…ယ့ၫၡုၬလ့ၩနုၬလၩ့လၧယရုစလံၫ့ဝံးဖၧၩ့အဂဲ ပယိဆိၫ့မီၪ့ထၪ့လါဆံၭႉ
အခံၫ့အခၫဘိၩ့နီၪအိၩႇ လၧဆၧဒုၭၥုၭအီၪအဆၧၫ့အထီနီၪ စဎွၩလဖၪ အ့ၪလ့ၩဆၧထဲၩ့ဆၧလၧ ၦခမျၧးအမ့ၬအခၫႇ အဝ့ၫၥံၪထၪ့ထူၭကၥ့ၪလီၫႉ လါနၫ့ဂ့ၩ လၧဆၧမုၬဆၧလၩအီၪႇ ဆၧဎူၫဆၧဎၩအီၪအခံၫ့နီၪ အဝ့ၫၥံၪ ထၪ့ထူၭကၥ့ၪယီၩ့လီၫႉ မီၪစဇ့ၭခရဲအၫချဲၩ့ထၬဆၧလၧမီၪအချိၬ လၧၫ့ထၪ့ဎွ့ၩထၪ့ဝ့ၫ လၧ
ယ့ၫၡုၬထၪ့ထူၭလၫ့ကၥ့ၪယီၩ လၧနုၬလၩ့ လၧယရုစလံၫ့ဝံးဖၧၩ့ ဘဲၫဆၧဎူၫဆၧဎၩ့စဎွၩကဂၩအၥိၭလီၫႉ ႇ
ဇံအိၫ့အဖိၪမုၪဧ့ႇ ၥၭထိၬဒိၪဒိၪလ့ၬဆံၭႉ ယရုစလံၫ့အဖိၪမုၪဧ့ႇ ကိၭၡၭထၪ့ဆံၭႉ ယိခွါႇ နစဎွၩဂဲၫလၧနအီၪလီၫႉ တီၩဝ့ၫလီၩ့ဝ့ၫႇ ဒဲထိးထဲၩ့တၩ့ထဲၩ့ဆၧလီၫႉ အၥၧၫ့ဆၧၩ့အၥၭဆၧၩ့တၭႇ ထူၭကၥ့ၪယီၩ့ႇ ကၥ့ၪယီၩ့အၥၭဘၪ့ဒၪလ့ၬႇ ကၥ့ၪယီၩ့မိအဖိၪလီၫႉ (၉:၉)
ၦခမျၧးကိၭၡၭထၪ့ႇ
စဒၪဝံၭအဖိၪခွၫဧ့ႇ ထိးထဲၩ့တၩ့ထဲၩ့ဘိၩ့နဲၪ့ယီၩဆံၭႉ ၦလၧအဂဲၫလၧကဆါအမံၩ့လဂၩယီၩ မွဲဘၪဆၧဆိၪဂ့ၩဝ့ၫဆံၭႉ
ယ့ၫၡုၬဂဲၫလၩ့အၪ့န့ၦၡၩအဆၧကဲၪနီၪ မွဲဝ့ၫ ပမၩလၧၫ့ထၪ့ဎွ့ၩထၪ့ အဖါယွၩအၥၭအဆၧဆိၫ့လီၫႉ
ၦအံၫစရ့ၩလၩဖိၪၥံၪ ယိလါမစဲအၫ(ဎြံၬ) ဘဲၫဂၪ့ခိၪစဎွၩႇ ဂၪ့ခိၪၥုၭခိၪဖၭဒိၪႇ လၧအစီၩ့အမၩ့အီၪ မၩနၧၩ့မၩစၪႇ ဒုၪဒၩၦရိမၫဖိၪၥံၪႇ နၫ့စဲၪထၪ့ခွံၬအဝ့ၫၥံၪ လၧခးအံၫစရ့ၭအဖၧၩ့လီၫႉ
လါနၫ့ဂ့ၩ ယ့ၫၡုၬအဘၩ့အမုနီၪ ဘၪဆဲၫ့လၧဂၪ့ခိၪချိၫ့ယီၩအ့ၬႉ ယ့ၫၡုၬနီၪ မွဲစဎွၩလၧအၥုၪ့ဆၧၩ့ႇ အဲၪကွံၩ ၦၡၩကိၭဂၩဒ့ၭလီၫႉ ယ့ၫၡုၬမၩနၧၩ့မၩစၪၦၡၩနးဂၩအ့ၬႉ ယ့ၫၡုၬအဆၧထိးထဲၩ့တၩ့ထဲၩ့ ဘၪထွ့ၫလၧၦၡၩအနးအထိးထဲၩ့တဲၩ့ထဲၩ့လီၫႉ လၧနါဂ့ၩ ၦအံၫစရ့လၭဖိၪ အဲၪဒိၭန့ဘၪ နးခီၫအဆၧထိးတဲၩ့တၩ့ထဲၩ့ႇ အဆၧမုၬဆၧလၩ့ႇ ဆၧလ့ၩထၪ့လ့ၩထီၫလဖၪနီၪလီၫႉ
အဲၪကွံၩဘၪထၧၫ့ဖုဝဲမုၪခွၫၥံၪဧ့ႇ
လၧပနၫ့ဆါဒၪဝ့ၫႇ ပနးခီၫနးၥၭအဆၧမုၬဆၧလၩႇ ဆၧလ့ၩထၪ့လ့ၩထီၫႇ ပဆၧထံၫပခးအဆၧလ့ၩ အဆၧဎူၫဆၧဎၩ့ ပမူၩဒၩအီၪဝ့ၫလၧ ပကဘၪကျ့ၭစၨၭခိးဂဲးခိးဘၭ ဒဲ လၧဆၧဆူနဲၩဖၧၩ့ႇ ပကဘၪအၪ့ကံၩ့ဘၩဆိၪဖၪ ဆီၪ့ဆီၪ့လ့ၬလီၫႉ လါနၫ့ဂ့ၩ ကဆါယွၩဆၧဎိၭထံၫဎိၭဒီၪ့ႇ ကဆါယွၩအၥၭအဆၧဆိၫ့အီၪ လၧပဂးႇ ပထံၫပခးအဂး အီၪဝ့ၫဘဲၫၥ့ၪလဲၪနီၪ ပကဘၪနၪ့ထၪ့တၭႇ ယွၩအၥၭလုနီၪ ပကဘၪအီၪက့ၪဆိၫ လၧဆၧကိၭမံၩ့ဒ့ၭ အမ့ၬယၫႇ ဒဲအဖၫ့ခိၪလီၫႉ
အ့ၪပဒိၭနဲၩ့ၥၭ လၧယွၩနီၪ လၧဆၧၥၭမၧၫ့မုကိၭနံၩအဂး ပဘၪလိၪလဖၪနီၪ ကဆါယွၩကဖ့ၪလၫ့ယၫ့ၥၭပၧၩလီၫႉ လါနၫ့ဂ့ၩ ပၥၭအဆၧဆိၫ့ထီးလူၬနီၪ ကဆါယွၩမၩလၧၫ့ထၪ့ဎွ့ၩအ့ၪပၧၩအ့ၬႉ ဘၪနီၪလဲၪႇ ဆၧလၧပၥၭအဆၧဆိၫ့ကိၭမံၩ့နီၪ ဂ့ၩလၧပနးၥၭအဂးကိၭကၠၪအ့ၬအကၠီၩ့လီၫႉ
ဆၧအဂ့ၩထုၬလၧပနးၥၭအဂးနီၪ ကဆါယွၩလဂၩဎးၥ့ၪယၫဝ့ၫအကၠီၩ့ႇ ကဆါယွၩအၥၭဆိၫ့လၧပဂးနီၪ ပကဘၪအၪ့ဎၬဆီၫ့မီၪ့ထၪ့ လၧၥုၪ့ဂ့ၩၥၭဘွၩဒဲ ဆၧၥုၪ့ဆၧၩ့ၥၭဆၧၩ့အဖၧၩ့လီၫႉ
ယ့ၫၡုၬအထံၩအဖျဲ ယုဒၭအံၫစကၫရူၭလဂၩႇ အဆၧၥၭအဆၧဆိၫ့ ကလၧၫ့ထၪ့ဎွ့ၩအဂး အဝ့ၫဖ့ၫလၫ့ခွံၬအကဆါ လၧၦလုဆၧအခိၪလဖၪ ဒဲၦၥုၪ့က့ၭၥၭၡါၥံၪအစူၪဖၧၩ့လီၫႉ
ကဆါယွၩအၥၭကလၧၫ့ထၪ့ဎွ့ၩထၪ့ လၧဂၪ့ခိၪချိၫ့ဖၧၩ့ယီၩနီၪ မွဲဝ့ၫအကၧၩ့ဒိၪထုၬတၭႇ ပကဘၪအီၪက့ၪထၬ လၧကိၭမံၩ့ဒ့ၭ အဖၫ့ခိၪလီၫႉ
ယ့ၫၡုၬနီၪ မွဲပနးခီၫနးၥၭအဆၧဎွၩအကၠီၩ့ႇ အဝ့ၫနီၪ လၩ့ဂၬလၧဂၪ့ခိၪအဆၧဎွၩၥံၪလဖၪအ့ၬႉ
ဂၪ့ခိၪအဆၧဎွၩအၪဒၪဆၧနီၪ မၩဎိၩမၩဒိၪၥၭတၭႇ ၦခမျၧးလဖၪမၩအ့ၪအခ့ၫအၡၩဆၧမၩလီၫႉ
ယ့ၫၡုၬစဎွၩနီၪ မွဲယွၩလဂၩဎးႇ လၧဎွ့ၩလၧအစီၩ့အမၩ့လါနၫ့ဂ့ၩ ဂဲၫအီၪၥၭမၧၫ့ဘဲၫၦၡၩႇ ဘဲၫၦအခ့ၫအၡၩကဂၩအၥိၭႇ
လၧဆၧဆၪ့လၩ့ၥုၪ့ဆၪ့လၩ့ၥၭအဖၧၩ့ ဂဲၫထိးထဲၩ့တၩ့ထဲၩ့ပၧၩလီၫႉ…