လၧဎြံၬဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့နီၪမွဲဝ့ၫဒၪ ၦလၧအဆၧအီၪက့ၪၥုၪ့အီၪက့ၪၥၭ လအီၪဘၪလၧနၥံၪနီၪ နၥံၪကဘၪဖံၭၥိၭလိၬၥၭ အဂဲးအကၠီၩ့နီၪလီၫႉ ပမၩဆၧအဂ့ၩဒၪဆၧ အဝ့ၫၥံၪဒၪပၧၩန့အ့ၬႇ အ့ၪလမွဲဘၪ အဝ့ၫၥံၪဖၬထၬၥၭနီၩ့ထၪ့လၧ အမ့ၬယၫဂီၩ့ ဆၧအဲၪဆၧကွံၩ့လၩ့မၬခွံၬႇ အ့ၪလမွဲဘၪ စီၪဆံၭၦဂူၫဂၩဂီၩ့ စီၪဎိၩလၩ့ၥၭႇ ၦအယီၩၥံၪယီၩနီၪ ကဖံၭၥိၭလိၬၥၭလၧ ၦဂူၫဂၩအ့ၬ အီၪဒၪကလၩ့ဎွါ ၦဂူၫဂၩအဆၧမၪနီၪလီၫႉ
အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ လၧဂံၪ့ဒီၪ့ဖၧၩ့မွဲဂ့ၩႇ လၧအဖုၫဖၧၩ့မွဲဂ့ၩႇ ပကဒၪဘၪ ၦလၧ ဖံၭၥိၭလိၬၥၭလၧ ၦဂူၫဂၩ ၡၩအီၪအၪမၬဒ့ၭနီၪလီၫႉ ပအီၪၥၭမၧၫ့ကိၭနံၩဖၧၩ့ယီၩ ပကဒၪဘၪ ၦအယီၩၥံၪနီၪလီၫႉ ပကဘၪ ဖံၭၥိၭလိၬၥၭလၧ အဝ့ၫၥံၪယီၩနီၪ ၦကိၭဂၩအဂး ဆၧကၪဆၧဂဲၩကအီၪနီၪလီၫႉ ဆၧအယီၩနီၪမွဲဝ့ၫ ဆၧအၪ့ထၩ ကမံၩ့နီၪလီၫႉ ပအီၪၥၭမၧၫ့အနဲၩ့အဎီၩ့နီၪ အ့ၪပဒၪ ၦအယီၩၥံၪစွါဘဲၫ ပကဘၪမၩ ဖၧၩ့ၥၭအဂ့ၩထုၬနီၪ ပကဘၪကၩ့ကၩဎိၬလၩ့အဝ့ၫၥံၪနီၪလီၫႉ လကၭဒ့ၭဘၪ ပအီၪၥၭမၧၫ့ကိၭနံၩဖၧၩ့ယီၩ ၦလၧ ပကဘၪဖံၭၥိၭလိၬၥၭ ကၪအီၪမွဲလါနၫ့ ပကဘၪမၩနၧၩ့ခၪ့ဖျီၪ ဆၧအယီၩထီးအလူၬနီၪလီၫႉ
အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ နၥံၪအီၪၥၭမၧၫ့အနဲၩ့အဎီၩ့နီၪ အ့ၪနၥံၪဒၪဆၧၫ့ယၫ ၦလၧ ပဘၪဖံၭၥိၭလိၬၥၭကၪ အီၪစွါဘဲၫ လၧကဆါဎြံၬဆၧအဲၪဆၧကွံၩဖၧၩ့ နၥံၪကဘၪမၩနၧၩ့ခၪ့ဖျီၪ ဆၧကၪဆၧဂဲၩယီၩ လိၪဝ့ၫဒၪအကၠီၩ့ ၥၫ့ဎွၩဖရၫ့စ့ၭ အဆၧၥီၫ့ဆၧၥၫ့အီၪ ဝ့ၫဒၪ ဘဲၫယီၩၥိၭအဂဲး ယရၩလၩ့န့အ့ၪဘၪနၥံၪလၧ ဆၧအဲၪဆၧကွံၩ ဎိၩဒိၪဖၧၩ့နီၪလီၫႉ အဲၪကွံၩဘၪထၧၫ့ဖုဝဲထံၩၥိၭ ထီးအလူၬ မွဲနၥံၪလၧၫဎွ့ၩဝ့ၫဒၪလၧ ကဆါဎြံၬအဆၧအဲၪဆၧကွံၩ လါဆံၭႉ