ၦနွ့ၫမုၪအဖါဖါၥၭဘီၩ့လဂၩ ထၪ့အီၪဎုၬထဲၩ့ဂီၩ့အခၫ နးမုၪချဲၩ့နီၪ ဂဲၫအီၪလၧ ၦနွ့ၫမုၪၥံၪအဂံၪ့နီၪလီၫႉ လါနၫ့ဂ့ၩ ၦနွ့ၫမုၪၥံၪနီၪ လီၩဝ့ၫအဂ့ၩ အီၪနးၥၫ့အ့ၬႉ အ့ၪမွဲၦနွ့ၫမုၪၥံၪအဖါဖါ လ့ၩမၩဆၧမၩဂီၩ့ ဂဲၫထဲၩ့ကိၭကၠၪ လီၩအ့ၪအဝၩ ၦနွ့ၫမုၪၥံၪအဂဲးအဖးလဂ့ၩဘၪႇ ဆၧမၩနၧၩ့မၩဆၫအဝ့ၫအကၠီၩ့ လီၩအ့ၪအဝၩကဘျၩ့ဂီၩ့ကဘျၩ့လီၫႉ အၡါမၪနီၪ ၦနွ့ၫမုၪၥံၪနီၪ အီၪက့ၪအမိၡါဘဲၫအဝ့ၫၥံၪ အမိအထံၭနီၪလီၫႉ လါနၫ့ နးမုၪချဲၩ့နီၪ ကယဲအဝၩအဆၧအီၪလဖၪနီၪ ကမိမၩဝ့ၫကဂၩလီၫတၭ ကမိနၪ့စဲၪ့လၫ့ ၦနွ့ၫမုၪၥံၪနီၪလီၫႉ မွဲဆၧဘဲၫနီၪ အဝၩလ့ၩမၩဆၧမၩဂီၩ့ ဂဲၫထဲၩ့ လီၩအ့ၪအဝၩမွဲ အဖိၪၥံၪအဂဲးလဂ့ၩလဘၪဘၪလီၫႉ

မၩခွၫၡါယီၩ အဂုးခိၪအိၩ အမၫလီၩနီၪ ခိၭနၪဘုၭဝ့ၫနၭအ့ၬ လါနၫ့ ဆၧလီၩခိၪမၪခိၪမၪအခၫ ဂဲၫနဲၩ့ထၪ့အမၫအဆၧချဲၩ့လီၫႉ အဖိၪမုၪၥံၪနီၪ ဒၪဝ့ၫမိန့လၧၩ့အ့ၬႉ ၦနွ့ၫမုၪၥံၪနီၪ ကနံၩဒဲကနံၩဘၪဂၪ့ အၥၭဘၪ့ၡၪ့ကိၭနံၩ နၪ့ထၪ့ အမိမိၥၭဘီၩ့နီၪလီၫႉ

နးမုၪချဲၩ့လဂၩ လီၩၡိၬအဝၩလၧ အဖိၪယါၥံၪနီၪ ခိၪမၪခိၪမၪအခၫ လၧခဲၫ့ အၪ့မၧၫ့ဝ့ၫနၪ့စဲၪ့လၫ့လၧ ဂံၪ့ဖၧၩ့ႇ ၦနွ့ၫမုၪၥံၪနီၪ မၩနၧၩ့မၩစၪအဝ့ၫအကၠီၩ့ အ့ၪမွဲၦနွ့ၫမုၪၥံၪနီၪ လစဲၪ့လၩ့ဘၪလၧဂံၪ့ဖၧၩ့ အဝ့ၫထိးန့လၧၩ့အ့ၬ အဝ့ၫကစဲၪ့လၩ့အကၠီၩ့ လီၩၡိၬအဝၩလီၫႉ

လၧခဲၫ့ထုၬ ၦနွ့ၫမုၪအဖါဖါလဂၩ မုါလါအမၫစဲၪ့လၩ့လၧဂံၪ့ဖၧၩ့အ့ၬဘိၭ ကိၪ့ထၪ့ဝ့ၫလၧ အဖိၪၥံၪကစဲၪ့လၩ့လၧဂံၪ့ဖၧၩ့အဂးလီၫႉ လၧအဝ့ၫအၥၭခံဖၧၩ့နီၪ အမၫလီၩနီၪ အမွဲထီးလူၬႉ စီၪဝ့ၫအဖိၪမုၪၥံၪနီၪ ဂ့ၩလၧအမိယါအဖၫ့ခိၪအ့ၬႉ မွဲဆၧဘဲၫနီၪ ကနံၩနီၪတၭ ကဲ ဖိၪမုၪၥံၪဧ့ႇ လ့ၩဖိၬဖါအခဲၫ့လၧ ၡိၬကျၩ ဖါကလ့ၩဘိၬၥံၪ့မု အၪအကၠီၩ့ ဖါကဂၩလီၫနၧၩ့အ့ၬ လ့ၩယိၬဆၧၩ့ဖါအီ စံၭအဖိၪမုၪၥံၪ ဘဲၫယီၩၥိၭလီၫႉ ၦနွ့ၫမုၪၥံၪလဖၪနးဆ့ အဖါဖါၥၭဘီၩ့လီၩနီၪ စီၪဝ့ၫအၡါမၪတၭ လ့ၩဖိၬအဖါအခဲၫ့လၧ ၡိၬကျၩလီၫႉ

အၥၭဖၧၩ့အီၪမွဲအမၫလီၫ ဖါကဂၩယီၩ အဆၧကိၪ့ဆၧတဲၩ့အီၪဘိၭ လ့ၩကိၭန့အဖိၪမုၪၥံၪနီၪလၧ ၡိၬကျၩအယိၬဖၧၩ့ဂီၩ့ အီၪက့ၪထးဝ့ၫတၭ အဝ့ၫကဂဲၫထဲၩ့စဲၪ့လၫ့ဂူၪလီၫႉ အ့ၪမွဲနၪ့စဲၪ့လၩ့အဖိၪၥံၪလၧ ဂံၪ့ဖၧၩ့နီၪ ခဲၫ့ကံၭဝ့ၫအဂံၪ့နဲၩ့ထံၭၦၡၩၥံၪကအၪ့ကီၫ အဝ့ၫႇ အ့ၪမွဲ အီၪက့ၪထးဝ့ၫလၧ ၡိၬကျၩနီၪ ၦၡၩလီၩအဝ့ၫန့နးမံၩ့အ့ၬလၥၨၩႉ လ့ၩန့အဖိၪမုၪၥံၪနီၪ ခိၪလီၩကဖျိၪ့ဂီၩ့ကဖျိၪ့ ထီၩ့လၧ ၡိၬကျၩအယိၬဖၧၩ့ကကၠၪ နးဒၪဘၨၩလဂၩ ဆၧပွံၭအၥၭ ဂၭဖၭန့လၧၩ့အ့ၬတၭ အီၪပွံၭအလးကစီၪ့နီၪလီၫႉ အနီၪတၭ အဖါနီၪ စံၭဆၧ ကဲ ဖိၪမုၪၥံၪၥၭဝံမ့ၩယူၭလၥၨၩ ဖါဖါကၭထုးထၬၥံၪ့မုၥံၪနီၪ ယဲၩ့ဒံၭဘိၭပကအီၪပွံၭဂီၩ့ ပကအၪ့ကၠၭမ့ၩထယီၩနဲၪႉဘဲၫယီၩ ဖါကလ့ၩလီၩ့ဎွါထံၫဒံၭ ဖိၪမုၪၥံၪခိၬထယီၩအီ ဖါယီၩ စံၭထး အဖိၪမုၪၥံၪဘယီၩ အဝ့ၫဂဲၫထဲၩ့စဲၪ့လၫ့လၧ ၡိၬကျၩနီၪလီၫႉ