လၧကိၩ့ဘီၫ့အထီ ခးပယၩ့စဎွၩလဖၪနီၪ အီၪလၧခးပယၩ့လၬကကဲၩ့ခီၫ မိၫ့ဆၨၩလဖၪနီၪ မၩနၧၩ့မၩဆၫ ဒုၭထၪ့ဝ့ၫ ဆီၪ့ဆီၪ့လ့ၬအကၠီၩ့ မိၫ့ဆၨၩဆၬအၪဒၪဆၧနီၪ ဘၪထဲၩ့ၥုၭအီၪထဲၩ့အၥၭလၧ တန့ၩၥၫရံၩခးဒီၪ့ဒဲ ၥဲၫ့ထံၫခးအိၩနီၪလီၫႉ ထီနီၪ ၦဖျိၩ့ၥံၪ အခွးအရ့ၩ န့ဝ့ၫဒၪလီၫႉ ခပယၩ့ထၬကကဲၩ့ခီၫ အဲၪဒိၭဝ့ၫနၭဒ့ၭ ဒိၩ့ဝိၩၥံၪနီၪ ၦဖျိၩ့ဆၨၩဖိၪၥံၪလၧအဂဲၫအီၪဎံၩ့လၩ့လၧ ခးပယၩ့လၬလဖၪနီၪ မၩထီးထၬဝ့ၫ လန့လၧၩ့ဘၪနးမံၩ့လီၫႉ မိၫ့ဆၨၩလဖၪနးဆ့ မွဲအဂဲးအဘၭဂဲၫလၩ့ဆါယူၭနီၪလီၫႉ

            မိၫ့ဆၨၩဆၬၥံၪနီၪ ဘၪထိးဒုၭအကၠီၩ့ လၩ့မါခွံၬလၧ ထံၫထၪကျိၩ့ယီၩနီၪလီၫႉ ခိၪလၩဘွၩဒဲ ပယၩ့ ဂၪ့ခိၪဆၧဒုၭၥုၭ နံၫဘျၩ့လဘျၩ့ ကဲၪထၪ့ဂီၩ့အခၫ ခးပယၩ့လၬကကဲၩ့ခီၫနီၪ ထီၩ့လၧ ခိၪလၩဘွၩအဆၧပၧၩ့အဖၫ့လၬနီၪလီၫႉ ၦလၧအမၩကဲၪထၪ့ထၬ စဎွၩအထီ မွဲဝ့ၫ မိၫ့ႇ ရခဲၫ့ ဒဲ ၥဲၫ့ၥံၪနီၪ မွဲဖံၭၥိၭလိၬၥၭန့လၧ ဒိၩ့ဝိၩအစဎွၩဂီၩ့ ၥဲၫ့ဒဲ ဒိၩ့ဝိၩ ဂဲၫအဲၪလၫ့လိၬၥၭ လၧခဲၫ့ထုၬ ၥံၫပီၩစဎွၩနီၪ ဂဲၫကဲၪထၪ့ ဒိၩဝိၩဖိၬဖၫ့ ၥဲၫ့ဖိၬဖၫ့နီၪလီၫႉ မိၫ့ဒဲ ရခဲၫ့ ဆၨၩၥံၪနီၪ မွဲဆၧဒုၭၥုၭစၪဂီၩ့ ဘၪလဲၩ့မွံၩဎုၬအၥၭလၧ ဒီၩ့ဝိၩဒဲ ဘၪအၪ့န့ထၪ့အမံၩ့လၧ ဒိၩ့ဝိၩနီၪလီၫႉ ခၠ့ၩ ကခၠ့ၫ ဆၨၩၥံၪလဖၪနီၪ အီၪလၧခိၪလီၩ့ဒၩ့ခိၪတၭ ပယၩ့စဎွၩဒဲ အဝ့ၫၥံၪအကျၩ ဖံၭၥိၭဝ့ၫဂ့ၩဂ့ၩဂီၩ့ ဘဲၫအဝ့ၫအဆၨၩ ကဆုးအီၪဂုးခၧၫ့အဂး ဆုးဖီၪ့ဂုးအီၪဝ့ၫဒၪနီၪလီၫႉ

            ၦဖျိၩ့ဆၨၩဖိၪၥံၪနီၪဘိၭ မွဲလဒုၭထၪ့ဘၪလိၬၥၭလၧ ဆၨၩဂူၫဂၩနးဆၨၩနီၪလီၫႉ ပဂၫ့အထီ အဆိၪထုၬ ဘၪထွ့ၫလၧ ဆၧမၩကဲၪထၪ့ခးပယၩ့ထံၫခး ဆၧထၫ့ဒၩဆၧဒုၭၥုၭၥံၪနီၪ အ့ၪပအၪ့ဎၬထၪ့ထဲၩ့စွါဘဲၫ ပကဒၪဘၪ မိၫ့ဒိၩ့ဝိၩဒဲ ၥဲၫ့ဒိၩ့ဝိၩ အဆၧတုၩ့ထၪ့တုၩ့လၩ့ကဲၪထၪ့အၥိၭ ၥဲၫ့ဒီၩ့ဝိၩဒဲ မိၫ့ၥဲၫ့ အဆၧတုၩ့ထၪ့တုၩ့လၩ့ နီၪလီၫႉ ညီၫ့ယၩ့ တီၫ့ငူၫအထီနးဆ့ ၥဲၫ့ဒဲ မိၫ့ အဆၧတုၩ့ထၪ့တုၩ့လၩ့ ကဲၪထၪ့ဝ့ၫအၪမၬလီၫႉ လၧခဲၫ့ထုၬ ကီၩ့ဘိၫ့အထီ ခးပယၩ့ယီၩ ပကဒၪဘၪ မိၫ့ဒဲ ရခဲၫ့ ဆၧတုၩ့ထၪ့တုၩ့လၩ့ ကဲၪထၪ့နီၪလီၫႉ ခးပယၩ့ယီၩ လၧစဎွၩၥံၪပၧၩ့အထီဒၪအိၩ ၦဖျိၩ့ဆၨၩၥံၪနီၪ မွဲလထၫ့ဒုၪ့ဒၩဘၪ ဆၨၩဂူၫဂၩနးဆၨၩဒဲ အီၪမွဲ ဘၪအၪ့န့မူၩဒၩလၧ ၥုၭဖိၪအလးၥံၪနီၪလီၫႉ

            ခးပယၩ့ယီၩ လၧခိၪလၩဘွၩၥံၪ လဂဲၫပၧၩ့ဒံၭဘၪအထီ ဒီၩ့ဝိၩႇ ၥဲၫ့ႇ မိၫ့ဒဲ ရခဲၫ့ၥံၪနီၪ မွဲဒၪလၧအဝ့ၫၥံၪအဆၨၩ ဒုၭကဲၪထၪ့အဝ့ၫၥံၪအစဎွၩဂီၩ့ အီၪဂုးခၧၫ့ကၠၭဝ့ၫဒၪလၧ အဝ့ၫၥံၪအနီးနီၪလီၫႉလါနၫ့ ခၠ့ၩ ႇ ကခၠ့ၫ ဒဲ ဖျိၩ့ဆၨၩၥံၪနီၪ မွဲအစဎွၩ အနီးလအီၪဘၪဒဲ စီၩကဲႇ စီၩဘွၩႇ ဒူၩဝၩၥံၪနီၪ ပၧၩ့ဝ့ၫန့မွဲ တဝၫ့ ဒဲ ဝံးဒီၪ့ၥံၪနီၪလီၫႉ မွဲဆၧဘဲၫနီၪ ၦဖျိၩ့ဆၨၩၥံၪနီၪ လၧစဎွၩအထီဒၪအိၩ မွဲဘၪဂဲၫထဲၩ့အီၪလၧ ၦဂူၫဂၩၥံၪအဆၧပၧၩ့အဖၫ့လၬနီၪလီၫႉ