီၩ့ ခွံၬလၩ့ဝ့ၫလၧ ထီၫဖၧၩ့နီၪလီၫႉ အဝ့ၫၥံၪ လ့ၩကိၭန့ဎရံၬဖိၪ (၂၆) ဂၩလၧခိၪ လီၩ့စီၩ့ခိၪဂီၩ့ မၩၥံၫခွံၬဝ့ၫနီၪလီၫႉ
ၦဆံၫ့ဎံၪ Gonsalo Garcia နီၪ ဘၪထိးမၩၥံၫၥၭလၧ ထိၫစူၩယၫအဆၫ့လၧၫ့ထုၬနီၪလီၫႉ ဎရံၬဖိၪၥံၪထီးအလူၬနီၪ လၧထုၪစူၩယၫဖၧၫ့့ခိၪ ဒိၪထၬဝ့ၫလၧထၬဂီၩ့ ၥူၭဖိၪၥံၪနီၪ ဆ့ၭၥံၫအဝ့ၫၥံၪလၧ ဖျဲၩ့နီၪလီၫႉ ဆၧနီၪအကၠီၩ့ ၦဆံၫ့ဎံၪ Gonsalo Garcia ဒဲ ဎရံၬဖိၪဂူၫဂၩၥံၪနီၪ ၥၫထနၫအဂး ဘၪထိးမၩၥံၫၥၭ မွဲဝ့ၫ ၦၥွံၫဒူၩၥံၪနီၪလီၫႉ အဲၪကွံၩဘၪ ထၧၫ့ဖုဝဲထံၩၥိၭ ထီးအလူၬၥံၪဧ့ႇ ဘဲၫၥိၭ နၥံၪကထီးန့ထၬ ၦဆံၫ့ဎံၪ Gonsalo Garcia အဂဲးအကၠီၩ့ ကန့အဂး ယရၩလၩ့န့အ့ၪဘၪနၥံၪလၧ ဆၧအဲၪဆၧကွံၩ ဎိၩဒိၪဖၧၩ့နီၪလီၫႉ အဲၪကွံၩဘၪထၧၫ့ဖုဝဲထံၩၥိၭ ထီးအလူၬ မွဲနၥံၪလၧၫဎွ့ၩဝ့ၫဒၪလၧ ကဆါဎြံၬအဆၧအဲၪဆၧကွံၩ လါဆံၭႉ