လၧဂၪ့ခိၪချိၫ့ယီၩ ထံၫခးၥံၪ စဲၭဒူၭလဖၪထူၭထၪ့ ပလၭစတ့ၭဆၧပိၭဆၧလၫ့လဖၪႇ ခွံၬၡိၬဝ့ၫဒၪ ဆၧပိၭဆၧလၫ့လဖၪႇ ဆၧခွံၬၡိၬ မံၫ့လၫ ဆၧၥလိၪၥလံၬႇ ထံၫလဂ့ၩဘၪႇ ဆၧခွံၬၡိၬထံၫအၥလိၪၥလံၬႇ ခုၪ့ၥၭထူၭဆၧမၩလဖၪႇ ခွံၬၡိၬဆၧဘံၪၥိၭလၧ ပၫ့လဲၫ့ဖၧၩ့ၥံၪနီၪ ကဲၪထၪ့ ထံၫအထုၪ့ၥလိၪၥလံၬထၪ့နီၪလီၫႉ လကၭဒံၭဘၪ ထူၭထၪ့ဝ့ၫန့လၧ ဖံၭဖၧၩ့မွဲဝ့ၫ မ့ၪဆၫလဖၪ အၪ့ဝ့ၫဂီၩ့ ထဲၩ့ဆ့ၭယွၩလၩ့လၧ ပၫ့လဲၫဖၧၩ့ႇ ဖံၬယၪထံၫ့ဒဲ ဆၧမၩၥံၫၥံၭၥံၪ့ဎွံၪလဖၪ ၦၡၩၥိၩ့ထၪ့အၪနၭလၨၪႇ ဆၧအစုၪ့အီၪလဖၪ ဂဲၫထဲၩ့လၩ့ယွၩလၧ ထံၫကၠၧၫ့ကၠၧၫ့တၭ ဂၪ့ခိၪချိၫ့ဂဲၫခိထၪ့ႇ ဆၧဖိၪဆၧဎါလၧအီၪထံၫကျၩလဖၪ ဘၪၥံၫႇ ၦၡၩၥံၪခွံၬၡိၬဆၧတၭ ထံၫအထုၪ့ၥလိၪၥလံၬထၪ့အၥိၭ လၧဖံၬဖၫ့လၬကကဲၩ့ခီၫ ခုၪ့ယ့ၫနၫ့ႇ လိးၥွၪထီးၥံၪနီၪ ကဲၪထၪ့ဆၧလၩ့အၪ့ယိၫအကၠီၩ့ ထံၫအထုၪ့ၥလိၪၥလိၬ ဘၪကဲၪထၪ့နီၪလီၫႉ
ဂဲၫကဲၪထၪ့ဒၪအဝ့ၫန့ လံၩအထုၪ့ၥလိၪၥလံၬလဖၪနီၪ မ့ၪခိၪလီၩ့ဖီးဖၭႇ မ့ၪအၪ့ၡိၬကျၩတၭ ဖံၬချၪလဖၪ ထီၩ့လၧလံၩအထုၪ့ဖၧၩ့နီၪလီၫႉ ၦၡၩၥံၪအဆၧမၩအကၠီၩ့ လံၩအထုၪ့ၥလိၪၥလံၬ ဘၪကဲၪထၪ့ အဂဲးအဖးလဖၪနီၪ လိးမ့ၪအၧၩ့ႇ ကျဲၩ့တံၭဒဲ ၥံၪ့မုၥွၪထီးၥံၪနီၪ ၥိၩ့ထၪ့ဝ့ၫလကၭဒံၭဘၪ ဆၧၥုၪ့ဆၧဖျါလၧ ခိၪလီၩ့ခိၪအဂး ဖံၬၥံၫခွံၬၥံၪ့ကျိၭဂီၩ့ ဎုထၪ့ဝ့ၫအခၫဂဲၫစဲၪ့ထၪ့ စီၩ့ဂဲးအခူၪလဖၪ ဖံၭချၪလဖၪႇ လိးၥွၪထီးအမူၭလဖၪ ဘံၩလၩ့လၧ လံၩအကျၩနီၪလီၫႉ လိးၥွၫထီးဒဲ မ့ၪဆၫလဖၪမွဲဝ့ၫ စီၩ့ၥိၪအွံၩႇ ဒံၫဇဲၥံၪနီၪ စဲၭဒူၭလဖၪမွဲဂ့ၩ ပၥိၩ့ထၪ့လဲၫ့ၥိၪၥံၪလဖၪယီၩ စဲၪ့ထၪ့အခူၪလဖၪနီၪ ကဲၪထၪ့ လံၩၥလိၪၥလံၬနီၪလီၫႉ
ဂၪ့ခိၪချိၫ့ အကၧၩ့ဒိၪဝ့ၫနီၪ ဘဲၫဆၧထုၪ့ၥုၪ့ထုၪ့ၥၭကအီၪအဂး ကိၭနံၪ့ဒ့ၭ လၩ အ့ၫပရၧၫ့ ၂၂ၥၫ့နီၪ အီၪက့ၪထၬဝ့ၫလၧ ဂၪ့ခိၪချိၫ့အမုနံၩ (Earth Day) နီၪလီၫႉ ကိၭနံၪ့ဒ့ၭ လၩ ဂၠိၫ့ ၅ၥၫ့နီၪ ဂၪ့ခိၪယီၩ အီၪက့ၪထၬလၧ ဂၪ့ခိၪနဲၩ့ဎီၩ့အမုနံၩ (World Environment Day) နီၪလီၫႉ ဘၪအီၪက့ၪထၬဝ့ၫဘဲၫယီၩၥိၭနီၪ ဂၪ့ခိၪချိၫ့ယီၩ ၦၡၩၥံၪကိၭဂၩ ဘဲၫလမၩဂၭဂီၩ့ဘၪ နဲၩ့ဎီၩ့တၭ ကဘၪယိထွ့ၫပဒၩ့ကၠၭဝ့ၫနီၪ မွဲဝ့ၫပမူၩဒၩအကၠီၩ့ ဘၪပဂၨၪထၪ့ဝ့ၫ ကိၭနံၪ့ဒ့ၭနီၪလီၫႉ